Read cisena YEREMIA 16 Bible Online

YEREMIA 16 - cisena bible

YEREMIA 16

¹Tenepo MBUYA adalonga kuna ine mbati,

²“Iwe hudatheme kusemba na kubala ana achimuna na achikazi kumbuto yeneyi tayu.

³Thangwi MBUYA akulonga pya pinthu pinafuna dzachitika kuna ana achimuna na achikazi akubalwa m'mbuto yeneyi pontho kuna akazi ale mbamama pontho kuna amuna ale mbababa a ana enewa tenepa:

⁴Iwo anati afe na utenda wakugoswa mbapasowa munthu na mbodzi ene wakuasintili penu kuikha m'masiye mitembo yawo. Mitembo yawo inakhala ninga milu ya pinthu pyakutayiwa pakhuku. Iwo anafa pankhondo penu na njala, tenepo mbalame na nyama zam'tsanga pinadya mitembo yawo.”

⁵MBUYA akulonga tenepa: “Iwe hudatheme kupita m'nyumba mule muna maliro tayu; leka kwendako kasintili penu kuonesa kutsukwala. Thangwi ine nkhabe dzatsanzayisa anthu anga na mtendere, penu kuafuna kokhonda mala na kuakomera mtima tayu.

⁶Anyakufuma na anyakutcherenga ene anafa m'dziko yeneyi, kwache panakhala nkhabe munthu na mbodzi ene wakuasintili penu wakuikha m'masiye mitembo yawo tayu. Nkhabe munthu na mbodzi ene anapicheka-cheka, penu kuchinga tsisi kuonesa kusintili tayu.

⁷Nkhabe munthu na mbodzi ene anafuna dzaapasa kudya penu chakumwa kuathondoza anyakusintili ale tayu. Nkhabe munthu na mbodzi ene anava nsisi tayu, nee kuvera nsisi munthu ule ataya babache penu mache tayu.

⁸“Leka pita m'nyumba mule anthu akuchita phwando, penu kukhala pansi kudya na kumwa.

⁹Thangwi MBUYA Wamphamvu zonsene, Mulungu wa Israele akulonga kuti: Ine ndinamatamisa mkhuwo wakukomerwa na kusekera pontho na mkhuwo wakukomerwa kwa anyakukazhali m'mbuto yeneyi. Iwe unati uone na maso ako penepi pikuchitika.

¹⁰“Ungamala kuapanga anthu enewa pinthu pyonsenepi, mbakuvunza kuti, ‘Thangwi yache ninji MBUYA adanyerezera kutitchunyusa mwavinga tenepa? Mseru wache ngwanji wasosa ife? Ayi MBUYA Mulungu wathu tamdawiranji?’

¹¹Penepo kaapange kuti: MBUYA alonga kuti, ‘Ndi thangwi yakuti makolo anu adandikhonda mbapembedza na kutumikira milungu yachilendo. Iwo adandikhonda mbakhonda kuvera matongero anga.

¹²Kwache imwe ndiye mwanyanya kuipa kupiringana makolo anu. Monsenene ndimwe akuuma mtima pontho akuipa; imwe nkhabe kundivera tayu.

¹³Natenepo ine ndinakubulusani m'dziko yeneyi mbandikuendesani kudziko ile chipo nee imwe penu makolo anu adzati kuidziwa tayu. Kweneko imwe munatumikira milungu inango mosiku na masikati, pontho ine nkhabe dzakuverani nsisi tayu.’ ”

¹⁴MBUYA akulonga kuti, “Ndzidzi ukudza unafuna anthu khonda dzalonga pontho kuti, ‘Ndikudumbira na dzina ya MBUYA wamoyo, ule adabulusa Aisraele m'dziko ya Iguputo.’

¹⁵M'mbuto mwache iwo analonga kuti, ‘Ndikudumbira na dzina ya MBUYA wamoyo, ule adabulusa Aisraele m'dziko yakumpoto, pontho pakati pa madziko kudaabalalisira iye kule.’ Ine ndinati ndiabwezere pontho kudziko kwawo, dziko idapasa ine makolo awo ile.”

¹⁶MBUYA akulonga kuti, “Ine ndikutumiza amisiri a nsomba azinji ene kudza dzaphata anthu enewa. Kubuluka penepo ndinatumiza anyakukhulisa azinji ene dzaakhulisa m'mapiri monsene, m'pitunda pontho na kupingolokodyo kwene kwa miyala.

¹⁷Ine ndimbaona pyonsene pimbachita iwo. Ipyo pili pakwecha kuna ine; pyakudawa pyawo nkhabe bisika pamaso panga tayu.

¹⁸Ine ndinaachitisa kupagali kawiri thangwi ya pyakudawa na pyakuipa pyawo, thangwi iwo aswipisa dziko yanga na mifanikizo yakusowa moyo ninga mtembo ile, pontho amala kuidzaza na milungu yakunyansa.”

¹⁹MBUYA, imwe ndimwe mphamvu zanga pontho mpandanga wamphamvu, pakubisala panga pandzidzi wa nyatwa, kuna imwe madzinza akumadolomero a dziko anati adze mbalonga mbati, “Makolo athu chikhali na iwo chene ndi milungu yapezi, mifanikizo yakusowa basa, ile hidaachitire na chinthu chene chadidi tayu.”

²⁰Ayi anthu angapisasanyire okha ene milungu? Ande, kwache iyo ndi mifanikizo ene pyayo.

²¹Natenepo ine ndinati ndiafunzise, kano ndinati ndiadziwise mphamvu na mboko zanga. Penepo iwo anati adziwe kuti dzinanga ndi MBUYA.