Read cisena LEVITIKO 3 Bible Online

LEVITIKO 3 - cisena bible

LEVITIKO 3

¹Munthu onsene angapereka ng'ombe kuti ikhale nsembe yachiphatizano, iyo yathema kukhala ng'ombe imuna penu ikazi yakusowa chilema.

²Munthuyo athema kusanjika manjache pamsolo wa nyamayo mbaicheka pamsuwo wa Chikhumbi cha Mulungu. Tenepo ana a Aroni, anyansembe, awazire chiropa m'makhundu onsene a guwayo,

³pontho apereke mapindi anango kuna MBUYA ninga nsembe yakusasanywa na moto. Mapindiwo mbawa: mafuta onsene akukukutiza pya m'mimba,

⁴nswikira na mafutache ene, na khundu yadidiletu ya fafa.

⁵Anyansembe anapyereza pyonsenepi paguwa yansembe pabodzi pene na nsembe yakupyerera yakusasanywa na moto. Khwemache imbamkomera MBUYA.

⁶Ngakhala bira penu mbuzi inaperekwa ninga nsembe yachiphatizano, inakwanisa kukhala ikazi, penu imuna, mbwenye ikhale yakusowa chilema.

⁷Ngakhala munthu anapereka mwanabira, iye athema kumpereka pamaso pa MBUYA,

⁸iye asanjike manjache pamsolo wa nyamayo mbaicheka kunkhope kwa Chikhumbi cha Mulungu. Anyansembe awazire chiropa cha nyamayo m'makhundu onsene a guwa yansembe,

⁹pontho apereke mapindi anango kuna MBUYA ninga nsembe yakusasanywa na moto. Mapindiwo mbawa: mafutache, mafuta onsene akumchira kwache achifupi na golokolo, mafuta onsene akukukutiza pya m'mimba,

¹⁰nswikira na mafutache ene pontho na khundu yadidiletu ya fafa.

¹¹Nyansembe apyereze pyonsenepyo ninga nsembe yakusasanywa na moto yakuperekwa kuna MBUYA.

¹²Ngakhala munthu anapereka mbuzi, iye athema kuipereka pamaso pa MBUYA.

¹³Iye athema kusanjika manjache pamsolo wa nyamayo mbaichekera kunkhope kwa Chikhumbi cha Mulungu. Anyansembe awazire chiropacho m'makhundu onsene a guwayo,

¹⁴na kupereka kuna MBUYA mapindi awa ninga nsembe yakusasanywa na moto: mafuta onsene akukukutiza pya m'mimba,

¹⁵nswikira na mafutache ene, pontho na khundu yadidiletu ya fafa.

¹⁶Nyansembe anapipyereza pyonsenepi paguwa ninga nsembe yakusasanywa na moto. Khwemache imbamkomera MBUYA. Mafuta onsene nga MBUYA.

¹⁷Munthu onsene wa dzinza ya Israele athema nee kudya mafuta penu chiropa tayu; kuna anthu onsene a dzinza ya Israele wenewu ukhali mwambo wawo kuti aukoye kwenda na kwenda konsene kunakhala iwo.