Read cisena YEREMIA 22 Bible Online

YEREMIA 22 - cisena bible

YEREMIA 22

¹MBUYA akulonga tenepa: Tchithira kunyumba yachifumu ya Yuda mbukalonge mphangwa izi:

²Vesera mafala a MBUYA iwe mfumu wa Yuda, iwe nyakukhala pampando wachifumu wa Davite, iwe, mathubu ako pabodzi pene na anthu ako ale ambapita na kubuluka pamisuwo yeneyi.

³MBUYA akulonga kuti, “Chitani pyakulungama pontho pyakuthema. Pulumusani m'manja mwa nyakupondereza munthu onsene anaberwayo. Lekani vuya penu kupondereza alendo, ana masiye penu amamfelwa, pontho lekani chuchisa chiropa cha anyakukhonda dawa m'dziko yakuchena.

⁴Thangwi imwe mungachita mphole-mphole kuvera matongero enewa; penepo mafumu anakhala pampando wachifumu wa Davite ale anabwera na m'misuwo ya nyumba yachifumuyi, uku apakira pingolo na akavalo, pabodzi pene na mathubu awo pontho anthu awo.

⁵Mbwenye ngakhala munakhonda vera matongero enewa, ine MBUYA ndikudumbira na dzinanga kuti nyumba yachifumuyi inasanduka madembe.”

⁶Thangwi MBUYA akulonga pya nyumba yachifumu ya Yuda kuti, “Podi kwene kuti iwe ukhale pyako ninga Gileadi kuna ine ninga nsonga ya phiri ya Lebanoni, ine ndinati ndikusanduse basi thando yatchetcha, ninga maluwani okhonda khala anthu.

⁷Ndinatumiza anyakuvunga pana iwe, munthu onsene na chida m'manja mwache, tenepo iwo anagwanda-gwanda miti yadidi maka yamkungudza mbaipisa moto.

⁸“Madzinza azinji anagwanda chifupi na mzinda wenewu mbavunzana unango na mwanzache mbati, ‘Thangwi yache ninji MBUYA achita chinthu chenechi kuna mzinda ukulu ninga wenewu?’

⁹Tenepo kutawira kwache kunakhala kwakuti: ‘Thangwi yache njakuti iwo akhonda chiverano chidasasanya iwo na MBUYA Mulungu wawo, pontho apembedza na kutumikira milungu inango.’ ”

¹⁰Lekani kumsintili mfumu, penu kutsukwala thangwi ya imfache; mbwenye lirani pikulu pene thangwi ya ule ali kudziko ya unyaperezo, thangwi iye nkhabe dzabwererave tayu, penu kuponda pontho mataka a m'dziko mwache tayu.

¹¹Thangwi MBUYA akulonga pya Shalumu mwana Yosia, nyakupita m'mbuto mwa babache ninga mfumu wa Yuda, kwache ule aenda pyache kubuluka pano: Iye nkhabe bwererave tayu.

¹²Iye anafera kudziko ya unyaperezo kudendeswa iye kule; iye nkhabe dzapondave mataka a m'dziko yeneyi tayu.

¹³Dzedze kuna nyakumanga nyumbache na njira zokhonda lungama, pontho nyakusasanya masubi ache a padzulu na njira zaufaka-faka, nyakuphatisa bule anthu a m'dziko mwache, mbakhonda kuapagali thangwi ya basa yaphata iwoyo.

¹⁴Iye ambalonga kuti, “Ine ndinati ndimange nyumba yachifumu ikulu, masubi ache a m'dzulu mbakhala na mbuto yakukwana. Tenepo iye ambasasanya mazhanera makulu-makulu, makhundu ache mbaphophamo na mapembo amkungudza mbaathemesera mwadidi na pyakufira.

¹⁵“Ayi kukhala na miti mizinji yamkungudza ndiye pimbakuchitisa kukhala mfumu? Ayi babako hakhali na phoso pontho pyakumwa tayu? Iye adachita pyakulungama pontho pyakuthema, tenepo pyonsene pidamfambira mwadidi.

