Read cisena LEVITIKO 7 Bible Online

LEVITIKO 7 - cisena bible

LEVITIKO 7

¹Ufu ndi mwambo wa nsembe zakupagalira pyakudawa; zile nsakuchena pyakwanga.

²Nyama yakuperekwa kupagalira pyakudawa yathema kuchekerwa kukhundu yakumpoto kwa guwa, kumbachekerwa nyama zakuperekwa nsembe yakupyerera kule. Chiropa chache chathema kuwazirwa m'makhundu onsene a guwayo.

³Mafutache onsene athema kubuluswa na kuperekwa paguwa yansembe: mafuta a kumchira, mafuta a pya m'mimba,

⁴nswikira na mafutache ene, pontho na khundu yadidiletu ya fafa.

⁵Nyansembe athema kuotcha mafuta onsene paguwa ninga nsembe yakusasanywa na moto kuna MBUYA. Yeneyi ndi nsembe yakupagalira pyakudawa.

⁶Mamuna onsene wa m'banja ya unyansembe anakwanisa kuidya, kwache yathema kudyerwa m'mbuto yakupambulika thangwi njakuchenesesa.

⁷Mwambo ontho-onthowo umbalonga pya nsembe zakulekerera pyakudawa na nsembe zakupagalira pyakudawa: Nyamayo imbakhala ya nyansembe anapereka nsembeyo.

⁸Nthembe ya nyama yakuperekwa ninga nsembe yakupyerera nja nyansembe anapereka nsembeyo.

⁹Chakupereka cha mapira chonsene chakuphikirwa muuvuni, m'mphendekali, penu m'chiwaya, chenecho ntcha nyansembe anachipereka kuna Mulungu ule.

¹⁰Mbwenye chakupereka chonsene cha mapira, penu chavungazwa kale na mafuta, penu njakuuma, penepyo mphya ana onsene a Aroni nyansembe, pontho athema kupigawana sasawa.

¹¹Ufu ndi mwambo wa nsembe zachiphatizano zinakwanisa munthu kupereka kuna MBUYA:

¹²Ngakhala munthu anapereka nsembe yachiphatizano ninga nsembe yakupereka takhuta kuna Mulungu, iye athema kupereka pabodzi pene na nyama yakuperekwa nsembe, chakupereka cha mkate wakusowa chakufufumisira: penu mkate wakukhala na ntchindu ikulu wakusasanywa na ufa wakuvungazwa na mafuta aolivi, penu pitumbuwa pyakukhwazwa mafuta aolivi, penu mikate yakutapira pyakwanga yakusasanywa na ufa wadidiletu wakumunywa mwadidi na mafuta aolivi.

¹³Kuthimizira pa nsembe yache yachiphatizano, iye athema kupereka mikate yakukhala na chakufufumisira.

¹⁴Iye athema kupereka khundu ibodzi ya mtundu onsene wa mikate ninga chakupereka chakupambulika kuna MBUYA. Nsembe yeneyo nja nyansembe, ule anakwata chiropa cha nyama mbachiwazira kuguwa yansembe.

¹⁵Nyama yakuperekwa nsembe yathema kudyiwa nsiku yontho inaperekwa iyo, pontho ileke siyiwa na pang'ono pene kuti ifike mangwana mwache na machibese.

¹⁶Ngakhala munthu unango anadza na nsembe yachiphatizano kuchitisa kuti kudumbira kwache kukwane-kwane, penu ndi nsembe ene yakupereka na kufuna kwache, yonseneyo munakwanisa kuidya nsiku yontho inaperekwa nsembeyo, kwache ingasalira munakwanisa kuidya pontho mangwana mwache.

¹⁷Nyama yonsene yakusalira pa nsembeyo kufikirana nsiku yachitatu, yeneyo yathema kupiswa pamoto.

¹⁸Ngakhala nyamayo inadyiwa pansiku yachitatu, Mulungu nkhabe tawira munthu apereka nsembeyo tayu. Nsembeyo hinawerengerwa tayu, pontho inayeswa yokhonda chena mwakuti munthu onsene wakudya nyama yeneyo athema kuoneswa nyatwa.

