Read cisena LEVITIKO 24 Bible Online

LEVITIKO 24 - cisena bible

LEVITIKO 24

¹MBUYA adapanga Mose

²kulonga kuna Aisraele kuti: Dzani na mafuta adidi aolivi kuti aikhwe m'nyale m' Chikhumbi cha Mulungu towera nyale zigake nsiku zonsene.

³Mawulo onsene Aroni mbazigase mbaleke kuzithimisa mpakana mangwana mwache na machibese pamaso pa MBUYA kunja kwa chinguwo chakutchinga nacho Bokosi ya Chiverano. Mwambo wenewu wathema kutewezwa mpakana mifendu yonsene inadzayo.

⁴Aroni ayang'anire mwadidi nyale zenezi pachakuikhirapo nyale chagolidi chadi-chadi, pontho athema kuonesesa kuti nyale zikugaka ndzidzi onsene pamaso pa MBUYA.

⁵Kwatani ufa wakulemera makilogramu khumi na awiri mbamuphika mikate khumi na miwiri.

⁶Ikhani mikateyo m'mizera miwiri, mzera ubodzi ukhale na mikate mitanthatu pathebulu yakukukutizwa na golidi chadi-chadi, ile ili pamaso pa MBUYA.

⁷Ikhani pyakufukiza pyakununkhira chadi-chadi m'mizera yonsene ninga chidzindikiro cha nsembe yakusasanywa na moto kuna MBUYA m'mbuto mwa mikate.

⁸Nsiku zonsene Zakupuma mikate yathema kuikhwa pamaso pa MBUYA mpakana mifendu yonsene inadzayo. Yeneyi ndiye basa ya Aisraele kwenda na kwenda.

⁹Mikateyo nja Aroni na anache na pidzukulu pyache, pontho athema kuidyera m'mbuto yakupambulika, thangwi yeneyi ndi khundu yakuchena pyakwanga ya nsembe yakusasanywa na moto yakuperekwa kuna MBUYA kuti ikhale ya anyansembe.

¹⁰Pakhali mamuna unango, ule babache akhali Muiguputo, mbwenye mache akhali Muisraele. Dzinache macheyo ikhali Shelomiti, mwana wamkazi wa Dibri wa dzinza ya Dani. Munthu weneyu mumsasa mule adasosana na Muisraele. Ndzidzi ukhathimbana iwo, iye adatemberera Mulungu, natenepo anthu adamuendesa kuna Mose.

¹²Iwo adamulondali mwadidi gopesera anathawa kudikhira kuti MBUYA aapange pyakuchita naye munthu weneyu.

¹³MBUYA adalonga kuna Mose mbati,

¹⁴“Mkwate munthuyi uende kunja kwa msasa. Munthu onsene adava kudembetera kudachita iyeyo asanjike manjache pamsolo pa munthuyi kuchitira umboni kuti iye adawadi, tenepo dzinza yonsene imponyere miyala kuti afe.

¹⁵Uapange Aisraele kuti munthu onsene anatemberera Mulungu wache athema kuoneswa nyatwa,

¹⁶pontho kuphiwa. Munthu onsene penu ndi Muisraele penu mlendo wakukhala mu Israele, anatemberera MBUYA anaponyerwa miyala na anthu onsene kuti afe.

¹⁷“Munthu onsene wakupha mwanzache athema kuphiwambo,

¹⁸pontho munthu onsene wakupha chifuyo cha munthu unango athema kuchibwezera chinthu chenecho. Njirache njakuti moyo kupagali moyo.

¹⁹“Ngakhala munthu anakuwaza mwanzache, pyonsene pyachita iye kuna mwanzache pichitikembo kuna iye.

²⁰Ngakhala aswa gogodo ya mwanzache, gogodo yache inaswiwambo; ngakhala anaswa mwanzache diso, diso yache inaswiwambo; ngakhala anakhutcha mwanzache dzino, dzino yache inakhutchambo. Chonsene chinakuwaza iye mwanzacheyo, iye anakuwaziwambo chonthocho kumbwezera.

²¹Munthu angapha nyama, aibweze, mbwenye munthu angapha mwanzache, aphiwembo.

²²Mwambo wenewu ukulonga kuna imwe Aisraele na alendo ene akukhala pakati panu, thangwi ine ndine MBUYA Mulungu wanu.”

²³Pidalonga Mose penepi kuna Aisraele, iwo adenda na munthu wakutemberera ule kunja kwa msasa mbamponyera miyala mbafa. Na njira yeneyi Aisraele adachita pidalonga MBUYA kuna Mose.