Read cisena LEVITIKO 8 Bible Online

LEVITIKO 8 - cisena bible

LEVITIKO 8

¹MBUYA adalonga kuna Mose mbati,

²“Ukwate Aroni na anache achimuna udze nawo pamsuwo wa Chikhumbi changa, udze pontho na nguwo za unyansembe, mafuta akudzoza nawo, mwanamphulu wamamuna kukhala nsembe yakulekerera pyakudawa, mabira amuna awiri na chitundu cha mikate yakusowa chakufufumisira.

³Kubuluka penepo uchemere dzinza yonsene ya Israele kugumanyikana penepo.”

⁴Mose adachitadi ninga mudampangira MBUYA, tenepo pidagumanyikana anthu ale,

⁵Mose adalonga kuna iwo mbati, “Chinthu chinafuna ine kuchita pano, ntchinthu chidandipanga MBUYA kuti ndichichite.”

⁶Mose adadza na Aroni na anache achimuna patsogolo mbaasambisa.

⁷Iye adakwata mayala na mkhanjo mbavazika Aroni, pontho na kummanga mthimbalimba m'chuno mwache. Adamvazika pontho efodi mbachimangirira m'chuno mwache na bande yakuchita kulukwa mwaluso.

⁸Iye adamvazika pontho chapagangafuwa mbaikha m'bwalo mwachemo Urimu na Tumimu.

⁹Iye adamvazika nduwira mumsolo mwache, mbaifekereza kutsogolo kwa nduwira chinthu chagolidi, chidzindikiro chakuonesa kupambulika kwache, ninga mudampangira MBUYA.

¹⁰Tenepo Mose adakwata mafuta akudzoza nawo Aroni, mbaikha pa Chikhumbi cha Mulungu na pyonsene pikhali mwenemo, tenepo na njira yeneyi adachitisa pyonsene kukhala pyakupambulika kuna MBUYA.

¹¹Iye adakwata mafuta pang'ono mbaawaza kanomwe paguwa yansembe na pyombo pyache pyonsene, paphande na thako yache ene, towera pikhale pyakupambulika kuna MBUYA.

¹²Iye adadzoza Aroni pakuchita kumkhuthulira mafuta pang'ono mumsolo mwache.

¹³Kubuluka penepo Mose adadza na ana achimuna a Aroni patsogolo mbaavazika mayala na mthimbalimba m'chuno mwawo mbaavazika pontho kamdedzi mumsolo mwawo ninga mudampangira MBUYA.

¹⁴Kubuluka penepo Mose adadza na mwanamphulu wamamuna kuti akhale nsembe yakulekerera pyakudawa, tenepo Aroni na anache adasanjika manjawo pamsolo wa nyamayo.

¹⁵Mose adaicheka nyamayo mbakwata chiropa pang'ono mbachitswinga panyanga za guwa yansembe na chala chache kuti ikhale yakupambulika. Kubuluka penepo adakwata chiropa chonsene chakusaliracho mbachikhuthulira pansi pa guwa yansembe. Na njira yeneyi adaichenesa na kuipambula.

¹⁶Mose adakwata mafuta akukukutiza pya m'mimba, khundu yadidiletu ya fafa na nswikira ziwiri na mafutache ene mbapipyereza pyonsene paguwa yansembe.

¹⁷Iye adakwata nyama yonsene yakusalira ile, kuthimizapo nthembe, mnofu na matumbo ache ene kunja kwa msasa ninga mukhadampangira MBUYA.

¹⁸Kubuluka penepo Mose adadza na bira wamamuna kuti akhale nsembe yakupyerera, tenepo Aroni na anache adasanjika manjawo pamsolo pa birayo.

¹⁹Mose adaicheka mbakwata chiropa chache mbachiwaza m'makhundu onsene manayi a guwa.

