Read cisena YEREMIA 2 Bible Online

YEREMIA 2 - cisena bible

YEREMIA 2

¹MBUYA adalonga kuna ine mbati,

²“Ndoko kalalike pamaso pa munthu onsene mu Yerusalemu kuti: Ndikukumbuka kupipereka kwako kuna ine mbuli mphale, kundifuna kwako ninga mwali wakukazhali kwene chinchino; iwe udanditewera m'thando yatchetcha monsene, m'dziko mule mukhali tsanga yokhokha.

³Iwe, Israele, ukhali wakupambulika kuna ine, nsapo zakutoma kucha za mbewu zanga; onsene adakuvunga ale akhali pamseru ukulu, pontho nyatwa zidagwa pana iwo. Ndalonga ndine MBUYA.”

⁴Veserani mphangwa za MBUYA, imwe pidzukulu pya Yakobo, imwe dzinza ya Israele.

⁵MBUYA akulonga tenepa: “Ninji chakudawika chache chidandigumana na makolo anu, chile chidaachitisa kubauka kutali na ine? Iwo adapembedza mifanikizo yapezi-pezi, iwo ene mbasandukambo anthu akusowa basa.

⁶Iwo hadavunze tayu kuti, ‘MBUYA ali kupi, ule adatidzesa kuno kutibulusa kudziko ya Iguputo, mbatitsogolera kugwanda na m'mbuto yakusowa pyakumera, pontho na m'thando yatchetcha na m'maphedi, mbuto yakusowa madzi pontho yamdima[3] wakugoswa, kule nkhabe khala anthu penu na kufambako kwene tayu.’

⁷Ine ndidakudzesani m'dziko yamphonje kuti mudye nsapo na pinthu pyache pyadidi. Kwache imwe mudadza mbamuswipisa dziko yanga, mbamusandusa dziko idakupasani ine ile kukhala yakunyansa.

⁸Anyansembe hadavunze tayu kuti, ‘Ali kupi MBUYA?’ Anyakudziwa pya mwambo maka ale hadandidziwe tayu; anyakutsogolera adandipandukira. Maprofetimbo adalonga pyawo na dzina ya milungu Baala, mbapembedza mifanikizo yakusowa basa.

⁹“Natenepo ine ndinakutonga pontho mseru, ndinatonga mseru pidzukulu pyanu. Ndalonga ndine MBUYA.

¹⁰Wambukirani kuntchuwa ya Kipro[4] mbamukaone, gwinyani munthu ku Kedara mbakaonesese; mukaone ngakhala chipo kudatomambo chitika chinthu ninga ichi:

¹¹Ayi chipo dzinza idatomambo kuchinja milungu yawo, podi kwene kuti iyo si milungu chadi-chadi tayu? Mbwenye anthu anga demelero yawo aichinjisa na mifanikizo yakusowa basa.

¹²Tutumuka napyo penepi, iwe kudzulu mbuphatwe na mantha makulu. Ndalonga ndine MBUYA.

¹³Anthu anga achita pyakudawa pya mtundu uwiri: Iwo andikhonda, ine mphuno ya madzi akupasa moyo, iwo apisasanyira okha ene michera, ile njakubauka pontho nkhabe kwanisa kukoya madzi tayu.

¹⁴Ayi Israele ndi nyabasa penu adabalwa kukhala bitchu? Apo thangwi ninji anyamalwache akumkhulisa?

¹⁵Nkhalamu zabangula, izo zamkhumbzira. Iwo asandusa dziko yache kukhala madembe; maluwani ache apiswa pontho amala thawiwa,

¹⁶Anthumbo a ku Memfisi na Tapanesi akuchitiswa manyadzo pakugogodwa mumsolo.

¹⁷Ayi iwe, Israele, hudapidzesere wekha ene penepi tayu pakukhonda ine, MBUYA Mulungu wako, ndzidzi ukhakutsogolera ine kukuonesa njira?

¹⁸Apo watani unaenda ku Iguputo, kamwa madzi a mumkulo wa Nailo? Thangwi yache ninji unaenda ku Asiria, kamwa madzi a mumkulo wa Yufurate?

¹⁹Pyakudawika pyako pinati pikutchunyuse, pontho unakonwa na kubwerera kwako m'nduli. Toma nyerezera mbudzindikire kuti ntchinthu chakupha pontho chakuipa pyakwanga kuna iwe, kukhonda ine, MBUYA Mulungu wako mbukhonda kundigopa. Ndalonga ndine Mbuya, MBUYA Mulungu Wamphamvu zonsene.”

