Read cisena LEVITIKO 26 Bible Online

LEVITIKO 26 - cisena bible

LEVITIKO 26

¹MBUYA adalonga mbati, “Lekani kupisasanyira milungu, penu mifanikizo ya mtundu onsene, piguwa pyakupambulika, penu miyala yakuchita kusemwa kuti muipembedze. Ine ndine MBUYA Mulungu wanu.

²Koyani maphwando achipembedzo, pontho lemedzani mbuto zimbapembedzwa ine. Ine ndine MBUYA.

³“Ngakhala munateweza mwambo wanga na kuvera matongero,

⁴ine ndinati ndikutumizireni mvula pandzidzi wache towera dziko ibalise phoso na miti ibale nsapo zache.

⁵Pyakuvuna pyanu pinakhala pizinji mwakuti munapivuna basi mpakana ndzidzi wakutchola nsapo, pontho munatchola nsapozo mpakana ndzidzi wakubzala mbewu. Munakhala napyo pyonsene pinafuna imwe kuti mudye, pontho munakhala mwakutchinjirizwa m'dziko mwanu.

⁶“Ndinati ndikupaseni mtendere m'dziko mwanu mbamugona okhonda gopa munthu. Ndinati ndibuluse nyama zakugoswa zonsene m'dzikomo, pontho mwenemo nkhabe dzakhala nkhondo tayu.

⁷Imwe munakunda anyamalwanu.

⁸Anthu anu ashanu anakwanisa dzakunda anyamalwa dzana, pontho anthu anu dzana anakwanisa dzakunda anyamalwa pikwi khumi.

⁹Ndinati ndikutsanzayiseni na kukupasani ana azinji. Ndinati ndikoye chiverano changa chidasasanya ine na imwe.

¹⁰Pyakuvuna pyanu pinakhala pizinji pyakwana mwakuti pinamala chaka chamumphu pikalipo basi, pontho mwinango munachita kuphaphula phoso yakaleyo kuti muikhemo yachinchino.

¹¹Ndinati ndikhale pakati panu m'Chikhumbi changa, pontho sinakukhondani tayu.

¹²Ndinati ndikhale namwe; ine ndinati ndikhale Mulungu wanu, imwembo munakhala anthu anga.

¹³Ine MBUYA Mulungu wanu ndidakubulusani m'dziko ya Iguputo, towera muleke khala pontho mabitchu. Ine ndidaswa goli-goli ya m'khosi mwanu ile mbandikuchitisani kuti mufambe na nthuku phaa.”

¹⁴MBUYA adalonga mbati, “Ngakhala munakhonda kuvera matongero anga munati mutchunyuswe.

¹⁵Ngakhala munakhonda kuvera matongero anga mbamuswa chiverano chidasasanya ine na imwe chile,

¹⁶ndinati ndikutchunyuseni. Ndinati ndidzese nyatwa pana imwe; utenda okhonda wangisika na kuva manungo ene, ule unakuchitisani kuti musanduke maboli-boli na kumala manungo anu. Munabzala mbewu zanu, mbwenye nee munaganyali nazobi, thangwi anyamalwanu anakukundani mbadya pidabzala imwepyo.

¹⁷Ine ndinati ndikupaseni nkhodolo towera mukundwe, pontho anthu ambakuzondani ale anakutongani; munakhala na mantha mwakuti munathawa mwekha ene okhonda thamangiswa na munthu unango.

¹⁸“Podi na kumala kwa penepo ngakhala imwe munathimiza basi kukhonda kundivera, ndinati ndithimize na kanomwe kukutchunyusani.

¹⁹Ndinati ndiswe kuuma kwanu mtima mwakunyadaku; nee panakhala mvulabi, pontho mataka anakhala akuwanga pyakwanga ninga simbi.

²⁰Kuphata kwanu basa mwakuwangisa kule nee kunakuganyalisani tayu, thangwi mataka nkhabe bala nsapo zache tayu.

²¹“Ngakhala munathimiza basi kuchita mwakupokanyisana na ine, ndinati ndithimize pontho na kanomwe kukutchunyusani.

²²Ndinatumiza nyama zakugoswa pakati panu, tenepo zinapha ananu na pifuyo pyanu mbasiya kwene anthu pang'ono basi mwakuti njira zinaphopha na tsanga.

²³“Ndingamala kukutchunyusani ninga tenepo ngakhala imwe munathimiza basi kukhonda tchunyuka mbamuchita mwakupokanyisana na ine,

²⁴inembo ndinachita mwakupokanyisana namwe kukutchunyusani kanomwe pyakwanga pene kupiringana pakutoma.

