Read cisena YEREMIA 11 Bible Online

YEREMIA 11 - cisena bible

YEREMIA 11

¹MBUYA adalonga kuna ine Yeremia mbati,

²“Vesera kuna matongero akulonga pya chiverano, pontho ndoko kaapange anthu akukhala mu Yuda na Yerusalemu.

³Kalonge kuna iwo kuti MBUYA Mulungu wa Israele akulonga tenepa: Nyadzedze ngule anakhonda vera matongero akulonga pya chiveranochi,

⁴matongero adatonga ine makolo anu ndzidzi ukhabuluka iwo m'dziko ya Iguputo, dzenje yakunyungulusiramo utale ile. Ine ndidalonga kuti: Ndivereni mbamuchita pyonsene pinakutongani ine. Tenepo imwe munakhala anthu anga, inembo mbandikhala Mulungu wanu.

⁵Tenepo ine ndinachitisa kudumbira kudachita ine kuna makolo anu kule kukwana-kwana kuti ndinaapasa dziko yamphonje, dziko ile njawo ene na lero.” Ine ndidatawira kuti, “Ande, MBUYA, ndimomwene.”

⁶MBUYA adalonga kuna ine mbati, “Lalika mafala onsenewa m'maluwani a Yuda na m'misewu ya Yerusalemu: ‘Veserani matongero akulonga pya chiveranochi mbamuateweze.

⁷Kubulukira ndzidzi udabulusa ine makolo anu m'dziko ya Iguputo kufikirana lero, ine kazinji kene ndidaacheuza kuti andivere.

⁸Kwache iwo hadavesere penu kupiikha konta tayu; m'mbuto mwache adateweza pinthu pikhafuna mtimawo wakuuma pontho wakuipa ule. Natenepo ine ndidadzesa dzedze yonsene yalongwa mwenemoyi pana iwo, thangwi ya kukhonda vera chiverano chidasasanya ine na iwo chile.’ ”

⁹Kubuluka penepo MBUYA adalonga kuna ine mbati, “Pana upandu ule unasasanya anthu a ku Yuda na ale ene ambakhala mu Yerusalemu kuuchita.

¹⁰Iwo abwerera pontho kuna pyakudawa pikhachita makolo awo, ale adakhonda kuchita pidatonga ine pile. Iwo ambatumikira na kupembedza milungu inango. Anthu a ku Israele na ku Yuda ene onsene aswa chiverano chidasasanya ine na makolo awo chile.

¹¹Natenepo ine MBUYA ndikuacheuza kuti ndinadzesa pana iwo muliri wakuti iwo nkhabe kwanisa kuuthawa kwache tayu. Podi kwene kuti iwo alire kuna ine, ine nkhabe dzaavesera tayu.

¹²Tenepo anthu a ku Yuda na a ku Yerusalemu anaenda mbakalira kuna milungu imbafukiza iwo pyakununkhira ile, kwache iyo nkhabe dzaaphedza na pang'ono pene tayu, muliri ungaagwera.

¹³Anthu a ku Yuda ana milungu mizinji pyakwanga ninga kuinjipa kwachita mizindawo, pontho anthu a ku Yerusalemu amanga maguwa ansembe mazinji pyakwanga ninga kuinjipa kwachita misewu ya mu Yerusalemu kuti aperekerepo nsembe kuna Baala, milungu yakunyansayi.

¹⁴“Yeremia, leka pemphera penu kudembetera kuna ine m'mbuto mwa anthu enewa, thangwi ine nkhabe dzaavesera tayu, iwo angandichemera ndzidzi unakhala iwo panyatwa.”

¹⁵MBUYA akulonga kuti, “Ayi anthu apamtimanga akuchitanji m'Nyumba mwanga podi adachita pyakuipa pyakwanga? Ayi nsembe za nyama zakupambulirwa kuna ine nkhukwanisa kumbombowesa ukali wanga pana iwo? Ndzidzi umbachita imwe pyakuipa, penepo imwe mumbakomerwa.

¹⁶“Kalene ine MBUYA ndidakuchemerani muti waolivi, ule ukhali na nsapo zakubalika pyakwanga. Kwache na uviya-viya wa chonzi, iye anaigasa moto, tenepo nthambi zache zinamala pyerera.

¹⁷“MBUYA Wamphamvu zonsene adakubzalani ule, aikha muliri pana imwe, thangwi anthu a ku Yerusalemu na Yuda achita pinthu pyakuipa mbandizhangalisa pakufukiza pyakununkhira kuna milungu Baala.”

¹⁸MBUYA adandicheuza papinthu pyakuipa pikhasasanya anyamalwanga kupichita kuna ine pile.

¹⁹Ine ndikhali ninga bira wakufulika kwenda kachekwa; ine sidadziwe na chinthu chene tayu pya pinthu pidasasanya iwo kupichita kuna ine. Iwo akhalonga mbati, “Tendeni tivunge muti na nsapo zache zene; tendeni timgwande kumbulusa m'dziko ya anyamoyo, towera dzinache ileke dzakumbukwave.”

²⁰Mbwenye MBUYA Wamphamvu zonsene, mtongi wachilungamo, ule ambayesa mtima na manyerezero, mbandikuoneni mukubwezera anthu enewa thangwi m'manja mwanu, ine ndatula pyonsene.

²¹Natenepo MBUYA alonga tenepa pya anthu a ku Anatoti, ale akusaka-saka moyo wanga mbati, “Ife tinati tikuphe ngakhala unathimiza kulonga mphangwa zakubulukira kuna MBUYA.”

²²Natenepo MBUYA Wamphamvu zonsene akulonga kuti, “Ine ndinati ndiatchunyuse! Aphale awo anafa pankhondo, anawo achimuna na achikazi ene anafa thangwi ya njala.

²³Pakati pawo nkhabe dzasalave munthu na mbodzi ene na moyo tayu, thangwi ine ndinadzesa muliri pana anthu a ku Anatoti ndzidzi unafuna ine dzaatchunyusa ule.”