Read cisena YEREMIA 23 Bible Online

YEREMIA 23 - cisena bible

YEREMIA 23

¹MBUYA akulonga kuti, “Dzedze kuna amakabuswa ale ambavunga na kubalalisa mabiranga!”

²MBUYA Mulungu wa Israele akulonga kuna amakabuswa, ale ambayang'anira anthu anga mbati, “Na thangwi yakuti imwe mwabalalisa mkumbi wa mabiranga mbamuaendesa m'tsanga kukhonda kuayang'anira, ine ndinati ndikutchunyuseni thangwi ya pyakuipa pyachita imwe. Ndalonga ndine MBUYA.

³Ine ndinagumanyisa anyakusalira na moyo onsene pakati pa mkumbi wanga kubulukira kumadziko kudaabalalisira ine kule, mbandiabwezera kudziko kwawo. Iwo anakhala na ana azinji mbainjipa pyakwanga.

⁴Ine ndinaikha amakabuswa pakati pawo ale anafuna dzaayang'anira mwadidi. Tenepo iwo nkhabe dzachita mantha penu kugopa tayu, penu inango dzatayika tayu.[14] Ndalonga ndine MBUYA.”

⁵MBUYA akulonga kuti, “Ndzidzi ukudza unafuna ine dzasankhula chidzukulu cha Davite kukhala mfumu wakulungama, mfumu ule anatonga na nzeru mbachita pyakulungama pontho pyakuthema m'dziko yonsene.

⁶Pandzidzi wache Yuda anapulumuswa, pontho Israele anakhala pakupata. Ishi ndi dzina inafuna dzachemerwa na iye: ‘MBUYA Chilungamo chathu.’ ”

⁷MBUYA akulonga kuti, “Ndzidzi ukudza ule anthu nkhabe dzadumbirave kuti, ‘Ndinadumbira na dzina ya MBUYA wamoyo, ule adabulusa Aisraele m'dziko ya Iguputo tayu.’

⁸M'mbuto mwache anadumbira kuti, ‘Ndinadumbira na dzina ya MBUYA wamoyo ule adabulusa pidzukulu pya Aisraele m'dziko yakumpoto na kumadziko anango kudaabalalisira iye kule.’ Kweneko iwo anakhala m'dziko yawo ene.”

⁹Kulonga pya maprofeti: Mtimanga ukusanyika; magogodo anga onsene akugedemera. Ine ndakhala ninga nyakuledzera, ninga nyakukhuta vinyu, na thangwi ya MBUYA pontho na mafalache akuchena.

¹⁰Dziko yadzala na maputa; na thangwi ya dzedze dziko yasanduka thando yatchetcha, pontho mpovu m'thando wamala unyala. Maprofeti akuteweza makhaliro awo akuipa, mbakhonda phatisa basa mwadidi chidzo chawo.

¹¹“Maprofeti na anyansembe ene, onsenene mbanthu okhonda gopa Mulungu; podi na m'nyumba mwanga mwene ine ndimbaagumaniza akuchita pyakuipa.

¹²Natenepo njira zawo zinasanduka za mitherezi, pontho anaponyerwa kumdima mbagwako. Ndinadzesa nyatwa pana iwo ndzidzi unafuna ine dzaatchunyusa ule. Ndalonga ndine MBUYA.

¹³“Pakati pa maprofeti a ku Samaria, ine ndaona chinthu chakunyansa ichi: Iwo ambalonga mphangwa zauprofeti na dzina ya milungu Baala mbabausa anthu anga Aisraele.

¹⁴Pakati pa maprofeti a ku Yerusalemu, ndaona chinthu chinango chakugumisa manungo: Iwo ambachita pyauputa; kunama mbakukhala kudya kwawo. Iwo ambaphedza anthu kuchita pyakudawika, towera paleke khala munthu na mbodzi ene wakuleka chita pyakudawa. Kuna ine iwo akhala ninga Sodomu; anthu a ku Yerusalemu akhala ninga Gomora.”

¹⁵Natenepo MBUYA Wamphamvu zonsene akulonga pya maprofeti enewa kuti, “Ine ndinaachitisa kudya pinthu pyakuwawa mbamwa madzi akupha, thangwi kubulukira kuna maprofeti a ku Yerusalemu kukhonda gopa Mulungu kwafalikira kudziko yonsene.”

¹⁶MBUYA Wamphamvu zonsene akulonga kuti, “Lekani vesera mphangwa zauprofeti zinalonga maprofetiwa; kwawo nkhukunamizani kwene basi. Iwo ambalonga masomphenya a mumsolo mwawo, nee kubulukira m'kanwa mwa MBUYA tayu.

¹⁷Iwo nkhabe topa na kulonga kuna anthu ambalulupisa mafalanga ale kuti, ‘MBUYA akulonga tenepa: Imwe munakhala pa mtendere,’ pontho anyakuteweza pikhumbo pyawo ambalonga kuti, ‘Nkhabe chakugoswa chinafuna kudza tayu.’ ”

¹⁸Ine ndidalonga kuti, “Apo mbani wa iwo ateweza uphungu wa MBUYA kuti aone na kuva mafalache? Mbani ava na kuvesera mafalache?

¹⁹Yang'anani, chonzi cha MBUYA, chinaatswaira thangwi ya kuzhangali. Chivumbulu chinadza pamsolo wa anyakudawika.