²⁵Ndinati ndidzese nkhondo pakati panu kukutchunyusani thangwi ya kuswa chiverano chathu, pontho ngakhala munagumanyikana m'mizinda mwanu kuti mubisale, ndinati nditumize utenda okhonda wangisika pakati panu, pontho munaperekwa m'manja mwa anyamalwanu.

²⁶Pinakudzeserani kudyapyo ndinapigwanda kupibulusa mwakuti akazi khumi anaphatisa basa uvuni ubodzi kuphika mikate yonsene ina iwo. Iwo anagawana yeneyo, tenepo mungamala kudya yonseneyo, munakhala na njala basi.

²⁷“Pyonsenepi pingamala, ngakhala imwe munathimiza kukhonda kundivera mbamuchita mwakupokanyisana na ine,

²⁸penepo ndinachitambo mwakupokanyisana namwe mwakuzhangali, pontho ndinakutchunyusani kanomwe mwakunyanya kupiringana pakutoma.

²⁹Munasanyika pyakwanga na njala mwakuti munadya ananu ene akubala imwe.

³⁰Ndinati ndigomole mbuto zanu zakupembedzerapo milungu, kugwisa maguwanu onsene akufukizirapo pyakununkhira, na kuaponya anyakufanu pana mifanikizo yanu yakugwayo. Mwakunyansirwa namwe

³¹ndinati ndisanduze mizindanu kukhala madembe, kuvunga mbuto zanu zakupembedzera, pontho kukhonda kutambira nsembe zanu.

³²Dziko yanu ndinaivunga monsene mwene mwakuti anyamalwanu anafuna dzakhalamo anadodoma na kuvungika kweneku.

³³Ndinadzesa nkhondo pakati panu, pontho kukubalalisani kwenda kumadziko anango. Dziko yanu inasanduka msitu, pontho mizinda yanu inasanduka madembe.

³⁴Natenepo dziko inatsanzaya pyayo pa pyaka pyakupuma pyakuti imwe nee mudapifuna kuipumisa tayu. Iyo inagona pyayo yokha ene kupuma uku imwe muli m'dziko yantomi, dziko ya anyamalwanu.

³⁶“Ndinati ndikuchitiseni kukhala na mantha pyakwanga imwe anthu akukhala m'dziko ya anyamalwanu mwakuti dungu ene yamasamba akutekenyeka na mphepo inakuchitisani kuthawa. Munathamanga khala ninga mukhathamangiswa pankhondo, pontho munagwa uku anyamalwanu nee ali chifupive tayu.

³⁷Munagwegwedusana mwekha ene okhonda nyakukuthamangisani, pontho imwe nkhabe kwanisa kumenyana na anyamalwanu tayu.

³⁸Imwe munafa m'dziko yantomi; dziko ya anyamalwanu inakukhudyulani.

³⁹Anango pang'ono a imwe, ale anafuna dzasalira na moyo m'dziko ya anyamalwanu anatayika, thangwi ya pyakudawa pyanu na pya makolo anu.

⁴⁰“Mbwenye pidzukulu pyanu pinabweka pyakudawa pyawo na pyakudawa pya makolo awo, ale adandikhonda mbandipandukira,

⁴¹pontho mbandichitisa kuti inembo ndiapase nkhodolo na kuatumiza kudziko yantomi, dziko ya anyamalwawo. M'nduli mwache pidzukulu pyanu na mtima wakuuma pingapichepesa na kupagali konta ya pyakudawa na kupandukira,

⁴²ndinati ndikumbuke chiverano chidachita ine na Yakobo, Isake na Abrahamu, pontho kudumbira kudachita ine kuna anthu anga kuti ndinaapasa dziko,

⁴³mbwenye chakutoma dziko ibuluse anthu onsene towera ikomerwe na kupumambo monsene mwene, pontho anthuwo apagali pyakudawa pyawo thangwi ya kukhonda mwambo wanga na matongero anga.

⁴⁴Mbwenye podi pikhale tenepo, pinakhala iwo m'dziko ya anyamalwawo basi, ine nkhabe dzaakhonderatu penu kuavungiratu monsene mwene tayu. Kweneko kunakhala kumala kwa chiverano chidachita ine na iwo. Ine ndine MBUYA Mulungu wawo.

⁴⁵Kwache na thangwi ya iwo ndinati ndikumbuke chiverano chidachita ine na makolo awo pandzidzi udaonesa ine madzinza onsene mphamvu zanga pakuabulusa m'dziko ya Iguputo, towera ine MBUYA ndikhale Mulungu wawo.”

⁴⁶Penepi pikhali mwambo na matongero pidapereka MBUYA kuna Mose paphiri ya Sinai kuti Aisraele apiteweze.