Read cisena LEVITIKO 4 Bible Online

LEVITIKO 4 - cisena bible

LEVITIKO 4

¹MBUYA adapanga Mose

²kulonga kuna Aisraele kuti munthu onsene anadawa na kuswa matongero a MBUYA mwasusudewuyo athema kuteweza matongero awa:

³Ngakhala adawa ndi Nyansembe Wamkulu kudzesa kudawa pakati pa anthu, iye athema kupereka nsembe mwanamphulu wamamuna wakusowa chilema kuna MBUYA, thangwi ya kudawa kwache.

⁴Iye athema kudza na ng'ombeyo kumsuwo kwa Chikhumbi cha Mulungu, asanjike manjache pamsolo wa nyamayo na kuicheka penepo pamaso pa MBUYA.

⁵Kubuluka penepo Nyansembe Wamkulu akwate chiropa pang'ono cha ng'ombe imuna kwenda nacho m'Chikhumbi cha Mulungu.

⁶Iye athema kuvika chala chache m'chiropamo mbawazira chiropacho kanomwe kunkhope kwa chinguwo chakutchinga nacho Mbuto Yakuchenesesa.

⁷Kubuluka penepo akwate chiropa pang'ono mbachitswinga panyanga za guwa yakufukizirapo pyakununkhira ile ili m'Chikhumbimo. Iye athema kukwata chiropa chakusaliracho mbakachikhuthulira pansi pa guwa yakuperekapo nsembe zakupyerera, ile ili pamsuwo wa Chikhumbi chile.

⁸Iye abuluse mafuta onsene a nyama yakulekerera nayo pyakudawa kutomera mafuta a pya m'mimba,

⁹nswikira na mafutache ene na khundu yadidiletu ya fafa.

¹⁰Nyansembe akwate mafutawa mbaapyereza paguwa yansembe zakupyerera ninga mumbachitira iye na mafuta a nyama yakuperekwa nsembe yachiphatizano.

¹¹Mbwenye iye akwate nthembe, nyama, msolo, miyendo, matumbo na pinango pyonsene pya m'mimba.

¹²Kwenda napyo kunja kwa msasa kumbuto yakuchena pamaso pa Mulungu kule kumbatayirwa dotha. Kweneko iye anakapipisa pamoto wa nkhuni.

¹³Ngakhala ndi dzinza yonsene ya Israele yadawa mwasusudewu pakuswa matongero abodzi a MBUYA mbapikhonda dziwika,

¹⁴tenepo sindzidzi kudawa kule nkhudziwika, dzinza yonsene yathema kudza na mwanamphulu wamamuna kukhala nsembe yakulekerera pyakudawa. Iwo adze nayo ku Chikhumbi cha Mulungu;

¹⁵akadamu a Aisraele asanjike manjawo pamsolo wa mwanamphuluyo mbamcheka pamaso pa MBUYA.

¹⁶Nyansembe Wamkulu athema kukwata chiropa pang'ono cha ng'ombe ile kwenda nacho m'Chikhumbi mule,

¹⁷avike chala chache m'chiropamo mbachiwaza kanomwe pamaso pa MBUYA kunkhope kwa chinguwo chakutchinga nacho Mbuto Yakuchena.

¹⁸Iye atswinge pontho chiropa pang'ono panyanga zakukhala m'nkhomo mwa guwa yakufukizirapo pyakununkhira m'bwalo mwa Chikhumbicho. Pontho chiropa chakusalira chonsene achikhuthulire pansi pa guwa yakuperekapo nsembe zakupyerera, ile ili pamsuwo wa Chikhumbi cha Mulungu.

¹⁹Kubuluka penepo akwate mafuta onsene a nyama ile mbaapisa paguwa yansembe.

²⁰Iye athema kuchita chibodzi-bodzi na ng'ombe yeneyi ninga mumbachitira iye na ng'ombe yakuperekwa nsembe kulekerera pyakudawa, pontho na njira yeneyi iye anasasanya nsembe yakulekerera pyakudawa pya anthu, tenepo anthuwo analekererwa pyakudawa pyawo.

²¹Kubuluka penepo iye akwate nyama ile mbaenda nayo kunja kwa msasa mbakaipisa ninga mumbapisira iye ng'ombe yakuperekwa thangwi ya kudawa kwache. Yeneyi ndi nsembe yakulekerera pyakudawa pya dzinza yonsene.

²²Ngakhala anadawa ndi mkadamu pakuswa matongero abodzi a MBUYA mwasusudewu,

²³sindzidzi kudawa kule nkhudziwika, iye athema kudza na mbuzi imuna yakusowa chilema kukhala nsembe.

²⁴Iye athema kusanjika manjache pamsolo wa mbuziyo mbaicheka kukhundu yakumpoto kwa guwa, kumbachikerwa nsembe zakupyerera kule. Yeneyi ndi nsembe yakulekerera pyakudawa.

²⁵Nyansembe avike chala chache m'chiropa cha nyamayo mbachitswinga panyanga zankhomo za guwa yakuperekapo nsembe zakupyerera na kukhuthulira chiropa chonsene chakusaliracho pansi pa guwa yansembe.

²⁶Kubuluka penepo iye apyereze mafuta onsene paguwapo ninga mumbapyerezera iye mafuta a nyama zakupherwa nsembe yachiphatizano. Na njira yeneyi nyansembe anapereka nsembe thangwi ya kudawa kwa mkadamuyo, tenepo iye analekererwa.

²⁷Ngakhala anadawa ndi mbodzi wa anthu ene pyawo pakuswa matongero abodzi a MBUYA mwasusudewu,

²⁸sindzidzi kudawako nkhudziwika, iye athema kudza na mbuzi ikazi yakusowa chilema kukhala nsembe thangwi ya kudawa kwache.

²⁹Iye athema kuikha manjache pamsolo wa mbuziyo mbaicheka kukhundu yakumpoto kwa guwayo, kumbachekerwa nsembe zakupyerera kule.

³⁰Nyansembe athema kuvika chala chache m'chiropa cha nyama ile mbachitswinga panyanga zankhomo za guwa yansembe mbakhuthulira chiropa chonsene chakusaliracho pansi pa guwayo.

³¹Kubuluka penepo iye abuluse mafuta onsene ninga mumbachitira iye na nyama zonsene zakupherwa nsembe yachiphatizano, tenepo iye athema kuipyereza paguwa, towera khwemache ikomere MBUYA. Na njira yeneyi nyansembe anapereka nsembe thangwi ya kudawa kwa munthu, tenepo iye analekererwa.

³²Ngakhala munthu anadza na bira kuti akhale nsembe yakulekerera pyakudawa, birayo athema kukhala wamkazi wakusowa chilema.

³³Iye athema kusanjika manjache pamsolo wa birayo mbamcheka kukhundu yakumpoto kwa guwa, kumbachekerwa nsembe zakupyerera kule.

³⁴Nyansembe athema kuvika chala chache m'chiropa cha nyamayo mbachitswinga panyanga zankhomo za guwa mbakhuthulira pansi pa guwa chiropa chonsene chakusaliracho.

³⁵Kubuluka penepo iye athema kubulusa mafuta onsene a nyamayo ninga mumbabulusirwa mafuta a bira wakupherwa kukhala nsembe yachiphatizano, tenepo iye athema kuipyereza paguwa pabodzi pene na pyakupereka pya mapira pyakuperekwa kuna MBUYA. Na njira yeneyi nyansembeyo anapereka nsembe thangwi ya kudawa kwa munthu, tenepo munthuyo analekererwa.