²⁰Ukali wa MBUYA nkhabe dzasiyiwa kukhala pana iwo tayu, mpakana iye amalise kuchita pinthu pyonsene pinafuna iye. Nsiku zenezo zingafika imwe munapivesa mwadidi.”

²¹MBUYA akulonga kuti, “Maprofeti enewa sidaatume ndine tayu, kwache iwo achita kuthamanga kudza na mphangwa zawo. Ine sidalonge kuna iwo tayu, kwache iwo alonga mphangwa zauprofeti.

²²Mbwenye ngakhala iwo adavesera uphungu wanga, iwo mbadalonga mphangwa zanga kuna anthu anga, pontho mbadachitisa anthu anga kuzungunuka kuleka makhaliro awo akudawika na mabasawo akuipa.

²³“Ayi ine ndine Mulungu wa chifupi ene basi, nee Mulungu wakutali tayu? Ndalonga ndine MBUYA.

²⁴Mbani anakwanisa kubisala pambuto yakubisika pakuti ine sinakwanisa kumuona tayu? Ndalonga ndine MBUYA. Ayi ine sidadzaze kudzulu na padziko ya pansi tayu? Ndalonga ndine MBUYA.

²⁵“Ine ndava mphangwa za maprofeti akunama ale, ambalonga pakuphatisa basa dzinanga. Iwo ambalonga kuti, ‘Ine ndalota! Ndalota ndoto!’

²⁶Ayi analeka lini maprofeti akunama enewa kupeka pinthu penepi mumsolo mwawo, ale ambalonga mphangwa zauprofeti zakunama.

²⁷Iwo ambanyerezera kuti ndoto zimbapangana iwo unango na mwanzache zinachitisa anthu anga kundiduwalira, ninga mudachitira makolo awo kundiduwalira thangwi ya kupembedza milungu Baala.

²⁸Mprofeti ule ana ndoto mulekeni pyache alonge ndoto zache, mbwenye ule ana mphangwa zakubulukira kuna ineyo mulekeni pyache azilonge mwakukhulupirika. Ayi mapira na makupu-kupu chakufunika ninji?

²⁹Ayi mafalanga hadakhale ninga moto tayu? Ayi mafalanga hadakhale ninga nyundo ile imbaswa miyala tayu? Ndalonga ndine MBUYA.

³⁰“Ine ndina mseru na maprofeti, ale ambaberana mphangwa kuna unango na mwanzache khala ninga mphangwazo nsakubulukira kuna ine. Ndalonga ndine MBUYA.

³¹Ande, ndina mseru pontho na ale ambabwebweta mphangwa zawo khala ninga nsakubulukira kuna ine.

³²Veserani pinalonga ine MBUYA. Ine ndina mseru na maprofeti ale ambalonga mphangwa zawo zakunama. Na kunama kwawo pontho na kubwebweta kumbachita iwoko ambabausa anthu anga. Ine sidaatume penu kuatonga kuchita tenepo tayu. Tenepo iwo nkhabe na basa ene kuna anthu tayu. Ndalonga ndine MBUYA.”

³³MBUYA adalonga kuna Yeremia mbati, “Penu ndi mbodzi wa anthu enewa, penu mprofeti, penu nyansembe angakuvunza kuti, ‘Ayi mphangwa zakunensa zakubulukira kuna MBUYA nsipi?’ Avunze kuti, ‘Mphangwa zipizo? Ine ndinakukhondani.’ Ndalonga ndine MBUYA.

³⁴Penu ndi mbodzi wa anthu enewa, penu mprofeti penu nyansembe angalonga kuti, ‘Mphangwa zakunensa zakubulukira kuna MBUYA nsizi,’ Ine ndinati nditchunyuse munthu weneyo na banjache ene.

³⁵Munthu onsene wa imwe ndzidzi onsene ambalonga kuna shamwaliache penu mbaleache mbati, ‘Ayi MBUYA ambatawira tani?’ penu, ‘Ayi MBUYA alonganji?’

³⁶Kwache imwe nee mwathema kulonga pontho, ‘Mphangwa zakunensa zakubulukira kuna MBUYA,’ tayu, thangwi mafalache ene ambalonga munthuwo ambasanduka mphangwa zakubulukira kuna iye ene, natenepo ambadzudzumisa mphangwa zakubulukira kuna Mulungu wamoyo, MBUYA Wamphamvu zonsene, Mulungu wathu.

³⁷Yeremia, iwe wathema kulonga ndzidzi onsene kuna maprofeti kuti, ‘Ayi MBUYA adakutawira tani? Ayi MBUYA alonganji kuna imwe?’

³⁸Podi kwene kuti iwe ulonge kuti, ‘Mphangwa zakunensa zakubulukira kuna MBUYA nsizi, MBUYA alonga tenepa,’ iwe udaphatisa basa mafala akulonga kuti, ‘MBUYA alonga tenepa,’ podi kwene kuti ine ndidakupanga kuti iwe hudatheme kuzilonga tayu kuti, ‘Mphangwa zakunensa zakubulukira kuna MBUYA nsizi.’

³⁹Natenepo ine ndinati ndiaduwalire mbandiaponya kutali na ine ninga mitolo yakunensa, iwo pabodzi pene na mzinda udaapasa ine, pontho kuna makolo awo ule.

⁴⁰Ine ndinakululupisani pikulu pene, pontho ndinakuchitisani manyadzo kwenda na kwenda, pile nkhabe dzaduwalika tayu.”