¹⁹Ngakhala nyama yakhuyana na chinthu chinango chakukhonda chena pamaso pa Mulungu, nyama yeneyo mbileke dyiwa, mbwenye yathema kupiswa pamoto. Munthu onsene wakuchena pamaso pa Mulungu anakwanisa kudya nyamayo,

²⁰mbwenye ngakhala munthu okhonda chena anadya nyama yeneyi, iye nkhabeve dzayeswa mbodzi wa anthu a Mulungu tayu.

²¹Pontho, ngakhala munthu anadya nyama ya nsembe yeneyi uku abuluka pakuphata pinthu pyakukhonda chena pya munthu penu pya nyama, iye nkhabeve dzayeswa mbodzi wa anthu a Mulungu tayu.

²²MBUYA adapanga Mose

²³kulonga kuna Aisraele kuti mafuta a ng'ombe, bira penu mbuzi aleke kudyiwa.

²⁴Mafuta a nyama yakufa yokha penu yakuchita kuphiwa na nyama zam'tsanga aleke kudyiwa, mbwenye munakwanisa kuaphatisa basa inango ene inafuna imwe.

²⁵Ngakhala munthu anadya mafuta a nyama yakuperekwa nsembe kuna MBUYA yakusasanywa na moto, iye nkhabe kuyeswa mbodzi wa anthu a Mulungu tayu.

²⁶Munthu wa dzinza ya Israele, penu akhale pyache kupi, aleke kudya chiropa cha nyama penu mbalame.

²⁷Munthu onsene anaswa mwambo wenewu, iye nkhabeve dzayeswa mbodzi wa anthu a Mulungu tayu.

²⁸MBUYA adapanga Mose

²⁹kulonga kuna Aisraele kuti munthu onsene anapereka nsembe yachiphatizano athema kudza na khundu ibodzi ya nsembeyo ninga mtukwa wakupambulika kuna MBUYA,

³⁰kudza nayo yekha ene m'manja mwache ninga nsembe yakusasanywa na moto. Iye athema kudza na mafuta a nyamayo pabodzi pene na chidali, tenepo apipereke ninga mtukwa wakupambulika pyakwanga kuna MBUYA.

³¹Nyansembe athema kupyererza mafutache paguwa yansembe, mbwenye chidali chikhale cha nyansembe.

³²Mwendo wakunduli wa kumadyo wa nyama uperekwe ninga msonkha-msonkha

³³kuna nyansembe, anapereka chiropa na mafuta a nsembe yachiphatizano ile.

³⁴Chidali cha nyamayo ndi mtukwa wakupambulika, pontho mwendo wakunduli wa kumadyo wa nyamayo ndi msonkha-msonkha wakupambulika ule wakwata MBUYA kubulukira kuna Aisraele na kupipereka kuna anyansembe. Penepi ndiye pinafuna kupereka Aisraele kuna anyansembe mifendu yonsene inadzayo.

³⁵Yeneyi ndi khundu ibodzi ya nsembe yakusasanywa na moto yakuperekwa kuna MBUYA, chile chidapaswa Aroni na anache pansiku idadzozwa iwo unyansembe.

³⁶Pansiku yeneyo MBUYA adapanga Aisraele kuti iwo athema kupasa anyansembewa khundu yeneyi ya nsembe. Wenewu ndi mwambo kuti Aisraele auvere mifendu yonsene inadzayo.

³⁷Tenepo wenewu ndi mwambo wa nsembe zakupyerera, pyakupereka pya mapira, nsembe zakulekerera pyakudawa, nsembe zakupagalira pyakudawa, nsembe zakudzoza nazo, na nsembe zachiphatizano.

³⁸Paphiri ya Sinai m'thando yatchetcha mule, MBUYA adapereka mwambo wenewu kuna Mose pansiku idapanga iye Aisraele kupereka nsembe zawo.