¹⁶Iye akhaikhira kunduli anyakusowa pontho atcherengi pamiseru, tenepo pyonsene pidamfambira mwadidi. Ayi kundidziwa kumbalongwa kule, si kweneku tayu? Ndalonga ndine MBUYA.

¹⁷Kwache maso anu na mtimanu pimbakomerwa na kuganyali mwaunthawatawa kuchuchisa chiropa cha anyakukhonda dawa, kupondereza pontho kuchita vinga.”

¹⁸Natenepo MBUYA akulonga tenepa pya Yehoiakimu mwana Yosia mfumu wa Yuda: “Iwo nkhabe dzamulira tayu kuti, ‘Mama mbaleanga! Mama nyamainganga ine!’ Iwo nkhabe dzamulira tayu kuti, ‘Mama mbuyanga! Mama demelero yache yaenda!’

¹⁹Iye anaikhwa m'masiye ninga bulu, wakumbuluthwa mbatayiwa kunja kwa mzinda wa Yerusalemu.”

²⁰Imwe anthu a ku Yerusalemu, ndokoni ku Lebanoni mbamukakhuwe, chiliro chanu mbachiveke na kudziko ya Bashani; lirani mu Abarimu thangwi ashamwali anu onsene amala kundwa.

²¹Ine ndidakucheuzani ndzidzi ukhali imwe pakupata, kwache imwe mudalonga kuti, “Ife nkhabe kuvesera tayu!” Enewa ndiye makhaliro anu kutomera uwananu; imwe nee mwandivera tayu.

²²Mphepo inatswaira akadamu onsene, pontho ashamwali anu anakwatwa kwenda kudziko ya unyaperezo. Penepo imwe munachitiswa manyadzo mbamululupiswa, thangwi ya pyakudawika pyanu pyonsene.

²³Imwe anyakukhala mu Lebanoni; ale mumbabisala m'nyumba zakumangwa na miti yamkungudza, munabulira pyakwanga thangwi ya kuva kupha, kuva kupha ninga kwa mkazi wamimba pakubala.

²⁴MBUYA adalonga kuna Yehoiakini mwana Yehoiakimu mfumu wa ku Yuda mbati, “Ine ninga Mulungu wamoyo, podi kwene kuti mbudakhala pyako mphete m'chala changa chamadyo, ine ndikudumbira kuti mbidakudula basi.

²⁵Ine ndinakuikha m'manja mwa anthu anasaka-saka moyo wako ale, anthu anagopa iwe ale, m'manja mwa Nebukadinezara pontho m'manja mwa anthu ache a ku Babiloni.

²⁶Ine ndinakuponyera kunja pabodzi na mako ene nyakukubala ule, kudziko inango, kule nee mbodzi wa imwe adabalirwa kweneko tayu, kweneko monsenene munafa.

²⁷Imwe nkhabe dzabwerera pontho tayu kudziko idatchuwa imwe ile.”

²⁸Ine ndidalonga kuti, “Ayi Yehoiakini weneyu ngule akhondwa, ninga chikalango chakubwededzeka, chinthu chakuti nkhabe na mbodzi ene wakuchifuna tayu? Thangwi yache ninji iye na anache ene aponyerwe kunja, kuponyerwa kudziko inakhonda iwo dziwa?”

²⁹Dzikowe, dzikowe, dzikowe! Vesera mafala analonga MBUYA!

³⁰MBUYA akulonga tenepa: “Lemba kuti munthu weneyo ayesiwe wakusowa ana, munthu ule pinthu pyache pyonsene nkhabe dzamfambira mwadidi tayu. Iye nkhabe dzakhala na chidzukulu na chibodzi chene, ule anafuna dzakhala pampando wachifumu wa Davite, penu dzakhala mtongi mu Yuda tayu.”