Read cisena LEVITIKO 23 Bible Online

LEVITIKO 23 - cisena bible

LEVITIKO 23

¹MBUYA adapanga Mose

²kulonga kuna Aisraele kuti: Enewa ndi maphwando akusankhulika a MBUYA, pontho imwe mwathema kualonga kuti ndi migumano yakupambulika:

³Muna nsiku zitanthatu zakuphata basa, mbwenye kumbukani kuti nsiku yachinomwe ndi Nsiku Yakupuma. Pansiku yeneyo lekani phata basa, mbwenye gumanyikanani kupembedza basi. Nsiku Yakupuma nja MBUYA, podi na konsene kunakhala imwe.

⁴Lalika pya maphwando akusankhulika a MBUYA kuti achitike pandzidzi wakusankhulika.

⁵Phwando ya Paska yakulemedza nayo MBUYA imbatoma pinathobila dzuwa pansiku yakhumi na chinayi ya mwezi wakutoma wa chaka.

⁶Pansiku yakhumi na chishanu Phwando ya Mikate yakusowa Chakufufumisira imbatoma, natenepo nsiku zinomwe lekani kudya mkate wakukhala na chakufufumisira.

⁷Pansiku yakutoma ya nsiku zenezi mwathema kugumanyikana kuti mupembedze, pontho lekani phata mabasanu a nsiku na nsiku.

⁸Perekani nsembe zakusasanywa na moto kuna MBUYA nsiku zinomwe. Pansiku yachinomwe mwathema kugumanyikana kuti mupembedze, mbwenye lekani phata mabasanu a nsiku na nsiku.

⁹Mungafika m'dziko inafuna kukupasani MBUYA mbamukavuna phoso yanu, kwatani mitolo ya mbewu zakutoma tokotazo kwenda nazo kuna nyansembe.

¹¹Nyansembeyo anaipereka kuna MBUYA ninga chakupereka chakupambulika, towera itambirwe m'mbuto mwanu. Nyansembe aipereke kuna MBUYA mangwana mwache Nsiku Yakupuma ingagwanda.

¹²Pansiku inapereka imwe mbewu zanu ninga chakupereka, muphe pontho mwanabira wamamuna wakukwana chaka chibodzi, pontho wakusowa chilema ninga nsembe yakupyerera.

¹³Pabodzi pene na nyamayo mupereke ufa pang'ono wakuvungazwa mafuta aolivi ninga nsembe yakusasanywa na moto kuna MBUYA. Khwema ya nsembe yeneyi imbamkomera MBUYA. Mupereke pontho pabodzi na penepi chakupereka cha vinyu wakudzala buyawu ibodzi.

¹⁴Lekani kudya na chibodzi chene cha phoso yachinchino penu ntchiwisi penu ntchakuotcha penu mkate wache mbamudzati pereka nsembe yeneyi kuna Mulungu wanu. Mwambo wenewu wathema kukoyiwa na pidzukulu pyanu pyonsene mifendu yonsene inadzayo.

¹⁵Lengesani madimingu amumphu manomwe kutomera kumala kwa Nsiku zinomwe Zakupuma, nsiku imbadza imwe na mphunja ya pyakuvuna pyanu dzapereka kuna MBUYA.

¹⁶Lengesani nsiku makumashanu mpakana kumala kwa Nsiku zinomwe Zakupuma. Tenepo perekani kuna MBUYA mapira ninga chakupereka chitswa.

¹⁷Banja yonsene yathema kudza na mikate miwiri kuipereka kuna MBUYA ninga mtukwa wakupambulika. Mikate yonsene isasanywe na ufa wakulemera makilogramu mawiri yakuphikwa mwakuvungazwa na chakufufumisira mkate, natenepo iperekwe kuna MBUYA ninga chakupereka cha pyakuvuna pyakutoma kutokota.

¹⁸Natenepo pabodzi pene na mikate ile, dzinza yonsene ipereke mabira manomwe akukwana chaka chibodzi, ng'ombe imuna ibodzi, na mabira amuna awiri, onsenewa mbaleke khala na chilema. Pyonsenepyo pinaperekwa ninga nsembe yakupyerera pabodzi pene na chakupereka cha mapira, pontho na chakupereka cha vinyu. Khwemache imbamkomera MBUYA.

¹⁹Pontho mupereke bokho mbodzi ninga nsembe yakulekerera pyakudawa, pontho na mabira amuna awiri a chaka chibodzi ninga nsembe yachiphatizano.

²⁰Nyansembe anapereka mikate na mabira mawiri ale ninga mtukwa wakupambulika kuna MBUYA kuti pikhale pya anyansembe. Pyakupereka penepi mphyakupambulika.

