Read cisena LEVITIKO 25 Bible Online

LEVITIKO 25 - cisena bible

LEVITIKO 25

²kulonga kuna Aisraele kuti: Mungapita m'dziko inafuna kukupasani MBUYA, mukamulemedze MBUYA pakukhonda kulima mindanu chaka chachinomwe chonsene.

³Pyaka pitanthatu munakwanisa kabzala mindanu, kasadzulira mindanu yamfesa, na kugumanyisa phoso yanu.

⁴Mbwenye chaka chachinomwe, chaka chakupambulika kuna MBUYA, chikhale chaka chakupuma monsene mwene kuna munda. Lekani kabzala mbewu m'minda mwanu penu kusadzulira mindanu yamfesa.

⁵Lekani kavuna magoko, pontho lekani katchola mfesa zokhonda sadzulira; chenechi ntchaka chakupuma monsene mwene kuna dziko.

⁶Podi kwene kuti minda nee yalimwa chaka chenechobi, inapereka phoso basi yakuti imwe, pidzukulu pyanu, mabitchu, anyaganyo, alendo akukhala pakati panu,

⁷pifuyo pyanu na nyama zam'tsanga m'minda mwanu munakwanisa kudya. Chonsene chinabala mwenemo chinakwanisa kudyiwa.

⁸Lengesani kanomwe pyaka pinomwe, pyonsene kuvungaza ndi pyaka makumanayi na pifemba.

⁹Tenepo pansiku yachikhumi ya mwezi wachinomwe, Nsiku yakupereka nsembe zakulekerera pyakudawa, tumani munthu kuti alize ngoma m'dziko monsene.

¹⁰Na njira yeneyi chaka cha makumashanu chikhale chakupambulika, pontho mulalike ufulu kuna onsene akukhala m'dzikomo. Pandzidzi wa chaka chenechi chinthu chonsene chakuguliswa chibwezerwe kuna mwenechiroache wakutomayo, penu kuna pidzukulu pyache, pontho munthu wakuguliswa kukhala bitchu, abwezerwe kubanja kwache.

¹¹Lekani bzala mbewu m'minda mwanu, penu kuvuna magoko, penu kutchola nsapo yokhonda sadzulirwa.

¹²Chaka chamumphu chikhale chakupambulika kuna imwe. Chinafuna kudya imwe ntchenecho chene chakumera chokha m'minda mwanu basi.

¹³Chaka chenechi pyonsene pya munthu pyakuguliswa pinabwezerwa kuna mwenechiroache wakutomayo.

¹⁴Natenepo mungagulisa munda kuna Muisraele mnzanu penu kugula munda kubulukira kuna iye, lekani dyerana nkope-kope.

¹⁵Kontache ikhale yakuthemerana na pyaka pinafuna kulima munthu mbachidzati fika chaka chakubwezera.

¹⁶Ngakhala pasala pyaka pizinji, kontache ikhale yakudula, mbwenye ngakhala kwasala pyaka pyakuchepa, kontache ikhale yakuchepa, thangwi chinaguliswacho ndi phoso inabuluka m'mundamo.

¹⁷Lekani kudyera nkope-kope Muisraele mnzanu, mbwenye gopani MBUYA Mulungu wanu.

¹⁸Verani mwambo na matongero a MBUYA, towera mukhale mwakutchinjirizwa m'dziko.

¹⁹Dziko inabala phoso yache, tenepo munakhala napyo pyonsene pinafuna imwe kudya, pontho munakhala mwakutchinjirizwa.

²⁰Mbwenye unango anakwanisa kuvunza kuti apo chaka chachinomwe chinafuna ife kudya ninji podi kubzala mbewu m'minda mwathu nee tidabzala tayu, pontho nkhabe kugumanya phoso yathu?

²¹M'chaka chachitanthatu MBUYA anatsanzayisa dziko towera iphe phoso yakukwana pyaka pitatu.

²²Mungabzala chaka chachiserechi munathimiza basi kudya phoso yanu yonthoyo idavuna imwe chaka chachitanthatu ile. Phoso munakhala nayo yakukwana mpakana mbewu zidabzala imwe zitokote.

²³Nkhabe mbuto yathema kuguliswa kuna munthu kuti ikhale yacheletu tayu, thangwi imwembo si yanu tayu, nja Mulungu, natenepo imwe mwakhala ninga alendo pontho anyantchoche anga.

²⁴Ngakhala mbuto inaguliswa, mwenechiro mbutoyo athema kukhala na utongi wakuiombola.

²⁵Ngakhala Muisraele asanduka nyakutcherenga, pontho akukhakhamizwa kuti agulise mbuto yache, mbaleache munthuyo wakukhala naye chifupi aombole mbutoyo.

²⁶Ngakhala munthu nkhabe mbaleache wakuombola mbutoyo, nsiku zinango anakwanisa kukhala nyakufuma mbakhala na kobiri zakukwana kuombola nazo mbuto yache ile yekha ene.

²⁷Papinthu ninga penepi iye athema kumpagali munthu adaigula ule na konta yakuthemerana na pyaka pyasalira mbachidzati fika chaka chakumbwezera; kubuluka penepo iye anakwanisa kuikwata mbuto yacheyo.

²⁸Mbwenye ngakhala iye nkhabe kobiri zakukwana kuombola nazo mbuto yache, mbutoyo ithimize kukhala m'manja mwa munthu adaigula ule mpakana chaka chakubwezera. Chaka chenecho mbutoyo inabwezerwa kuna mwenechiroache wakutoma ule.

