Read cisena YEREMIA 17 Bible Online

YEREMIA 17 - cisena bible

YEREMIA 17

¹Pyakudawa pya anthu a ku Yuda pyachita kulembwa pamwala na chakulembera chasimbi; ipyo pyachitwa kulembwa mumtima mwawo na mwala wakusongoka, pontho mbuchita kugobwa m'makhundu a maguwawo ansembe.

²Podi na anawo ene ambapembedza pamaguwa ansembe, pontho na adzimunthu a milungu Ashera pansi pa miti yakuvata na pansonga ya pitunda

³pontho pamapiri m'dzikomo. Ndinachitisa anyamalwanu kukwata mfumanu na pinthu pyanu pyonsene, thangwi ya pyakudawa pyachita imwe m'dziko monsenemu.

⁴Na thangwi ya kudawa kwachita imwe, imwe munati mutaye mfumanu yonsene idakupasani ine ile. Ndinachitisa anyamalwanu dzakuphatani ninga mabitchu kwenda namwe kudziko inakhonda imwe dziwa, thangwi imwe mwagasa ukali wanga ninga moto tenepo unagaka kwenda na kwenda.

⁵MBUYA akulonga kuti, “Dzedze kuna nyakunyindira munthu mnzache, munthu ule mphamvu zache zili muna munthu mnzache, pontho munthu ule abauka kubuluka kuna MBUYA.

⁶Iye anakhala ninga thenthere m'thando yatchetcha; iye nkhabe dzaona pinthu pyache kumfambira mwadidi tayu. Iye anakhala m'mbuto yakusowa madzi m'thando yatchetcha, m'mataka amunyu, kule nkhabe khala munthu na mbodzi ene tayu.

⁷“Mbwenye nyakutsanzaya ngule ambanyindira MBUYA, ule kunyindira kwache konsene kuli muna MBUYA.

⁸Iye anakhala ninga muti wakumera m'khundu-khundu mwa madzi, ule umbafikisa mitsitsi yache mumkulo. Mutiwo nkhabe gopa kupisa kwa dzuwa tayu; ndzidzi onsene masambache ngabithi-bithi. Iwo nkhabe swipa mtima tayu na chaka chakusowa mvula, pontho iwo nkhabe chimwana kubala nsapo tayu.”

⁹“Papyonsene mtima ndiye wakunyenga; iwo nkhabe kwanisa kuwangisika tayu. Mbani anakwanisa kuuvesa mtima wa munthu?

¹⁰Ine MBUYA ndimbasakanyula mtima wa munthu mbandiyesa manyerezero ache, kuti ndimfupe malingana na makhaliro ache pontho malingana na mabasache.”

¹¹Ninga mbalame yakukhalira mazayi ale si ache tayu, ndi sasawa na munthu wakugumana kobiri m'njira zaufaka-faka, Iye anati ataye mfumache yonsene pandzidzi wa uphaleache, pakumalisira pache mbasanduka pupwe.

¹²Nyumba ya Mulungu yakhala ninga mpando wachifumu wademelero, wakukhala pansongalonga paphiri kubulukira pakutomaletu.

¹³MBUYA, chidikhiro cha Israele, anyakukukhondani onsene anachitiswa manyadzo. Anyakubauka kubuluka kuna imwe anafudzwa ninga madzina akulembwa pamataka,[13] thangwi iwo akhonda MBUYA, mphuno ya madzi amoyo.

¹⁴Ndiwangiseni MBUYA, tenepo ine ndinati ndiwangedi; ndipulumuseni, ine ndinati ndipulumukedi, thangwi ndimwe ene basi ambakuza ine ule.

¹⁵Anthu ambalonga basi kuna ine kuti, “Pinthu pidatithuswa MBUYA pile pili kupi? Mbapikwane-kwanetu mphapo!”

¹⁶Ine sidathawe tayu kukhala makabuswa; imwe mukudziwa kuti ine sidafune na pang'ono pene tayu nsiku yakusanyikayi, imwe mumbadziwa pyonsene pimbabuluka pamulomo pangapa.

¹⁷Lekani khala ninga chakugoswa kuna ine; imwe ndimwe pakubisala panga ndzidzi wanga wa nyatwa.

¹⁸Anyakundiboneresa mbachite manyadzo, mbwenye ine lekani kundichitisa manyadzo; iwo mbachite mantha, mbwenye ine lekani tawirisa kuti ndichite mantha. Dzesani nyatwa pana iwo mbamuavunge monsene mwene.

¹⁹MBUYA adalonga kuna ine mbati, “Yeremia ndoko ukalalike mphangwa kuna anthu kumsuwo wa mzinda pale pambapita na kubuluka na mafumu a Yuda. Kubuluka penepo ukaimire pontho pamisuwo inango yonsene ya mzinda wa Yerusalemu.

²⁰Ndoko ukalonge kuti, ‘Veserani mafala a MBUYA, imwe mafumu a Yuda pontho na anthu onsene a ku Yuda na onsene ale ambakhala mu Yerusalemu, ale ambapita na kubuluka na pamisuwo yeneyi.

²¹MBUYA akulonga tenepa: Chitani mphole-mphole kuti muleke thukula na mtolo ene pa Nsiku Yakupuma, penu kupita na kubuluka nawo pamisuwo ya Yerusalemu.

²²Lekani thukula mtolo kubuluka nawo m'nyumba mwanu penu kuphata na basa ene pa Nsiku Yakupuma, mbwenye nsikuyi ikhale yakupambulika kuna imwe ninga montho mudatongera ine makolo anu.

²³Kwache iwo hadandivesere, penu kuikha konta pikhalonga ine pile tayu; iwo akhali akuuma mtima mbakhonda funa kundivesera penu kusumululwa.

²⁴Mbwenye ngakhala imwe munandivera mbamukhonda kuthukula na mtolo ene kupita na kubuluka nawo pamisuwo ya mzindawu pa Nsiku Yakupuma, pontho Nsikuyi mbikhala yakupambulika kuna imwe pakukhonda phata na basa ene pansikuyi,

²⁵penepo mafumu ale anakhala pampando wachifumu wa Davite anabwera na pamisuwo ya mzinda wenewu pabodzi pene na mathubu awo. Iwo na mathubu awo anabwera uku apakira pingolo, pa akavalo, pabodzi pene na amuna a ku Yuda na ale ambakhala mu Yerusalemu; ndzidzi onsene nkhabe dzasowa anthu akukhalamo tayu.

²⁶Anthu anabwera kubulukira kumaluwani a Yuda na kumidzi yakuzungulira Yerusalemu, kunthemba ya Benjemani na m'tchinde mwa mapiri kumadokero dzuwa, kubulukira kudziko ya mapiri na kuthando yatchetcha ya Negebu kudza ku Nyumba ya Mulungu na pyakupereka pyakupyerera, nsembe zakupyerera, nsembe za mapira, pyakufukiza pyakununkhira, pontho na nsembe zakupereka nazo takhuta ku Nyumba ya MBUYA.

²⁷Mbwenye ngakhala imwe munakhonda kundivera pakukhonda chitisa Nsiku Yakupuma kukhala yakupambulika pontho nee thukula tayu na mtolo ene kupita na kubuluka nawo pamisuwo ya Yerusalemu pa Nsiku yeneyi, penepo ine ndinagasa moto okhonda thima m'misuwo ya Yerusalemu, ule unafuna dzapisa nyumba zachifumu monsene mwene.’ ”