Read cisena YEREMIA 26 Bible Online

YEREMIA 26 - cisena bible

YEREMIA 26

¹Sindzidzi Yehoiakimu mwana Yosia nkhupita ufumu wa Yuda, MBUYA adalonga kuna ine mbati,

²“Ndoko kaimire pachintalo cha Nyumba ya Mulungu mbukalalike kuna anthu onsene a kumaluwani a Yuda, ale adza dzapembedza kuno, pyonsene pinakupanga ine. Leka siya chinthu na chibodzi chene.

³Mwinango anthu anati avesere mbaleka makhaliro awo akuipa. Ngakhala anachitadi tenepo, penepo ine ndinambombowesa ukali wanga mbandikhonda dzaavunga thangwi ya kudawika kwawoko.”

⁴Longa kuna anthuwo kuti, “MBUYA akulonga tenepa: Ngakhala imwe munakhonda kundivesera mbamukhonda kuteweza pifunziso pyakupasani inepi,

⁵pontho mbamukhonda vesera mafala analonga anyabasanga, maprofeti ambakutumirani ine kazinji kene ale, podi kwene kuti imwe nee mudaavesera tayu,

⁶penepo ine ndinachita kuna Nyumba yeneyi ninga pidachita ine kuna Shilo, pontho mbandichitisa madzinza onsene kuphatisa basa dzina ya mzindawu kutemberera nayo.”

⁷Anyansembe, maprofeti na anthu onsene adava Yeremia akulonga mafala enewa m'Nyumba ya Mulungu.

⁸Kwache sindzidzi nkhumalisa kulonga mafala adampanga MBUYA ale, iwo onsene adamphata mbakhuwa mbati, “Iwe wathema kuphiwa!

⁹Thangwi yache ninji iwe ukulonga mphangwa zauprofeti na dzina ya MBUYA kuti Nyumba yeneyi inakhala ninga ya ku Shilo, pontho kuti mzindawu unavungwa mbusanduka madembe?” Natenepo anthu onsene adamuwumbikira Yeremia m'Nyumba ya Mulungu.

¹⁰Pidava mathubu a mu Yuda pidachitika pile, adenda ku Nyumba ya Mulungu kubulukira kunyumba yachifumu mbakakhala pambuto zawo pa Msuwo Utswa wa Nyumba ya Mulungu.

¹¹Tenepo anyansembe na maprofeti adalonga kuna mathubu na anthu ale mbati, “Munthu weneyu athema kuphiwa thangwi alonga mphangwa zauprofeti kupokanyisana na mzindawu. Imwe mwapiva na makutu anu!”

¹²Tenepo Yeremia adalonga kuna mathubu na anthu onsene ale mbati, “MBUYA adandituma dzalonga mphangwa zauprofeti zakupokanyisana na nyumbayi pontho mzindawu pinthu pyonsene pyava imwepi.

¹³Chinchino sanduzani makhaliro anu pontho mabasanu mbamuvere MBUYA Mulungu wanu. Penepo MBUYA anambombowesa ukali wache mbakhonda kudzesa nyatwa pana imwe ninga mudalongera iye mule.

¹⁴Kulonga pya ine, ndili m'manja mwanu, chitani kuna ine pyonsene pinanyerezera imwe kuti mphyadidi pontho pyakuthema.

¹⁵Kwache mupidziwedi kuti ngakhala munandipha, penepo chiropa cha munthu okhonda dawa chinati chigwere pamsolo panu, mzindanu na anthu akukhala mwenemo, thangwi pyakuonadi mphyakuti, MBUYA ndiye andituma kuna imwe dzalonga mafala ava imwewa.”

¹⁶Tenepo mathubu na anthu onsene ale adalonga kuna anyansembe na maprofeti ale mbati, “Munthuyu hadatheme tayu kuphiwa! Iye alonga kuna ife na dzina ya MBUYA Mulungu wathu.”

¹⁷Akulu-akulu anango a dzikoyo adaimira mbalonga kuna anthu onsene akhadagumanyikana penepo ale mbati,

¹⁸“Pikhali Hezekia mfumu wa Yuda, mprofeti Mika wa ku Moresheti adalonga mphangwa zauprofeti kuna anthu onsene a ku Yuda kuti: ‘MBUYA Wamphamvu zonsene akulonga kuti: Zioni anatipulwa ninga munda; Yerusalemu anasanduka mulu wa madongolomwa, pontho phiri ile pana nyumba ya Mulungu inasanduka msitu.’ ”

¹⁹Mfumu Hezekia wa ku Yuda penu munthu unango ene mu Yuda hadamphe Mika tayu. M'mbuto mwache Hezekia adagopa MBUYA mbafuna kuti amkomere mtima. Natenepo MBUYA adambombowesa ukali wache mbakhonda dzesa nyatwa pana iwo ninga montho mukhadapilongera iye mule. Chinchino ife tili chifupi kupidzesera tekha ene nyatwa zikulu!

²⁰Pakhali munthu unango dzinache Uria mwana Shemaia wa ku Kiriati-Yearimu, ule adalonga mphangwa zauprofeti na dzina ya MBUYA. Iye adalonga mphangwa zauprofeti kupokanyisana na mzinda pontho dziko ninga montho mwalongera mprofeti Yeremia kupokanyisana na mzindawu pontho dzikoyi.

²¹Pidava Yehoiakimu na anyankhondo ache pontho mathubu ache pikhadalonga Uria pile, mfumu adayesera kumpha. Kwache Uria adapiva pikhafuna kuchita mfumu pile, natenepo iye adathawira ku Iguputo thangwi ya mantha.

²²Kwache Mfumu Yehoiakimu adatuma Elinatani mwana Akibori pabodzi pene na amuna anango a ku Iguputo kakwata Uria.

²³Iwo adenda kamphata Uria mu Iguputo mbabwerera naye kuna mfumu, ule adampha mbaponya mtembo wache pamasiye a anthu ene pyawo.

²⁴Mbwenye na thangwi ya kuti, Ahikamu mwana Shafani adaikhira kunduli Yeremia, tenepo iye hadaperekwe tayu m'manja mwa anthu kuti aphiwe.