Read cisena YEREMIA 20 Bible Online

YEREMIA 20 - cisena bible

YEREMIA 20

¹Pidava nyansembe Pashuri mwana Imeri, thubu wamkulu wa ku Nyumba ya MBUYA, kuti Yeremia akhadalonga mphangwa zenezi zakubulukira kuna Mulungu,

²iye adatonga kuti mprofeti Yeremia amenywe mbamuikha pamatandadza pa Msuwo Wakumtunda wa Benjemani wa Nyumba ya Mulungu.

³Mangwana mwache na machibese pidamsudzula Pashuri pamatandadza, ine, Yeremia, ndidalonga kuna iye kuti, “MBUYA hadakupase dzina yakuti Pashuri tayu, mbwenye adakupasa dzina yakuti ‘Pyakugoswa konsene kwene.’

⁴Thangwi MBUYA akulonga tenepa: ndinachitisa iwepo kukhala chinthu chakugoswa kuna iwe ene mwenechiroache na kuna ashamwali ako onsene; na maso ako iwe unaaona akufa na talasada ya anyamalwawo. Ndinati ndiapereke Ayuda onsene m'manja mwa mfumu wa ku Babiloni, ule anafuna dzaakwata kwenda nawo ku Babiloni penu kuapha na talasada.

⁵Ndinapereka m'manja mwa anyamalwawo mfuma yonsene ya mumzinda wenewu, pinthu pyonsene pimbasasanywa mwenemu, pinthu pyache pyakufunika pyonsene pontho na mfuma yonsene ya mafumu a Yuda. Iwo anapokosera pinthu pyonsene mbaenda napyo ku Babiloni.

⁶Iwembo Pashuri na anthu onsene a pabanja pako anakwatwa kwenda kudziko ya Babiloni. Kweneko iwe unafa mbuikhwa m'masiye pabodzi pene na ashamwali ako onsene, ale adapanga iwe mphangwa zakunamawa.”

⁷MBUYA, imwe mudandinyengeza, pontho ine ndidanamizwa; imwe mudandikunda mbamundimala mphamvu. Munthu onsene akundisingirira mbandiselusa nsiku yonsene.

⁸Ndzidzi onsene umbalonga ine, ndimbalira kulonga pya kuzunguzika na kuvungika. Mafala a MBUYA andidzesera kutikanwa pontho kuseluswa nsiku yonsene.

⁹Mbwenye ngakhala ndinalonga kuti, “Ine sinamthulave MBUYA, penu kulonga pontho na dzinache tayu,” penepo mafalache ambakhala basi mumtima mwanga ninga moto wakugaka, ninga moto wakufungirwa m'magogodo mwanga. Ine ndatopa na kuukoya m'bwalo mwanga; natenepo ine sinakwanisave na pang'ono pene tayu.

¹⁰Ine ndimbava munthu onsene kulonga chapansipansi kuti, “Pyakugoswa pili kukhundu zonsene. Mpangirireni! Mbatimsumireni kuna atongi!” Ashamwali anga onsene akufuna pyakwanga kuona kugwa kwanga mbalonga mbati, “Mwinango iye anati anyengezwe, tenepo ife tinati timkunde mbatimbwezera.”

¹¹Kwache MBUYA ali nane ninga nyankhondo wamphamvu; tenepo anyakundisanyisa anagwegweduka mbachimwana kundikunda. Iwo anapichimwana mbachita manyadzo pikulu pene; manyadzo awo nkhabeve dzaduwalirwa tayu.

¹²MBUYA Wamphamvu zonsene, nyakuyesa anyakulungama, ule ambaona mtima na manyerezero a munthu, mbandikuoneni mukubwezera pana iwo, thangwi pyonsene ndapitula m'manja mwanu.

¹³Imbirani MBUYA! Mkuzeni MBUYA! Iye ambapulumusa moyo wa anyakusowa m'manja mwa anyakuipa.

¹⁴Mbikhale na dzedze nsiku idabalwa ine, mbileke tsanzayiswa nsiku idandibala mama!

¹⁵Nyadzedze ngule adadza na mphangwa kuna babanga, ule adamchitisa kukomerwa kulonga kuti, “Iwe una mwana, mphale!”

¹⁶Iye mbakhale ninga mizinda ile MBUYA adaivunga mwakukhonda kuva nsisi. Iye mbave chiliro cha kuva kupha na machibese pontho na mkhuwo wa nkhondo na masikati,

¹⁷thangwi iye hadandiphere m'mimba tayu; penepo m'mimba mwa mama mbadakhala masiye anga.

¹⁸Thangwi yache ninji ndidaona kunja kuti ndione kwene nyatwa na kutsukwala, pontho kukhala na moyo wakuchitiswa manyadzo basi?