Read cisena YEREMIA 25 Bible Online

YEREMIA 25 - cisena bible

YEREMIA 25

¹Chaka chachinayi Yehoiakimu mwana Yosia, mbali mfumu wa Yuda, mphangwa za MBUYA zidadza kuna Yeremia kulonga pya anthu onsene a ku Yuda. Chenechi chikhali chaka chakutoma cha utongi wa Nebukadinezara mfumu wa Babiloni.

²Natenepo ine mprofeti Yeremia ndidalonga kuna anthu onsene a ku Yuda na ale akukhala mu Yerusalemu kuti,

³“Pyaka makumawiri na pitatu, kubulukira chaka chakhumi na chitatu Yosia mwana Amoni mbali mfumu wa Yuda mpakana lero, MBUYA alonga kuna ine, inembo ndalonga kuna imwe kazinji kene. Kwache imwe hamudapiikhe konta tayu.

⁴Imwe nee mudamvesere penu kupiikha konta tayu, podi kwene kuti MBUYA adathimiza kutuma kuna imwe anyabasache onsene maprofeti.

⁵Iwo adalonga mbati, ‘Munthu onsene wa imwe mbaleke makhaliro ache akudawika na mabasache akuipa, towera muthimize kukhala m'dziko idapereka MBUYA kuna imwe na makolo anu kuti ikhale yanu ene kwenda na kwenda ile.

⁶Lekani kupembedza na kutumikira milungu inango; lekani kundizhangalisa pakupembedza pinthu pidasasanya imwe na manjanu pile. Penepo ine nkhabe dzakuvungani tayu.’ ”

⁷MBUYA mwenechiroache akulonga kuti, “Kwache imwe mudakhonda kundivesera. M'mbuto mwache imwe mwandizhangalisa na pinthu pidasasanya imwe na manjanu, mbamupidzesera kuvungika mwekha ene.

⁸“Natenepo MBUYA Wamphamvu zonsene akulonga tenepa: Na thangwi ya kuti imwe mudakhonda kundivesera,

⁹ine ndinachemeresa anthu onsene akumpoto, pabodzi pene na nyabasanga Nebukadinezara mfumu wa ku Babiloni. Ine ndinaachitisa kumenyana na Yuda pontho na anthu ache pontho na madzinza onsene akuzungulira. Ine ndinavungiratu dzinza yeneyi mbandiachitisa kukhala chinthu chakugumisa manungo, chakusekesa, pontho madembe kwenda na kwenda.

¹⁰Ine ndinamalisa kusekera na kukomerwa kumbachita iwoko, mkhuwo wa kukomerwa kwa anyakukazhali, kupeya kwa malibwe, pontho na cheza cha nyale.

¹¹Dziko yonseneyi inasanduka madembe pontho thando yatchetcha, pontho madzinza enewa anatumikira mfumu wa ku Babiloni pyaka makumanomwe.

¹²“Kwache pyaka makumanomwe pingamala, ine ndinati nditchunyuse mfumu wa ku Babiloni na dziko yache ene, dziko ya anthu a ku Babiloni, thangwi ya kudawa kwawo mbandiachitisa kukhala madembe kwenda na kwenda. Ndalonga ndine MBUYA.

¹³Ine ndinadzesa pana dziko yeneyi pinthu pyonsene pidalonga ine pile, pinthu pyonsene pyalembwa m'bukhu yeneyi, pontho pidalongwaletu na mprofeti Yeremia kuti pinachitika kuna madzinza onsene pile.

¹⁴Iwo makawo anakwatwa ninga mabitchu na madzinza azinji pontho mafumu akulu-akulu; ine ndinaabwezera malingana na makhaliro awo pontho na mabasa adaphata iwo na manjawo.”

¹⁵MBUYA Mulungu wa Israele adalonga kuna ine mbati, “Kwata khomitcho yakudzala na vinyu wa ukali wanga ili m'manja mwangayi mbuchitise madzinza onsene kunakutuma ineko kuimwa.

¹⁶Iwo angamwa anadzedzereka mbachita nsala thangwi ya nkhondo inafuna ine dzadzesa pakati pawo ile.”

¹⁷Tenepo ine ndidakwata khomitcho ikhali m'manja mwa MBUYA ile mbandichitisa madzinza onsene kudandituma iye kule kuimwa:

¹⁸Yerusalemu na maluwani onsene a Yuda, mafumu na mathubu awo adamwa khomitcho yeneyi, towera asanduke madembe, chinthu chakugumisa manungo pontho chakusekesa, pontho na chadzedze ninga muna iwo lero.

