Read cisena YEREMIA 18 Bible Online

YEREMIA 18 - cisena bible

YEREMIA 18

¹MBUYA adalonga kuna ine Yeremia mbati,

²“Tchithira kumusa kwa nyakuumba pyombo, kule kunafuna ine kakupanga mphangwa zanga.”

³Natenepo ine ndidenda kumusa kwa nyakuumba pyombo mbandimgumana akuphata basa pachakuumbira chache.

⁴Kwache chitomba chikhaumba iye chile, dongo yache ikhalakatika m'manja mwache; tenepo iye akhachifudza mbaumba chinthu chinango chene ninga mudapifunira iye mwenechiroache.

⁵Tenepo MBUYA adalonga kuna ine mbati,

⁶“Ayi ine sina utongi tayu wakuchita pinafuna ine kuna imwe anthu a ku Israele ninga mwachitira nyakuumba pyomboyi? Imwe muli m'manja mwanga ninga mwachitira dongoyi kukhala m'manja mwa nyakuumba pyombo.

⁷Ngakhala pandzidzi unafuna inewo ndinalonga kuti ufumu penu dzinza wathema kubuluswa, kufudzwa penu kuvungwa,

⁸pontho ngakhala dzinza idacheuza ineyo inaleka pyakudawa pyawo, penepo ine ndinambombowesa ukali wanga mbandikhonda kuaonesa nyatwa ninga montho mukhadapinyerezera ine mule.

⁹Pontho ngakhala pandzidzi unango ndinalonga kuti dzinza penu ufumu wathema kumangwa penu kukhazikiswa,

¹⁰pontho ngakhala anthu anachita pyakuipa pamaso panga mbakhonda kundivera, penepo ine nkhabe dzaachitira udidi ninga montho mudachitira ine mule tayu.

¹¹“Natenepo longa kuna anthu a ku Yuda na ale ambakhala mu Yerusalemu kuti MBUYA alonga tenepa: Yang'anani ine ndikusasanya pyakudzesa nyatwa pana imwe pontho ndikunyerezera pyakukutchunyusani. Tenepo lekani makhaliro anu akuipa pontho munthu onsene wa imwe mbasanduze makhaliro na mabasache akudawika ambaphata iye ale.

¹²“Kwache iwo anati alonge kuti, ‘Nkhabe, tatani kuti tichite tenepo? Ife tinathimiza na makhaliro athuwa mbatiteweza pyathu kuchita pyakuipa pinafuna mtimathu wakuumawu.’ ”

¹³Natenepo MBUYA akulonga kuti, “Kavunze pakati pa madzinzawa: Chipo mbanimbo adatoma kuva chinthu ninga chenechi? Chinthu chakugumisa manungo chachita mwali weneyu Israele!

¹⁴Ayi pamapiri a Lebanoni chipo padatomambo khala pakusowa madzi akuphatana thangwi ya kutonthola? Ayi madzi ache anonono akukuka kubulukira kumadziko akutali chipo adatomambo kupwa?

¹⁵Kwache anthu anga andiduwalira; iwo akufukiza pyakununkhira kuna milungu yakusowa basa, milungu idaagwegwedusa panjira pawo, pontho na m'njira zakaleletu zile. Iye adaachitisa kufamba na m'mikhondo, pontho na njira zokhonda fumbula.

¹⁶Dziko yawo inasanduka madembe, mbuto yakusekesa kwenda na kwenda. Anyakugwanda pyawo onsene na njira adakupusa msolo; iwo anati akupusedi misolo yawo kukusedegula.

¹⁷Ine ndinabalalisa anthu anga pamaso pa anyamalwa ninga fumbi yakumbuluka na mphepo kumabulukiro dzuwa. Ine ndinati ndiapase nkhodolo; ine nkhabe dzaaphedza tayu pandzidzi wawo wa nyatwa.”

¹⁸Anthu adalonga mbati, “Tendeni tisasanye pyakupha Yeremia. Ndzidzi onsene nkhabe dzasowambo anyansembe akutitonga pyakuchita tayu, anthu anzeru kutipanga mwambo, pontho maprofeti kutipanga mphangwa zakubulukira kuna Mulungu. Tenepo tendeni tigumane mathangwi akumsumira nawo, towera tileke ikha konta pinthu pinalonga iyepi.”

¹⁹Natenepo ndidapemphera kuti, “Ngandivesereni MBUYA; veserani pinandilongera anyamalwangapi.

²⁰Ayi pyadidi pyathema bwezerwa na pyakuipa? Kwache iwo andikumbira mulindi kuti ndigweremo. Kumbukani mudaimira ine mule pamaso panu mbandilonga m'mbuto mwawo, towera mumbombowese ukali wanu.

²¹Natenepo chitisani anawo kukulukutika na njala; aperekeni pyawo m'manja mwa anyankhondo. Akazawo mbakhale akusowa ana, pontho asanduke amamfelwa, amuna mbafe na muliri, pontho achiphale mbaphiwe pankhondo.

²²Chiliro mbachiveke m'nyumba zawo ndzidzi unagwisa imwe chimpiningu pana iwo mwakututumusa, thangwi iwo akumba mulindi kuti ndigweremo pontho anditeyera msampha.

²³Mbwenye, imwe mumbadziwa MBUYA pyonsene pinasasanya iwo kuchita kuna ine. Lekani lekerera upandu unafuna iwo chitawu penu kufudza pyakudawa pyawo. Achitiseni kubuluka pamaso panu; mbamuchite kuna iwo pinthu malingana na kuzhangali kwanu.”