Read cisena LEVITIKO 27 Bible Online

LEVITIKO 27 - cisena bible

LEVITIKO 27

¹MBUYA adapanga Mose

²kulonga kuna Aisraele kuti: Ngakhala munapereka munthu kuna MBUYA kuchitisa kudumbira kwakupambulika kudachita imwe kukwane-kwane, munthu weneyo anakwanisa kusudzulwa mungapagali konta ya kobiri ili m'tchindemu,

³malingana na mdida ukhaphatiswa basa ndzidzi wenewo: Mamunamkulu wa pyaka makumawiri pyakubalwa kwenda m'tsogolo mpakana makumatanthatu: Kobiri zasiliva zakukwana makumashanu; mkazimkulu: Kobiri zasiliva makumatatu; Mphale wa pyaka pishanu mpakana makumawiri pyakubalwa: Kobiri zasiliva makumawiri; mtsikana: Kobiri zasiliva khumi; khombwani wamamuna wa mwezi ubodzi mpakana pyaka pishanu: Kobiri zasiliva zishanu; khombwani wamkazi: Kobiri zasiliva zitatu; mkazi wakupiringana pyaka makumatanthatu pyakubalwa: Kobiri zasiliva khumi.

⁸Ngakhala munthu adadumbirayo ngwakutcherenga pyakwanga mwakuti hanakwanisa tayu kupagali konta ya nsiku na nsiku adzeswe kuna nyansembe, tenepo nyansembeyo anatchithisa kontayo malingana na pinakwanisa kupipagali munthuyo.

⁹Ngakhala kudumbirako nkhwa nyama yakutambirwa kukhala nsembe kuna MBUYA, tenepo mitukwa yonsene yaperekwa kuna MBUYA njakupambulika.

¹⁰Munthu adadumbirayo mbaleke chinjisa nyamayo na inango. Angachita tenepo nyama zonsene ziwiri nsa MBUYA.

¹¹Mbwenye ngakhala kudumbirako nkhwa nyama yokhonda chena, pontho yokhonda tawiriswa kukhala nsembe kuna MBUYA, munthuyo akwate nyamayo kwenda nayo kuna nyansembe.

¹²Nyansembe alonge konta ya nyamayo malingana na udidi, penu kuipa m'maso kwa nyamayo, tenepo kontache inakhala yonthoyo.

¹³Ngakhala mwenechiroyo anafuna kuiombola, iye athema kupereka konta yonthoyo pontho chachishanu cha kontache kuthimizirapo.

¹⁴Ngakhala munthu anapambulira nyumbache kuna MBUYA, nyansembe ailonge kontache malingana na udidi penu kuipa kwa nyumbayo. Konta inafuna kulonga nyansembe ikhale yonthoyo.

¹⁵Ngakhala nyakupambulira nyumbayo kuna MBUYA anafuna kuti aiombole, iye athema kupagali konta yalonga nyansembeyo pontho chachishanu cha kontache kuthimizirapo.

¹⁶Ngakhala munthu anapambulira munda ubodzi pa mindache kuna MBUYA, kontache ilongwe malingana na kuinjipa kwa mbewu zidabzala iye m'mundamo pakuchita kulengesa kuti: barele wakulemera makilogramu makumawiri ndi sasawa na kobiri zasiliva khumi.

¹⁷Ngakhala iye aupambulira sindzidzi nkhumala chaka chakubwezera, munda wenewu upagali kontache yonsene yamumphu.

¹⁸Ngakhala iye aupambulira uku chaka chakubwezera chagwanda kale, pontho papita pyaka pingasi, nyansembe alonge kontache malingana na pyaka pyasalira mbachidzati fika chaka chakubwezera, tenepo kontache inakhala yakutchitha.

¹⁹Ngakhala munthu adapambulira mundayo anafuna kuti auombole, iye athema kupagali kontache pontho chachishanu cha kontache kuthimizirapo.

²⁰Ngakhala anaugulisa na munthu unango mbakhonda chakutoma kuuombola m'manja mwa MBUYA, iye ataya mwayi wakuuombola.

²¹Chaka chakubwezera chingafika mundawo unakhala wakupambulirwa monsene mwene kuna MBUYA; tenepo unakhala wa anyansembe.

²²Ngakhala munthu apambulira kuna MBUYA munda udachita iye kugula,

²³nyansembe aulonge kontache malingana na pyaka pyasalirapyo mbachidzati fika chaka chakubwezera, pontho munthuyo apereke kobirizo nsiku yonthoyo; kobirizo zinakhala za MBUYA.

²⁴Chaka chakubwezera chingafika, mundawo unabwerera kuna mwenechiro wakutoma, penu kuna pidzukulu pyache.

²⁵Konta yonsene yathema kukhala malingana na mdida ukhaphatiswa basa ndzidzi wenewo.

²⁶Mwana wautombo wa nyama ngwa MBUYA na kale ene, natenepo munthu aleke pambulira yeneyi kuna MBUYA ninga chakupereka chakuperekwa na kufuna kwache. Mwanamphulu, mwanabira na mwanambuzi mphya MBUYA,

²⁷mbwenye mwana wautombo wa nyama yokhonda chena mwenechiro anakwanisa kuiombola malingana na konta ya nyamayo, pontho chachishanu cha kontache kuthimizirapo. Ngakhala mwenechiro nee anafuna kuiombola tayu, iguliswe kuna anthu anango pakonta ikhaphatiswa basa ndzidzi wenewo.

²⁸Ngakhala munthu anafuna kupambulira monsene mwene[12] chinthu chache kuna MBUYA, penu munthu, nyama, munda udamsiyira makolo ache, chathema nee kuguliswa penu kuombolwa tayu; chonsene chakupambulirwa kuna MBUYA ntchakuchena pyakwanga pamaso pache.

²⁹Nkhabe munthu wakupambulirwa kuna MBUYA athema kuombolwa tayu; iye athema kuphiwa basi.

³⁰Chakhumi chonsene cha pya munda, penu ndi mapira penu nsapo mphya MBUYA. Ipyo mphyakuchena kuna MBUYA.

³¹Ngakhala mwenechiroyo anafuna kuombola chinthu chachecho, iye athema kupereka kobiri malingana na konta ya chinthucho pontho chachishanu cha kontache kuthimizirapo.

³²Chachikhumi cha pifuyo pyonsene ntcha MBUYA. Nyama zingalengeswa, yachikhumi yonsene nja MBUYA.

³³Mwenechiro pifuyo mbaleke kusankhula zadidi kusiya zakupupwa, pontho mbaleke kuchinjisa tayu. Ngakhala iye anazichinjisa nyama inango na inango, nyama zonsene ziwirizo zinakhala za MBUYA, pontho mbaleke kuziombola.

³⁴Enewa ndi matongero adapereka MBUYA kuna Mose paphiri ya Sinai kuti Aisraele aateweze.