Read cisena YEREMIA 12 Bible Online

YEREMIA 12 - cisena bible

YEREMIA 12

¹Ndzidzi onsene ndimwe nyakulungama, MBUYA, ndzidzi unadza ine na mseru wanga kuna imwe. Kwache ine ndikufuna kukuvunzani pya chilungamo chanu. Thangwi yache ninji anyakudawika pinthu pyawo pimbaafambira mwadidi? Ninji anyakukhonda khulupirika ambakhala pamtendere?

²Nyakuabzalache ndimwepo, tenepo iwo amera mitsitsi; iwo ambakula mbabala nsapo. Dzinanu nkhabe buluka m'kanwa mwawo tayu, kwache mitimawo ili kutaliletu na imwepo.

³Kwache MBUYA, imwe mumbandidziwa, pimbachita ine, imwe mumbapiona mbamudziwa manyerezero anga. Ambulutheni ninga bira wakwenda kaphiwa! Aikheni pakhundu kudikhira nsiku yakuphiwa kwawo!

⁴Ayi dziko inauma mpakana lini, pontho maudzu anaunyala m'minda mpakana lini? Na thangwi ya kudawika kwa anthu a mwenemo, nyama na mbalame pyamala kufamo. Kuthimiza penepo anthu akulonga kuti, “MBUYA nkhabe kuona tayu pinthu pimbachita ifepi.”[11]

⁵MBUYA adalonga mbati, “Yeremia, ngakhala iwe watopa kuchita bitcha-bitcha yakuthamanga na anthu, apo unakwanisa tani kubitchana na akavalo? Ngakhala iwe unagwegweduka pakuchena, apo unakwanisa tani kufamba mumsitu m'khundu-khundu mwa mkulo wa Yorodani?

⁶Abale ako, anthu a kubanja kwako maka akusandukira; iwo averana pyakukuchita pyakuipa. Leka kuanyindira, podi kwene kuti iwo ambalonga mafala aushamwali.”

⁷MBUYA akulonga kuti, “Anthu anga, ine ndaapasa nkhodolo, ine ndaakhonda anthu anga; ndinapereka m'manja mwa anyamalwanga anthu ambafuna ine ale.

⁸Anthu anga ene asanduka kuna ine ninga nkhalamu mumsitu. Iwo akundikhumbza; natenepo ine ndikuazonda.

⁹Anthu anga akhala ninga mbalame yakuumbikirwa kukhundu zonsene na anyakasenera. Ndoko kachemere nyama zinango zam'tsanga zidye phwando.

¹⁰Akadamu azinji anavunga mundanga wamfesa mbapondedza-pondedza mundanga; mundanga wa mataka akubalisa pinthu iwo anausandusa thando yatchetcha.

¹¹Tenepo unasanduka mbuto yokhonda balisa pinthu, yakulira kuna ine. Dziko yonsene yasanduka thando yatchetcha, pontho nkhabe na mbodzi ene akupitsalakana tayu.

¹²Kubulukira kumapiri onsene akupupwa m'thando yatchetcha anyakuvunga adza. Ine ndatumiza anyankhondo kavunga dziko yonsene; nkhabe munthu na mbodzi ene anakwanisa dzakhala pakupata tayu.

¹³Iwo anabzala tirigu, kwache iwo anavuna ntcheswa; iwo anapitopesa okha ene mbakhonda ganyali napyo. Na thangwi ya ukali wakugoswa wa MBUYA iwo achita manyadzo na pyakuvuna pyawo.”

¹⁴MBUYA akulonga kuti, “Kulonga pya atsanthembanga akudawika ale adapokosera dziko idapasa ine anthu anga, Aisraele, ndinati ndiadule m'dziko mwawo ninga mbewu, pontho ndinapulumusa anthu a ku Yuda m'manja mwawo.

¹⁵Kwache ndingamala kuabulusamo, ndinaavera nsisi mbandibwezera kada munthu pinthu pyache pontho kudziko kwache.

¹⁶Ngakhala iwo anatewera na mtimawo onsene chipembedzo cha anthu anga, pontho mbadumbira na dzina ya MBUYA wamoyo, ninga mudachitira iwo kale kufunzisa ananga kudumbira na dzina ya milungu Baala, penepo iwo anakhazikiswa pakati pa anthu anga.

¹⁷Mbwenye ngakhala dzinza inango pyayo hinandivera tayu, penepo ndinaidula mbandiivunga monsene mwene. Ndalonga ndine MBUYA.”