²¹Pansiku yeneyo lekani dzaphata mabasanu a nsiku na nsiku, mbwenye gumanyikanani kuti mupembedze. Pidzukulu pyanu pikoye mwambo onsene mifendu yonsene inadzayo konsene kunakhala iwo.

²²Mungavuna mbewu zanu lekani kufikiratu m'madire a mundanu, pontho lekani bwererako kaphalakatira; penepyo mupilekere anyakutcherenga na alendo. Ine ndine MBUYA Mulungu wanu.

²³Nsiku yakutoma ya mwezi wachinomwe yathema kukhala nsiku yakupuma yakupambulika, pontho mwathema kugumanyikana pabodzi mungava kulira kwa ngoma.

²⁵Perekani nsembe yakusasanywa na moto kuna MBUYA, pontho lekani phata mabasanu a nsiku na nsiku.

²⁶Nsiku yachikhumi ya mwezi wachinomwe ndi nsiku yakuchita mwambo wakupichenesa kubulusa pyakudawa pya anthu. Pansiku yeneyo lekani kudya chinthu na chibodzi chene. Gumanyikanani pabodzi kuti mupembedze, pontho perekani kuna MBUYA nsembe yakusasanywa na moto.

²⁸Nsiku yeneyo lekani dzaphata basa thangwi ndi nsiku yakuchita mwambo wakupichenesa kubulusa pyakudawa.

²⁹Munthu anadya kwene chinthu pansiku yeneyo hanayeswave mbodzi wa anthu a Mulungu tayu.

³⁰Ngakhala munthu aphata basa pansiku yeneyo, MBUYA yekha ene anampha munthu weneyu.

³¹Mwambo wenewu ukulonga kuna pidzukulu pyanu pene konsene kunakhala iwoko.

³²Kutomera kuthobila kwa dzuwa pansiku yachifemba ya mwezi kufikirana kuthobila kwa dzuwa pansiku yachikhumi mukoye nsiku yeneyi ninga nsiku yakupambulika yakupuma, pontho nkhabe kudya chinthu na chibodzi chene tayu.

³³Phwando ya Misasa yathema kutoma pansiku yakhumi na chishanu ya mwezi wachinomwe, tenepo ithimize mpakana nsiku zinomwe.

³⁵Pansiku yakutoma ya nsiku zenezi gumanyikanani pabodzi kuti mupembedze, pontho lekani phata mabasanu a nsiku na nsiku.

³⁶Nsiku zonsene pansiku zinomwezi mupereke kuna MBUYA nsembe zakusasanywa na moto. Pansiku yachisere gumanyikanani pabodzi pontho kuti mupembedze, pontho perekani kuna MBUYA nsembe zakusasanywa na moto. Yeneyi ndi nsiku yakupembedza natenepo lekani phata mabasanu a nsiku na nsiku.

³⁷(Enewa ndi maphwando akusankhulika a MBUYA, ale athema imwe kualonga kuti ndi migumano yakupambulika, towera mupereke nsembe zakusasanywa na moto kuna MBUYA, nsembe zakupyerera, pyakupereka pya mapira, nsembe, na pyakupereka pya vinyu ninga munafunirwa ipyo nsiku na nsiku.

³⁸Maphwando enewa mwathema kuathimizira pa Nsiku Zakupuma dimingu na dimingu, pontho pyakupereka penepi mupithimizire pa mitukwa imbapereka imwe ile. Pyakupereka pyanu pyakuchitisa kuti kudumbira kudachita imwe pikwane-kwane, pyakupereka pimbapereka imwe kuna MBUYA na kufuna kwanu.)

³⁹Mungavuna mbewu zanu, sekerani phwando yeneyi nsiku zinomwe, kutomera pansiku yakhumi na chishanu ya mwezi wachinomwe. Nsiku yakutomayo inakhala nsiku yakupuma yakupambulika.

⁴⁰Pansiku yeneyo kwatani nsapo zadidiletu pang'ono kubulukira m'miti mwanu, kwatani matsamvu amdikhwa na matsamvu a mikotamu, kubuluka penepo tomani phwando yanu ya chipembedzo kulemedza MBUYA Mulungu wanu.

⁴¹Sekerani phwando yeneyi nsiku zinomwe. Mwambo wenewu wathema kutewezwa na pidzukulu pyanu pyene mpakana mifendu yonsene inadzayo.

⁴²Aisraele onsene anakhala m'misasa nsiku zinomwe,

⁴³towera pidzukulu pyanu pidziwe kuti MBUYA adaachitisa Aisraele kukhala m'misasa pikhaabulusa iye m'dziko ya Iguputo. Iye ndi MBUYA Mulungu wanu.

⁴⁴Natenepo na njira yeneyi Mose adapereka kuna Aisraele mwambo wakukoya nawo maphwando akusankhulika a MBUYA.