Read cisena YEREMIA 24 Bible Online

YEREMIA 24 - cisena bible

YEREMIA 24

¹MBUYA andionesa pitundu piwiri pya makuyu pikhali kunkhope kwa Nyumba ya Mulungu pile. Penepi pidachitika pikhadamala Nebukadinezara mfumu wa ku Babiloni kukwata Yehoiakini mwana Yehoiakimu mfumu wa Yuda ninga nyaperezo, kubulukira ku Yerusalemu kwenda naye ku Babiloni pabodzi pene na akadamu a Yuda, anyaluso pa mabasa a manja na amisiri anango ene.

²Chitundu chibodzi chidadzala na makuyu adidi, akutoma kufira ale; chitundu chinangocho chidadzala na nsapo zakuipa, zakuchimwanika na kudyeka kwene.

³Tenepo MBUYA adandivunza mbati, “Ayi, Yeremia ukuonanji?” Ine ndidatawira kuti, “Ndikuona makuyu. Adidiwa ngadidi pyakwanga, pontho akuipawa ngakuipa pyakwanga, akuchimwanika na kudyeka kwene.”

⁴Tenepo MBUYA adalonga kuna ine mbati,

⁵“Ine MBUYA Mulungu wa Israele, ndikulonga tenepa: Anthu akwatwa kwenda kudziko ya unyaperezo ku Babiloni ale, kuna ine akhala ninga makuyu adidiwa.

⁶Ine ndinaayang'anira mwadidi mbandiadzesa kudziko ino. Ine nkhabe dzaafudza tayu, mbwenye ndinaagumanyisa; ine ndinaabzala, nee kuadula tayu.

⁷Ine ndinaapasa mtima wakufuna kudziwa kuti ine ndine MBUYA. Tenepo iwo anakhala anthu anga, inembo mbandikhala Mulungu wawo, thangwi iwo anabwerera kuna ine na mtimawo onsene.

⁸“Kulonga pya Zedekia mfumu wa Yuda, mathubu ache, pontho na anyakusalira na moyo onsene a ku Yerusalemu, ale ambakhala m'dzikomo, penu adenda ku Iguputo ale, ndinaayesa ninga makuyu akuipa, akuchimwanika na kudyeka kwene.

⁹Ine ndinadzesa nyatwa zakugoswa pyakwanga pana iwo mwakuti madzinza onsene a padziko yapansi anachita mantha. Anthu anaasingirira, kuasedegula na kuatikana pontho anaphatisa basa dzinawo kutemberera nayo konsene kwene kwaabalalisa ine kule.

¹⁰Ine ndinadzesa nkhondo, njala pontho muliri pana iwo mpakana pakhonde sala munthu na mbodzi ene m'dziko idapereka ine kuna iwo na kuna makolo awo ene ile.”