²⁰Iye adakwata birayo mbaigwanda-gwanda m'mapindi; adatsuka pya m'mimba pyache na miyendo yache yakunduli na madzi, mbapisa msolo, mafuta na pyonsene pyakusalira pya nyama ile ninga mudatongera MBUYA. Yeneyi ndi nsembe yakupyerera yakusasanywa na moto yakuperekwa kuna MBUYA; khwemache imbamkomera.

²²Kubuluka penepo Mose adadza pontho na bira unango wamamuna kuti akhale nsembe yakudzoza nayo unyansembe. Tenepo Aroni na anache achimuna adasanjika manjawo pamsolo pabirayo.

²³Mose adaicheka mbakwata chiropa chache pang'ono mbachitswinga pansi kukhutu ya madyo ya Aroni, pachikhatho cha manjache yamadyo, pontho na pachala chache chikulu cha dzinyalo yache yamadyo.

²⁴Tenepo iye adadza na ana a Aroni patsogolo mbaatswinga chiropa chile pansi kukhutu yawo ya madyo, pachikhatho cha dzanjawo yamadyo, pontho na pachala chawo chikulu cha dzinyalo yawo yamadyo. Tenepo Mose adakwata chiropa chakusalira chile mbachiwazira m'makhundu manayi a guwa yansembe.

²⁵Iye adakwata mafuta a nyamache, mafuta a kumchira, mafuta akukukutiza pya m'mimba, khundu yadidiletu ya fafa, nswikira ziwiri na mafutache, na mwendo wakunduli wamadyo.

²⁶Tenepo iye adakwata mkate kubulukira m'chitundu cha mikate yakusowa chakufufumisira yakuperekwa kuna MBUYA, mkate ubodzi wakuphikwa na mafuta, pontho na chitumbuwa chibodzi mbapisanjika padzulu pa mafuta na mwendo wakunduli ule.

²⁷Iye adaikha pyakudyapi m'manja mwa Aroni na anache, tenepo iwo adapipereka kuna MBUYA ninga mtukwa wakupambulika.

²⁸Kubuluka penepo Mose adakwata pyakudya pikhali na iwo pile mbapipisa paguwa yansembe padzulu pa nsembe yakupyererayo thangwi iyo ikhali nsembe yakudzoza nayo. Yeneyi ndi nsembe yakusasanywa na moto, pontho khwemache imbamkomera MBUYA.

²⁹Kubuluka penepo Mose adakwata chidali cha bira weneyu mbachipereka ninga mtukwa wakupambulika kuna MBUYA. Phindi yeneyi ya bira wakuchita naye mwambo wakudzoza nja Mose. Mose adachita pyonsene ninga mudampangira MBUYA.

³⁰Mose adakwata mafuta akudzoza nawo pang'ono na chiropa pang'ono chikhali paguwa chile mbachiwazira pana Aroni na anache achimuna na panguwo zawo zene. Na njira yeneyi adachitisa Aroni na anache na nguwo zawo zene kukhala pyakupambulika.

³¹Mose adalonga kuna Aroni na anache mbati, “Kwatani nyamayi muende nayo pamsuwo wa Chikhumbi cha Mulungu mukaitereke mbuidyere ponthopo pabodzi na mikate ili m'chitundu cha nsembe yakudzoza nayo ile ninga mwalongera MBUYA.

³²Pingasala, penu mkate penu ndi nyama mupipise pamoto.

³³Lekani kubuluka pamsuwo wa Chikhumbi cha Mulungu nsiku zinomwe mpakana nsiku za kudzozwa kwanu zimale.

³⁴MBUYA adatipanga kuti tichite pyachita ife leropi, towera abuluse pyakudawa pyanu.

³⁵Imwe mwathema kukhala pamsuwo wa Chikhumbi cha Mulungu nsiku zinomwe mosiku na masikati kuchita pidakupangani MBUYA. Mungakhonda kupichita munati mufe. Penepi ndiye pyandipanga MBUYA.”

³⁶Natenepo Aroni na anache adaphata pyonsene pidaapanga MBUYA kudzera muna Mose.