Read cisena LEVITIKO 9 Bible Online

LEVITIKO 9 - cisena bible

LEVITIKO 9

¹Pidamala nsiku zakudzozwa kwa Aroni na anache achimuna, mangwana mwache, Mose adachemera Aroni na anache pontho na akadamu a Aisraele.

²Iye adalonga kuna Aroni mbati, “Kwata mwanamphulu wamamuna na bira wamamuna wakusowa chilema, upereke nsembe kuna MBUYA. Mwanamphuluyo akhale nsembe yakulekerera pyakudawa, pontho birayo akhale nsembe yakupyerera.

³Tenepo upange Aisraele kuti apikwatire okha ene mbuzi imuna kuti ikhale nsembe yakulekerera pyakudawa, mwanamphulu wakukwanisa chaka chibodzi, na mwanabira wakukwanisa chaka chibodzi. Onsenewa akhale akusowa chilema kuti akhale nsembe yakupyerera;

⁴pontho ng'ombe imuna na bira wamamuna kuti pikhale nsembe yachiphatizano. Iwo apereke nsembe kuna MBUYA pabodzi pene na chakupereka cha mapira akuvungazwa na mafuta. Iwo achite tenepo, thangwi MBUYA anati aonekere kuna iwo lero.”

⁵Iwo adadza patsogolo pa Chikhumbi cha Mulungu na pinthu pyonsene pidaapanga Mose, tenepo dzinza yonsene idagumanyikana kweneko kupembedza MBUYA.

⁶Mose adalonga mbati, “MBUYA akupangani kuti muchite pyonsenepi towera demelero ya MBUYA ionekere kuna imwe.”

⁷Tenepo iye adalonga kuna Aroni mbati, “Ndokoni paguwa yansembeyo mupereke nsembe yakulekerera pyakudawa na nsembe yakupyerera kuti zibuluse pyakudawa pyako na pya anthu. Perekani nsembe yeneyi kulekerera pyakudawa pya anthu ninga mudalongera MBUYA.”

⁸Aroni adenda paguwa pale mbacheka mwanamphulu wamamuna, ule akhali nsembe yakulekerera pyakudawa pyache.

⁹Anache adamdzesera chiropa, iye adavika chala chache m'chiropa mule mbatswinga nyanga za guwa yansembe. Chiropa chonsene chakusalira chile adachikhuthulira pansi pa guwayo.

¹⁰Tenepo iye adapyereza paguwa pale mafuta, nswikira na khundu yadidiletu ya fafa ninga montho mudalongera MBUYA kuna Mose.

¹¹Mbwenye nyamache na nthembe yache adapipisira kunja kwa msasa.

¹²Iye adacheka nyama, ile ikhali yache kuti apereke nsembe yakupyerera. Anache adamdzesera chiropa, iye mbachiwaza m'makhundu onsene anayi a guwa.

¹³Iwo adampasira msolo na mapindi anango a nyama ile, mbapyereza pyonsene pile paguwa yansembe.

¹⁴Kubuluka penepo adatsuka pya m'mimba pyonsene na miyendo yakunduli mbapyereza paguwa yansembe padzulu pa nsembe yonsene yakupyerera.

¹⁵Pidamala iye penepyo, adaperekambo pyakupereka pya anthu. Iye adakwata mbuzi ikhafuna perekwa thangwi ya pyakudawa pya anthu ile. Iye adaicheka mbaipereka nsembe ninga mudachitira iye na nsembe yakulekerera pyakudawa pyache.

¹⁶Iye adadza pontho na nyama kuti ikhale nsembe yakupyerera, tenepo adaiperekadi mwakuteweza mwambo.

¹⁷Iye adapereka chakupereka cha mapira mbakwata ufa wakudzala m'manja mbaupisa paguwa. Penepi pikhali pyakuthimizira nsembe zakupyerera za nsiku na nsiku.

¹⁸Iye adacheka ng'ombe na bira wamamuna wakuperekwa na anthu kukhala nsembe yachiphatizano. Anache adamdzesera chiropa iye mbachiwaza m'makhundu onsene anayi a guwa.

¹⁹Aroni adakwata mafuta a nyama ya ng'ombe na bira ule,

²⁰mbapiikha padzulu pa pidali pya nyama zile mbapithukula pyonsene kwenda napyo paguwa yansembe. Iye adapyereza mafuta ale paguwapo

²¹mbapereka pidali na mwendo wakunduli wamadyo ule ninga mtukwa wakupambulika kuna MBUYA kuti ukhale wa anyansembe, ninga mudalongera Mose.

²²Pidamala Aroni kupereka nsembe zonsene, adaimira mbakwiza manjache m'dzulu mbaatsanzayisa anthu, tenepo iye adatchitha pansikada za guwa.

²³Mose na Aroni adapita m'Chikhumbi cha Mulungu. Pidabuluka iwo panja, adatsanzayisa anthu ale, tenepo demelero ya MBUYA idaonekera kuna anthu onsene.

²⁴Penepo MBUYA adatumiza moto kunyekesa nsembe yakupyerera na mafuta ene paguwayo. Pidaona anthu penepi, onsene adakhuwa mbalamba.