²⁰MBUYA Mulungu akulonga kuti, “Israele, kale ene iwe udaswa goli-goli mbugwanda nkhambala ninga ng'ombe yakupenga; iwe udalonga kuti, ‘Ine nkhabe kukutumikirani tayu!’ Ande, paphiri yonsene yakulapha, pontho pansi pa muti onsene wakuvata, iwe udagonapo ninga puta.

²¹Ine ndidakubzala ninga mtawi wakupambulika pontho wadidi. Apo udatani kuti usanduke kuna ine mtawi wakuipa pontho wam'tsanga?

²²Podi kwene kuti upichenese wekha ene na dotha, mbuphatisa basa mamina a mtondo azinji, kwache mathotho a pyakuipa asalira basi. Ndalonga ndine MBUYA Mulungu.

²³“Unalonga tani kuti, ‘Ine sidapiswipise ndekha ene tayu; ine sidapembedze milungu Baala tayu’? Yang'ana pinthu pyakuipa pidachita iwe paphedi; nyerezera pya pinthu pyachita iwe. Iwe wakhala ninga ngamila ikazi yakuthamanga pyakwanga uku na uku,

²⁴penu bulu wam'tsanga wakukulitiri na m'thando yatchetcha. Ndzidzi unafuna iye mamuna, mbani anakwanisa kumkhuludza? Ngakhala mamuna anamfuna hambachita kutcherenga naye tayu; iye ndzidzi onsene ambasasanyikiratu kufuna kubebeswa na mamuna.

²⁵Leka kusakaza manyalo ako, penu kuchitisa chikholingo chako kuuma. Kwache iwe udalonga kuti, ‘Nkhabe basa tayu! Ine ndimbafuna kupembedza milungu inango, pontho ndinati ndiiteweredi.’

²⁶“Ninga mumbaselusirwa mbava angaphatwa, sasawambo iwe dzinza ya Israele unaseluswambo, iwo, mafumu awo, na mathubu awo, anyansembe awo na maprofeti awo.

²⁷Iwo ambalonga kuna muti kuti, ‘Iwe ndiwe babanga,’ pontho kuna mwala kuti, ‘Iwe ndiwe nyakundibala.’ Iwo andipasa nkhodolo, mbakhonda kundipasa nkhope zawo; kwache iwo angakhala pa nyatwa, ambalonga kuti, ‘Idzani mutipulumuse!’

²⁸Ili kupi mphapo milungu idapisasanyira iwe ile? Ileke idze ngakhala inakwanisa kukupulumusa ndzidzi unakhala iwe panyatwa! Thangwi iwe una milungu izinji pyakwanga ningambo kuinjipa kwa maluwani ana iwe, Yuda.

²⁹“Thangwi yache ninji ukuchita pinthu pyakupokanyisana na ine? Iwe wandipandukira! Ndalonga ndine MBUYA.

³⁰Ine ndidatchunyusa pezi pene anthu ako; kwache iwo hadaikhe konta kusumululwako tayu. Talasadako idavunga maprofeti ako ninga nkhalamu yaukali.”

³¹Imwe anthu a mfendu uno nyerezerani mafala a MBUYA: “Ayi ine ndakhala ninga thando yatchetcha kuna Israele, penu ninga dziko ya mdima wakugoswa? Thangwi yache ninji anthu anga ambalonga kuti, ‘Ife tina utumbe kuchita pyonsene pinafuna ife; ife nkhabeve pontho kudza kuna imwe tayu.’

³²Ayi mwali ambaduwalira pyakuthemesera napyo manungo ache, penu nyakukazhali kuduwalira pyakuvala pyache? Kwache anthu anga andiduwalira mwakuti nsiku zache nkhabe lengesekave tayu.

³³Iwe ndiwedi nyaluso pakuchita pinthu pyauputa mwakuti na mkazi ene wakuipiratu anakwanisa kufunza kubulukira kuna makhaliro ako akuipa.

³⁴Nguwo zako zina mathotho a chiropa cha atcherengi okhonda dawa, podi kwene kuti iwe nee udaaphate akuswa nyumba tayu. Kwache padzulu pa pyonsenepi,

³⁵iwe umbalonga kuti, ‘Ine ndine nyakukhonda dawa; iye hadandizhangalire tayu.’ Kwache ine ndinakutonga mseru thangwi ya kulonga kuti, ‘Ine sidadawe tayu.’

³⁶Watani unati pedzengwa-pedzengwa, uku unaenda uku unaenda? Iguputo anati akuphatise fuwa ya moto ninga montho mudakuchitira anthu a ku Asiria.

³⁷Iwe unabuluka pambuto yeneyo uku manja ali nama kunkhodolo, thangwi ine, MBUYA, ndakhonda anthu ambanyindira iwe ale; iwo nkhabe dzakuphedza tayu.”