Read cisena YEREMIA 1 Bible Online

YEREMIA 1 - cisena bible

YEREMIA 1

¹Awa ndi mafala adalonga Yeremia mwana Hilikia, nyansembe wa muluwani ya Anatoti m'nthemba ya Benjemani.

²MBUYA adalonga kuna Yeremia chaka chakhumi na chitatu, ndzidzi ukhali Yosia mwana Amoni mfumu wa Yuda,

³mbalonga pontho kuna iye ndzidzi ukhali Yehoiakimu mwanache Yosia mfumu wa Yuda. Kubuluka penepo MBUYA adalonga kuna iye kazinji kene, mpakana chaka chakhumi na chibodzi cha utongi kwa Zedekia mwana Yosia. Mwezi wachishanu chaka chonthocho anthu a ku Yerusalemu adakwatwa kwenda kudziko ya unyaperezo.

⁴MBUYA adalonga kuna ine mbati,

⁵“Ine mbindidzati kukuumba m'mimba mwa mako, ine ndidakudziwa[1] kale, pontho iwe mbudzati balwa, ine ndidakupambula; ine ndidakusankhula kuti ukhale mprofeti kuna madzinza.”

⁶Ine ndidatawira kuti, “Waa! MBUYA Mulungu, ine nkhabe dziwa kulonga tayu, podi ine ndine mwana ene pyanga.”

⁷Mbwenye MBUYA adalonga kuna ine mbati, “Leka longa kuti, ‘Ndine mwana ene pyanga.’ Iwe wathema kwenda kuna munthu onsene kunakutuma ineko, pontho kalonga pyonsene pene pinakutonga inepyo.

⁸Leka chita nawo mantha, thangwi ine ndili nawe mbandikutchinjiriza. Ndalonga ndine MBUYA.”

⁹Tenepo MBUYA adafuthula dzanjache mbakhuya milomo yanga mbalonga kuna ine mbati, “Chinchino ndaikha m'kanwa mwako mafala athema iwe kalonga.

¹⁰Yang'ana, lero ndikukupasa utongi pana madzinza na maufumu, kudula na kugwisa kwene, kuvunga na kufudza kwene, kumanga na kubzala kwene.”

¹¹MBUYA adandivunza mbati, “Ayi Yeremia, ukuonanji?” Ine ndidatawira kuti, “Ndikuona nthambi ya muti waalimondi.”

¹²MBUYA adalonga kuna ine mbati, “Ndimomwene iwe hudaphophonye tayu, thangwi ine ndinaonesesa[2] kuti mafalanga akwana-kwana.”

¹³Tenepo MBUYA adalonga pontho kuna ine mbati, “Ninji chinaona iwe?” Ine ndidatawira kuti, “Ndikuona chikalango chikuperuka kumpoto, tenepo icho chapendamira kuno.”

¹⁴Iye adalonga kuna ine mbati, “Kubulukira kumpoto kuvungika kunabwera pana anthu onsene ambakhala m'dziko yeneyi ale.

¹⁵Ine ndili chifupi kuchemeresa anthu onsene a m'maufumu akumpoto. Ndalonga ndine MBUYA. “Mafumu anabwera mbaikha mipando yawo m'misuwo ya mzinda wa Yerusalemu mbazungulira mafufu ache; iwo anamanga misasa kuzungulira mpandache onsene, pontho na maluwani onsene a Yuda.

¹⁶Ine ndinalalika pya kutchunyusa kunafuna ine dzachita pana anthu anga, thangwi ya kudawika kwawo pakundikhonda; iwo afukiza pyakununkhira kuna milungu inango, pontho apembedza pinthu pyasasanya manjawo.

¹⁷“Yeremia, sasanyika! Ndoko kapange anthu pyonsene pinakutonga ine. Leka chita nawo mantha, mwinango ine ene ndinakuchitisa kuchita mantha pikulu pene ndzidzi una iwe pakati pawo.

¹⁸Lero ndakuchitisa kukhala ninga mzinda wakutchingwa na mpanda, mzati wasimbi, pontho mpanda wankuwa kuimisana na dziko yonseneyi, kuimisana na mafumu a Yuda, mathubu ache, a nyansembe ache na anthu onsene a dziko yeneyi.

¹⁹Iwo anathimbana nawe, kwache iwo nkhabe dzakukunda tayu, thangwi ine ndili nawe kukutchinjiriza. Ndalonga ndine MBUYA.”