Read cisena LEVITIKO 5 Bible Online

LEVITIKO 5 - cisena bible

LEVITIKO 5

¹Nsembe zakulekerera pyakudawa zimbafunwa pamiseru ninga ishi: Ngakhala munthu achemerwa na nyakutonga kuthando ya miseru kuti akapereke umboni, mbwenye mbakhonda longa pya pinthu pidaona iye, penu kupiva, munthu weneyo athema kuoneswa nyatwa.

²Ngakhala munthu anakhuya mwasusudewu chinthu chokhonda chena pamaso pa Mulungu ninga nyama yakufa yokha, weneyo ngokhonda chena, pontho ngwakudawa sindzidzi iye nkhudzindikira pyachita iyepyo.

³Ngakhala munthu anaphata mwasusudewu chinthu chonsene chakukhonda chena cha munthu, penu ntchinthu chanji, iye ngwakudawa sindzidzi nkhudzindikira pyachita iyepyo.

⁴Ngakhala munthu anadumbira kwene pyache mwamsobwe, penu chikhale chadidi penu chakuipa, iye ngwakudawa sindzidzi iye nkhudzindikira pyachita iyepyo.

⁵Munthu angadawa athema kubweka pyakudawa pyache,

⁶tenepo kuti apagali pyakudawa pyachepyo, iye athema kudza na bira wamkazi, pontho mbuzi kuna MBUYA kukhala nsembe yakulekerera pyakudawa. Nyansembe athema kupereka nsembe ile, thangwi ya kudawa kwa munthuyo.

⁷Ngakhala munthuyo ndi mtcherengi mwakuti hanakwanisa tayu kugumana bira, penu mbuzi, iye athema kudza na majiwa mawiri, penu nkhangaiwa ziwiri dzapereka kuna MBUYA kupagali kudawa kwacheko. Mbalame ibodziyo inaperekwa ninga nsembe yakulekerera pyakudawa, inangomboyo inaperekwa ninga nsembe yakupyerera.

⁸Iye athema kudza nazo kuna nyansembe, ule chakutoma anapereka ibodzi ninga nsembe yakulekerera pyakudawa. Iye anapotokola khosi ya mbalameyo, kwache aleke kuigwanda msolo.

⁹Pontho anawazira chiropa chache pang'ono m'khundu mwa guwa. Chiropa chonsene chakusalira chinakhuthulirwa pansi pa guwa yansembe. Yeneyi ndi nsembe yakulekerera pyakudawa.

¹⁰Kubuluka penepo iye athema kupereka mbalame yachiwiri ile ninga nsembe yakupyerera malingana na mwambo wache. Na njira yeneyi nyansembe anapereka nsembe thangwi ya kudawa kwa munthu, tenepo munthuyo analekererwa.

¹¹Ngakhala munthu ndi mtcherengi mwakuti hanakwanisa kugumana majiwa mawiri, penu nkhangaiwa ziwiri tayu, iye athema kudza na ufa wakulemera kilogramu ibodzi dzapereka kuna MBUYA ninga nsembe yakulekerera pyakudawa. Iye aleke kuikhamo mafuta aolivi, penu pyakununkhira, thangwi ndi nsembe yakulekerera pyakudawa, nee kuti ndi chakupereka cha mapira tayu.

¹²Iye athema kudza napyo kuna nyansembe, ule anautapa kwene wakudzala m'manja ninga chidzindikiro kuti pyonsene pyaperekwa kuna MBUYA, tenepo iye anapipisa paguwa padzulu pa nsembe zakusasanywa na moto. Yeneyi ndi nsembe yakulekerera pyakudawa.

¹³Na njira yeneyi nyansembe anapereka nsembe thangwi ya kudawa kwa munthu, tenepo iye analekererwa. Ufa onsene wakusalira ukhale wa nyansembe ninga mumbachitirwa chakupereka cha mapira.

¹⁴MBUYA adathimiza kulonga kuna Mose:

¹⁵Ngakhala munthu anadawa mwasusudewu pakukhonda pereka pinthu pyakupambulika pya MBUYA, iye athema kudza na bira wamkazi penu mbuzi yakusowa chilema ninga nsembe yakupagali MBUYA. Kontache yathema kukhala yakuthemerana na mdida ukhaphatiswa basa ndzidzi wenewo.

¹⁶Iye athema kupagali pinthu pidachimwana iye kupereka pontho apagali chachishanu cha kontache chakuthimizirapo. Iye athema kupereka kuna nyansembe, nyansembembo anapereka nyama ile ninga nsembe yakulekerera pyakudawa pya munthu, tenepo munthuyo analekererwa.

¹⁷Ngakhala munthu adawa mwasusudewu pakuswa matongero abodzi a MBUYA, iye ngwakudawa, pontho athema kupagali kudawa kwacheko.

¹⁸Iye athema kudza na bira wamamuna penu mbuzi yakusowa chilema kuna nyansembe ninga nsembe yakupagalira pyakudawa. Kontache yathema kukhala yakuthemerana na mdida ukhaphatiswa basa ndzidzi wenewo. Nyansembe athema kupereka nsembe ile thangwi ya kudawa mwasusudewu kwa munthuyo, tenepo iye analekererwa.

¹⁹Yeneyi ndi nsembe yakupagalira pyakudawa pidachita munthu kuna MBUYA.