¹⁹Ale adathema kumwa khomitcho ya ukali wa MBUYA mbawa: mfumu wa ku Iguputo, mathubu ache na anthu ache onsene; Aiguputo onsene na alendo ache akukhala mu Iguputo,

²⁰na alendo onsene akhakhala kweneko; mafumu onsene a kudziko ya Uzi, mafumu onsene a kumizinda ya Ashikeloni, Gaza, Ekroni, na anyakusalira a ku Ashidodi m'nthemba ya Filisti;

²¹anthu onsene a ku Edomu, Moabu, na Amoni;

²²mafumu onsene a ku Turo na Sidoni; mafumu onsene a nthemba ya Mediterania;

²³anthu a m'mizinda ya Dedani, Tema na Buzi; anthu onsene ambachinga tsisi yawo ale;

²⁴mafumu onsene a ku Arabia, mafumu onsene a kumadzinza a m'thando yatchetcha;

²⁵mafumu onsene a ku Zimri, Elamu na Media,

²⁶mafumu onsene akumpoto, a chifupi na akutali ene, kada munthu onsene, dzinza yonsene padziko ya pansi idathema kumwa khomitcho yeneyi. Pakumalisira pache anafuna kuimwa ndi mfumu wa ku Babiloni.

²⁷MBUYA adalonga kuna ine mbati, “Panga anthu kuti: MBUYA Wamphamvu zonsene Mulungu wa Israele akulonga tenepa: Imwani, ledzerani mbamutapika, mpakana kugwa mbamuchimwana na kulamuka kwene, thangwi ya nkhondo inafuna ine dzadzesa pakati pa imwe ile.

²⁸Ngakhala iwo anakhonda kukwata khomitcho m'manja mwako mbamwa, apange kuti: MBUYA Wamphamvu zonsene akulonga tenepa: Imwe mwathema kuimwa basi.

²⁹Yang'anani, ndatoma kale basa yakuvunga mzinda umbaveka na dzinanga ule. Ayi imwe mukunyerezera kuti sinakutchunyusani tayu? Nkhabe, ine ndinati ndikutchunyuseni basi, thangwi ine ndinadzesa nkhondo pakati pa anthu onsene a padziko yapansi. Ndalonga ndine MBUYA Wamphamvu zonsene.

³⁰“Chinchino, Yeremia, longa kuna iwo mphangwa zauprofeti kupokanyisana nawo kuti, ‘MBUYA anabangula kubulukira kudzulu; mbadima kubulukira kumbuto yache yakuchena. Iye anagwenga pana anthu ache; iye anabangula ninga fala ya anyakuponda-ponda mfesa, kubangula pana anthu onsene ambakhala padziko yapansi ale.

³¹Mkhuwo wache unatayirira mpakana kumadolomero a dziko ya pansi, thangwi MBUYA anatonga mseru dziko yapansi; iye anatonga mseru anthu onsene mbapha na talasada anyakudawika. Ndalonga ndine MBUYA.’ ”

³²MBUYA Wamphamvu zonsene akulonga tenepa: “Yang'anani, kuvungika kuli falanthi pakati pa madzinza; chonzi chagundika kumadolomero a dziko yapansi.”

³³Pandzidzi wenewo anyakuphiwa na MBUYA anakhala ponsene pene kubulukira kunkhomo kwa dziko mpakana kunkhomo inango. Iwo nkhabe dzalirwa penu dzasintilwi, penu dzagumanywa mbaikhwa m'masiye tayu, mbwenye anakhala gwenjere-gwenjere ninga ulowa.

³⁴Lirani pontho kalalani, imwe amakabuswa; bulumundani pamataka, imwe anyakuyang'anira mikumbi ya anthu anga, thangwi ndzidzi wanu wakuchekwa wakwana; imwe munachekwa ninga mabira amuna.[15]

³⁵Amakabuswa anasowa kwakuthawira, anyakuyang'anira mikumbi ya anthu anga nkhabe kwanisa kubisala tayu.

³⁶Ngavani chiliro cha amakabuswa, kukalala kwa anyakuyang'anira mikumbi ya anthu anga, thangwi mpovu wawo MBUYA amala kuuvunga.

³⁷Mathanga awo a mtendere anasanduka madembe, thangwi ya ukali wakugoswa wa MBUYA.

³⁸Ninga nkhalamu kusiya nkhwimbache, sasawambo iye asiya anthu ache; tenepo dziko yawo yasanduka thando yatchetcha, thangwi ya talasada[16] ya anyakuaboneresa, pontho na thangwi ya ukali wakugoswa wa MBUYA.