Read cisena YEREMIA 14 Bible Online

YEREMIA 14 - cisena bible

YEREMIA 14

¹MBUYA adalonga kuna ine, Yeremia, pya njala kuti:

²“Yuda akusintili, mizindache ikusanyika pikulu; iwo apigwisa pansi kusintili, Chiliro chikuveka kubulukira ku Yerusalemu.

³Anyamfuma akutuma anyabasawo katunga madzi; iwo akutsalakatika kwenda kumichera kwache nkhabe gumanako madzi tayu. Iwo akubwerera uku pitomba pyawo pili kakata. Akutaya mtima pontho akusanyika mumtima, amala mpsampsira nkhope zawo.

⁴Mataka amala didimuka thangwi ya kusowa kwa mvula m'dzikomo; anyakulima amala taya mtima mbampsampsira nkhope zawo.

⁵Podi na mbala zene m'minda zikumenya butsu anawo abala iwo kwene, thangwi ya kusowa kwa maudzu.

⁶Mabulu am'tsanga ali njonjolokoto pamapiri akupupwa mbapuma puwe-puwe ninga mwanambwa; na thangwi ya kusowa mpovu, maso awo achita chidima.”

⁷Anthu anga akulira kuti, “Podi kwene kuti pyakudawa pyathu pitipokanye, MBUYA tipulumuseni kuti dzinanu ileke lulupiswa. Kazinji kene ife tabauka kubuluka kuna imwe; ife takudawirani pikulu pene.

⁸Chidikhiro cha Israele ndimwe ene basi; dombo wache pandzidzi wa nyatwa, mwatani munakhala ninga mlendo m'dziko mwathu muno; ninga nyakugwanda pyache wakufuna kwene kugona mosiku ubodzi basi?

⁹Mwatani munakhala ninga munthu wakuchita kututumuswa, ninga nyankhondo wakusowa mphamvu zakupulumusa nazo? Kwache imwe mumbakhala pakati pathu MBUYA, pontho ife tathukula dzinanu, tenepo lekani kutikhonda!”

¹⁰MBUYA akulonga tenepa pya anthu enewa: “Anthu enewa ambakomerwadi kwene na kunzenza, iwo nkhabe pumisa manyalo awo tayu. Tenepo ine MBUYA nkhabe komerwa nawove tayu; chinchino ine ndinati ndiyang'ane kudawika kwawo mbandiatchunyusa thangwi ya pyakudawa pyawo.”

¹¹MBUYA adalonga kuna ine mbati, “Leka pemphera kuti anthu enewa pinthu pyawo piafambire mwadidi.

¹²Podi kwene kuti ambapimana kudya, ine nkhabe dzavesera kulira kwawoko tayu; podi kwene kuti ambapereka nsembe zakupyerera na pyakupereka pinango, ine nkhabe dzapitambira tayu. M'mbuto mwache ndinaapuluza na nkhondo, njala pontho muliri.”

¹³Mbwenye ine ndidatawira kuti, “Waa! MBUYA Mulungu, maprofeti ambalonga kuna anthu kuti, ‘Imwe nkhabe dzaona nkhondo penu dzabonera na njala tayu, thangwi MBUYA adadumbira kuti anakupasani mtendere m'dziko mwanumo kwenda na kwenda.’ ”

¹⁴Tenepo MBUYA adalonga kuna ine mbati, “Maprofeti akulonga mphangwa zakunama pakuphatisa basa dzinanga. Ine sidaatume penu kuasankhula penu kulonga kuna iwo tayu. Iwo akulonga kuna imwe masomphenya akunama; kuombedza kwawo nkhwapezi-pezi, pontho pimbalonga iwo mphya mumsolo mwawo.

¹⁵Natenepo ine MBUYA ndikulonga tenepa pya maprofeti akunama ambaphatisa basa dzinanga ale: Ine sidachite kuatuma tayu, kwache iwo akulonga kuti, ‘Nkhabe nkhondo penu njala pinafuna dzaoneka m'dziko muno tayu.’ Maprofeti onthowa anafa pankhondo pontho na njala.

¹⁶Pontho anthu anapanga iwo mphangwa zakunamazi anafambo pankhondo pontho na njala mbaponywa m'misewu ya Yerusalemu. Panakhala nkhabe na mbodzi ene wakuaikha m'masiye, nee akazawo, nee amunawo penu anawo achikazi tayu. Ine ndinadzesa pana iwo nyatwa zathema iwo kuzitambira zile.

¹⁷“Mafala awa ndiye athema iwe kalonga kuna iwo: Maso anga mbakuke mikulo ya misozi mosiku na masikati onsene; kulirira mwananga wamwali, anthu anga; iwo akuwazwa pikulu pene na shoko yakupha.

¹⁸Ngakhala ine ndinaenda m'dzikomo ndimbaona anthu adachekwa na talasada ale; ngakhala ine ndinaenda mumzindamo, ndimbaona anyakusanyika thangwi ya njala. Onsene, maprofeti na anyansembe ene, ambaphata basawo m'dzikomo, kwache nkhabe dziwa pinachita iwo tayu.”[12]

¹⁹MBUYA, ayi imwe mwachita kumpasiratu nkhodolo Yuda naye dee? Ayi Zioni mwanyansirwa naye? Thangwi yache ninji mwatisanyisa tenepa, towera tichimwane na kuwangiswa kwene? Ife maso akhali kunjira kudikhira mtendere, kwache nkhabe chadidi chaona ife tayu; ife tikhadikhira kuwangiswa, kwache pyadza m'mbuto mwache mphyakugoswa.

²⁰MBUYA, ife tatawira kukudawirani kwathu, pontho kudawa kudachita makolo athu. Ndimomwene ife takudawirani.

²¹Na thangwi ya dzinanu lekani kutilulupisa; lekani chitisa manyadzo mpando wanu wademelero. Kumbukani chiverano chidasasanya imwe na ife chile, pontho lekani kuchiswa.

²²Ayi milungu yakusowa basa pyayo ya madzinzayi nkhukwanisambo kuvumbisa mvula? Ayi thambo payokha ene nkhukwanisa kugwisa mafazi? Nkhabe, ndimwe ene basi, MBUYA Mulungu wathu, ule ambachita penepi. Natenepo chidikhiro chathu chili muna imwe ene basi, thangwi ndimwe adasasanya pinthu pyonsene.