²⁹Ngakhala munthu anagulisa nyumbache m'bwalo mwa mpanda wa mzinda, iye ali nawo utongi wakuombola nyumbache pandzidzi wa chaka chakutoma, kutomera nsiku idaguliswa nyumbayo.

³⁰Mbwenye ngakhala iye hanaiombola tayu, pandzidzi wenewu wa chaka chakutoma basi ataya mwayi wakuombola nyumbacheyo, natenepo nyumbayo inakhaliratu yache munthu idaigula ule pabodzi na pidzukulu pyache; chaka chakubwezera nyumbayo hinabwezerwave kuna mwenechiro wakutoma ule tayu.

³¹Mbwenye nyumba za midzi yokhonda zungulirwa na mpanda zathema kuyeswa ninga minda; mwenechiro wakutoma ana utongi wakuombola nyumbacheyo, pontho chingafika chaka chakubwezera, nyumbayo ipaswe mwenechiroache.

³²Kwache ana a Levi ana utongi wakuombola pinthu pyawo pidapaswa iwo mizinda yawo pandzidzi onsene unafuna iwo.

³³Ngakhala ibodzi mwa nyumba za Alevi ya m'mizinda yeneyi yaguliswa na mwenechiroache, pontho nee ikuombola tayu, yathema kubwezerwa m'manja mwa mwenechiro chaka chakubwezera, thangwi nyumba zinakhala Alevi m'mizinda mwawo pakati pa Aisraele nsawo zene.

³⁴Mbwenye mbuto ya mpovu yakuzungulira mizinda ya Alevi mbileke kuguliswa, yeneyo ndi mbuto yawo ene kwenda na kwenda.

³⁵Ngakhala Muisraele mnzako wakukhala chifupi na imwe asanduka nyakutcherenga mwakuti nkhabe kwanisa kupiphedza yekha ene, imwe mwathema kumpasa pinthu pinasowa iye ninga mumbachitira imwe na nyaganyo, towera iye athimize kukhala na imwe chifupi.

³⁶Lekani kumpanga kuti apagali na kuthimizirapo kobiri zinango zapapezi, mbwenye gopani Mulungu wanu, pontho mtawiriseni Muisraele mnzako kukhala chifupi na imwe.

³⁷Lekani kumpagalisa kobiri zinango zapapezi kupambula zidamfiyalisa imwe zile, pontho lekani kuganyali na phoso inamgulisa imwe.

³⁸Ine ndine MBUYA Mulungu wanu, adakubulusani m'dziko ya Iguputo ule, towera akupaseni dziko ya Kanani, pontho kuti ndikhale Mulungu wanu.

³⁹Ngakhala Muisraele mnzanu wakukhala chifupi naye atcherengeratu mwakuti apigulisa yekha ene kuna imwe ninga bitchu, lekani kumphatisa basa ninga bitchu.

⁴⁰Iye athema kukhala pabodzi na imwe m'nyumba mwanu ninga nyaganyo; iye anakuphatirani basa mpakana chaka chakubwezera.

⁴¹Pandzidzi wenewu iye na anache athema kusudzulwa mbabwerera kumusa kwawo na kuna pinthu pya makolo awo.

⁴²Aisraele ndi mabitchu a MBUYA, pontho adaabulusa ndiye m'dziko ya Iguputo; natenepo iwo mbaleke guliswa ninga mabitchu.

⁴³Lekani kuachitira vinga, mbwenye gopani Mulungu wanu.

⁴⁴Ngakhala munafuna mabitchu munakwanisa kuagula kubulukira kumadzinza akuzunguliraniwa.

⁴⁵Pontho imwe munakwanisa kugula ana a alendo akukhala pakati panupa. Ana ninga enewa akubalwa m'dziko mwanu anakwanisa kusanduka anu ene,

⁴⁶pontho munakwanisa kualeka ninga chinthu chakuti muchisiyire ananu imwe mungafa, ale anaaphatira basa ndzidzi unakhala iwo na moyo. Mbwenye Muisraele mnzanu lekani kumchitira chinthu mwavinga.

⁴⁷Ngakhala mlendo wakukhala pakati panu anasanduka nyakufuma, uku Muisraele mnzanu asanduka nyakutcherenga mbapigulisa yekha ene ninga bitchu kuna mlendo ule, penu kuna munthu mbodzi wa m'banja wache mule,

⁴⁸iye ana utongi basi wakuombolwa kuti akhale mtumbe. Mbodzi wa abale ache,

⁴⁹penu mbaleache babache, penu mwana nyamaingache babache, penu mbaleache unango chadi-chadi, anakwanisa kumuombola; penu ngakhala iye agumana kobiri zakukwana anakwanisa kupiombola yekha ene kuti akhale mtumbe.

⁵⁰Iye alonge na munthu adamgulayo, tenepo iwo alengese pyaka kutomera ndzidzi udapigulisa iye mpakana chaka chakubwezera, kubuluka penepo alonge kontache pakumsudzula nayo mwakuteweza kupagalwi mumbachita nyaganyo.

⁵¹Iye abwezere kobiri zidagulirwa na iye zile malingana na pyaka pyasalapyo,

⁵²

⁵³khala ninga akhali nyaganyo wa pachaka na chaka. Mbuyache aleke kumchitira mwavinga.

⁵⁴Ngakhala iye nee akusudzulwa tayu kuti akhale mtumbe na ibodzi mwa njira zenezi, iye pabodzi na anache asudzulwe chaka chakubwezera chingafika,

⁵⁵thangwi Aisraele ndi mabitchu a MBUYA. Ine ndaabulusa m'dziko ya Iguputo, ine ndine MBUYA Mulungu wanu.