Read cisena YEREMIA 15 Bible Online

YEREMIA 15 - cisena bible

YEREMIA 15

¹Tenepo MBUYA adalonga kuna ine mbati, “Podi kwene Mose, penu Samuele mbadaimira pamaso panga kundidembetera thangwi ya anthu enewa, ine nee mbidaavera nsisi tayu basi. Abuluse pamaso panga. Agwinye aende pyawo.

²Iwo angakuvunza kuti nkhupi kwathema iwo kwenda, apange kuti ine MBUYA ndalonga kuti: Anango athema kufa na utenda, kweneko ndiye kunafuna iwo kwenda! Anango athema kufa pankhondo, kweneko ndiye kunafuna iwo kwenda! Anango athema kufa thangwi ya njala yakugoswa, kweneko ndiye kunafuna iwo kwenda! Anango athema dzaphatwa unyaperezo, kweneko ndiye kunafuna iwo kwenda!

³“Ine MBUYA ndanyerezera kuti nyatwa zakugoswa zinayizi zigwe pana iwo; iwo anaphiwa pankhondo; mitembo yawo inambuluthwa na anambwa; mbalame pontho nyama zam'tsanga zinadya na kuvunga mitembo yawo.

⁴Ine ndinaasandusa chinthu chakugumisa manungo kuna anthu onsene a padziko yapansi, thangwi ya pinthu pidachita Manase mwana Hezekia mu Yerusalemu pikhali iye mfumu wa Yuda.”

⁵MBUYA akulonga kuti, “Mbani anafuna kukuverani nsisi, imwe anthu a ku Yerusalemu? Anafuna kukuliraniyo mbani? Mbani anafuna dzapambuka kuvunza kuti imwe muli tani?

⁶Imwe mwandikhonda mbamubwerera m'nduli ndzidzi onsene. Natenepo ine ndidafuthula mkono wanga kukuvungani; ine ndatopa na kukuverani nsisi.

⁷Ine ndinati ndiapepete na chisero pamsuwo wa mzinda onsene m'dzikomo. Ine ndinati ndivunge anthu anga, mbandipha anawo, thangwi iwo hadasanduze makhaliro awo tayu.

⁸Ndinachitisa amamfelwa kuinjipa pyakwanga kupiringana tchetcha ya pagombe ya bara. Dzuwa ili ngerengende, ndinadzesa chakuvunga kuna amawo a aphale; mwakututumusa ndinadzesa pana iwo kusanyika pontho mantha.

⁹Mama ule adabala ana anomwe akomoka mbaferatu. Cheza kuna ine chasanduka chidima; iye achitiswa manyadzo pontho asanyiswa mtima. Anyakusalira na moyo ndinati ndiaphe na talasada pamaso pa anyamalwawo. Ndalonga ndine MBUYA.”

¹⁰Dzedze kuna ine! Mama, mudandibaliranji, ine munthu ule dziko yonsene ikuthimbana pontho kupokanyisana naye? Ine sidafiyalise penu kufiyali cha munthu tayu, kwache munthu onsene akunditemberera.

¹¹MBUYA adalonga mbati, “Ine ndinati ndikupulumuse kuti uchite basa yadidi; ndinati ndichitise anyamalwako kukudembetera pandzidzi wa nyatwa, pontho na pandzidzi wako wakusanyika.

¹²Ayi munthu ene pyache anakwanisa kuswa simbi, simbi yakubulukira kumpoto, penu nkuwa?

¹³“Ufumi wanu na pinthu pyanu pyonsene ndinati ndipipereke kuna anango mwakukhonda kupagalwi, thangwi ya kudawa kwanu konsene kwachita imwe m'dziko mwanu monsene.

¹⁴Ndinakuchitisani kukhala mabitchu a anyamalwanu m'dziko inakhonda imwe dziwa, thangwi ukali wanga unagaka ninga moto kwenda na kwenda.”

¹⁵Tenepo ine ndidalonga kuti, “MBUYA imwe mukudziwa; ndikumbukeni ine mbamundiyang'anire mwadidi. Bwezerani anyakundisanyisa pontho pirirani nane, pontho lekani tawirisa kuti abuluse moyo wanga; nyerezerani mule mudalulupisirwa ine thangwi ya dzinanu.

¹⁶Ndzidzi udalonga imwe, ine ndidakuveserani, mafalanu adachitisa mtimanga kusekera na kukomerwa monsene mwene; thangwi ine ndathukula dzinanu, MBUYA Mulungu Wamphamvu zonsene.

¹⁷Ine sidakhale gulu ibodzi ene na anyatsenzo; ine sidakomerwe nawo pabodzi pene tayu. Ine ndidakhala pyanga theliyee ndekha ene thangwi mkono wanu ukhali pana ine, mbamundidzaza na kuzhangali kwanu.

¹⁸Thangwi yache ninji ndithimize kuva kupha tenepa? Thangwi yache ninji pironda nkhabe pola tayu? Ayi imwe munafuna pyakunditayisa mtima ninga mkulo wakuuma ndzidzi wa malimwe?”

¹⁹Natenepo MBUYA adalonga mbati, “Ngakhala iwe unazungunukira kuna ine, ine ndinati ndikutambire, tenepo unakhala pontho nyabasanga. Ngakhala iwe unalalika mafala akulungama nee akupupwa tayu, iwe unakhala pontho mprofeti wanga. Anthu enewa ndiye athema kudza kuna iwe, kwache iwe hudatheme kwenda kuna iwo tayu.

²⁰Ine ndinakuchitisa kukhala mpanda kuna anthu enewa, mpanda wamphamvu wankuwa; iwo anamenyana nawe, kwache iwo nkhabe dzakukunda tayu, thangwi ine ndili nawe kukuombola pontho kukupulumusa. Ndalonga ndine MBUYA.

²¹Ndinati ndikupulumuse m'manja mwa anyakudawika pontho ndinati ndikuombole m'manja mwa anyakukala mtima.”