Read cisena YEREMIA 10 Bible Online

YEREMIA 10 - cisena bible

YEREMIA 10

¹Aisraele, veserani pinalonga MBUYA Mulungu kuna imwe.

²MBUYA akulonga kuti, “Lekani tsanzira makhaliro a madzinza anango, penu kuchita mantha na pidzindikiro pinaoneka kuthambopi, podi kwene kuti madzinza anango akugoswerwa napyo.

³Thangwi mitemo ya madzinza anango njakusowa basa; iwo ambagwanda muti mumsitu, tenepo nyakusema ambausema na ntchemu.

⁴Iwo ambauthemesera na siliva pontho golidi, ambaukhoma na nyundo pontho mapedego, towera uleke limbuka.

⁵Ninga dzimunthu wakuthuswira mbalame m'munda wa makaka, mifanikizo yawo nkhabe kwanisa kulonga. Iyo yathema kuthukulwa heya-heya, thangwi iyo nkhabe kwanisa kufamba. Lekani kuigopa; thangwi iyo nkhabe kuchita chakugoswa penu chadidi tayu.”

⁶MBUYA, nkhabe unango ninga imwe; imwe ndimwe wamkulu, pontho dzinanu njamphamvu pyakwanga.

⁷Mbani athema khonda kukugopani, imwe mfumu wa madzinza? Penepi mphinthu pyakukuthemerani. Pakati pa anyanzeru onsene m'madziko onsene, pontho m'maufumu mwawo onsene nkhabemo unango ninga imwe.

⁸Onsene ngakusowa nzeru pontho mapupwe; ninji chinafuna iwo kufunza kuna pinthu pyakusasanywa na muti?

⁹Imbakukutizwa na siliva wa ku Tarisisi, pontho na golidi wa ku Ufazi. Kubuluka penepo pinthu pyasasanya nyakusema-sema na nyakufula ntovepi, pimbavazikwa nguwo zachoza na zamsuzi wanyemba; pyonsenepi mphyakusasanywa na amuna aluso.

¹⁰Mbwenye MBUYA ndi Mulungu wakuonadi; iye ndi Mulungu wamoyo, mfumu wakwenda na kwenda. Iye angazhangali dziko yapansi imbatetemera. Madzinza nkhabe kwanisa kupirira na ukali wache tayu.

¹¹Ndapangwa kulonga kuna anthu kuti: “Milungu yeneyi, ile hidasasanye thambo pontho dziko yapansi, inavungwa. Iyo nkhabe dzakhalave padziko yapansi, penu pansi pa thambo tayu.”

¹²Na mphamvu zache MBUYA adasasanya dziko yapansi; iye adatanda dziko yapansi na nzeru zache, pontho na udziwisi wache iye adafuthula thambo.

¹³Iye angadima madzi a kudzulu[10] ambavunduka; iye ambachitisa makole kukwira kudzulu kubulukira kumadolomero a dziko yapansi. Iye ambatumiza njazi pabodzi pene na mvula, mbafungulira mphepo kubulukira m'masubi mwayo. Iye ambatumiza njazi pabodzi pene na mvula, mbafungulira mphepo m'masubi mumbaikoya iye.

¹⁴Munthu onsene nkhabe nzeru, pontho nkhabe udziwisi tayu; nyakufula golidi onsene akuchita manyadzo na mifanikizo yasasanya iye ile. Milungu yasasanya iye njakupupwa; iyo nkhabe na muya ene tayu.

¹⁵Iyo njakusowa basa, pinthu pyakupasa ntchekwa; iyo inati ivungwe nsiku inafuna MBUYA dzatonga mseru.

¹⁶Iye ule ndi Mulungu wa Yakobo hadakhale ninga penepi tayu; thangwi iye ndiye nyakusasanya pinthu pyonsene, pontho iye adasankhula Israele kukhala dzinzache ene. MBUYA Wamphamvu zonsene ndiye dzinache.

¹⁷Mangani mitolo yanu kubuluka m'dziko muno, thangwi imwe mwazungulirwa na anyamalwa.

¹⁸Thangwi MBUYA akulonga kuti, “Pandzidzi uno ndinaponyera kunja anyakukhala m'dziko yeneyi; ine ndinadzesa nyatwa pana iwo, towera onsene amale phatwa.”

¹⁹Dzedze kuna ine thangwi ya kukuwazika kwanga! Chironda changa nkhabe kwanisa kupola tayu. Ande, ndidalonga ndekha ene kuti: Utendanga ngwenewu, ine ndathema kupirira nawo!

²⁰Khumbi yanga yamala vungwa; nkhambala zache zamala gwandika. Ananga amala kundithawa, pontho nkhabe na mbodzi ene asala tayu, nee mbodzi asala kuimisa khumbi yanga; penu kundimangira kambuto kakubisaliramo.

²¹Akadamu athu nkhabe nzeru, pontho iwo nkhabe vunza nzeru kuna MBUYA tayu; ndi thangwi yache pinthu pyawo nkhabe kuafambira mwadidi tayu, pontho anthu amala balalika ninga mabira.

²²Veserani! Mbiri yaveka guduu, chimpiningu chikulu chikudza kubulukira kumpoto. Chinasandusa mizinda ya Yuda kukhala madembe, mbuto yakubisaliramo matika.

²³MBUYA, ine ndikupidziwa kuti moyo wa munthu si wache ene tayu; yekha ene munthu nkhabe utongi na moyo wache tayu.

²⁴Ndisumululeni MBUYA, kwache mwachilungamo nee mwakundituzulira maso tayu, gopesera munandisiyiratu nee pinthu tayu.

²⁵Khuthulirani ukali wanu pana madzinza ambakhonda kukudziwani ale, pana anthu ambakhonda chemera kuna imwe ale, thangwi iwo avunga dzinzanu Yakobo mbamala fudza dziko yache monsene mwene.