Read cisena YEREMIA 27 Bible Online

YEREMIA 27 - cisena bible

YEREMIA 27

¹Sindzidzi Yosia mwana Zedekia nkhupita ufumu wa Yuda, MBUYA adalonga kuna ine, Yeremia

²mbati, “Sasanya goli-goli mbuimangire m'khosi mwako na nthambo za nthembe.

³Kubuluka penepo tuma mphangwa kuna mafumu a ku Edomu, Moabu, Amoni, Turo na Sidoni kudzera muna aimiriri a madziko awo adadza ku Yerusalemu ale dzaona Mfumu Zedekia wa ku Yuda.”

⁴MBUYA Wamphamvu zonsene, Mulungu wa Israele, andipanga kuatonga kuti akapangembo mafumu awo kuti, “MBUYA akulonga tenepa:

⁵Na mboko zanga pontho na mphamvu zanga zikulu, ndidalenga dziko yonsene yapansi na anthu ache pontho na nyama zili mwenemozo; ndimbaipereka kuna munthu onsene ambakomerwa na ineyo.

⁶Ndine pano ndaikha madziko onsenewa pansi pa utongi wa nyabasanga Nebukadinezara mfumu wa ku Babiloni, pontho ndidachitisa kuti nyama zonsene zimtumikire ndine pano.

⁷Madzinza onsene anamtumikira, pontho iwo anatumikira mwanache na mdzukuluache ene mpakana ndzidzi unakwana wakuti dziko makayo inagwa. Penepo dziko yache inatumikira madziko amphamvu pontho mafumu makulu-makulu.

⁸“Mbwenye ngakhala dzinza penu ufumu unakhonda kutumikira penu kukhala pansi pa utongi wache, penepo ine ndinatchunyusa dzinza penu ufumu wenewo na nkhondo, njala pontho muliri mpakana ndichitise Nebukadinezara kuivunga monsene mwene.

⁹Lekani vesera maprofeti anu, anyakukhumiranu, anyakuloteranu, anyakuombedzanu na anyamatsenganu. Onsenewo akukupangani kuti muleke vera mfumu wa ku Babiloni.

¹⁰Iwo akukunyengezani na pinalonga iwo; imwe munati muphatwe kwenda kutali na dziko yanu. Ine ndinakuthamangisani m'dzikomu, tenepo imwe munavungwa.

¹¹Mbwenye ngakhala dzinza inatawira kukhala pansi pa utongi wa mfumu wa ku Babiloni mbamtumikira, penepo ndinachitisa dzinzayo kukhala m'dziko yawo ene, kulima na kukhala mwenemo. Ndalonga ndine MBUYA.”

¹²Mphangwa zontho-zonthozi ndidazitumizambo kuna Zedekia mfumu wa Yuda kuti, “Khala pansi pa utongi wa mfumu wa ku Babiloni. Mtumikire iye na anthu ache ene, tenepo imwe munakhala na moyo.

¹³Thangwi yache njanji kuti iwe na anthu ako ene mufe pankhondo, na njala, pontho na muliri? Pinthu pile pyalonga MBUYA kuti anachita kuna dzinza yonsene inakhonda kukhala pansi pa utongi wa mfumu wa ku Babiloni.

¹⁴Lekani vesera pinalonga maprofetiwa kuna imwe kuti imwe nkhabe dzatumikira mfumu wa ku Babiloni tayu, thangwi iwo akulonga mphangwa zakunama zauprofeti.

¹⁵Iwo si maprofeti chadi-chadi tayu. Iwo akulonga mphangwa zauprofeti zakunama na dzinanga. Natenepo ine ndinakuthamangisani; penepo imwe munamala vungika, imwe pabodzi pene na maprofeti anu ene anakupangani mphangwa zauprofeti zakunamawo. Ndalonga ndine MBUYA.”

¹⁶Kubuluka penepo ine ndidalonga kuna anyansembe na kuna anthu onsene kuti, “MBUYA akulonga tenepa: Lekani vesera maprofeti ambalonga kuti chinchino pano pinthu pya m'Nyumba ya Mulungu pinati pibwezerwe kubulukira kudziko ya Babiloni. Iwo akukupangani mphangwa zauprofeti zakunama.

¹⁷Lekani kuavesera pinalonga iwopyo. Tumikirani mfumu wa ku Babiloni, tenepo imwe munakhala na moyo. Thangwi yache ninji kuti mzindawu usanduke madembe?

¹⁸Ngakhala iwo ndiwodi maprofeti, pontho ana mphangwa zakubulukiradi kuna Mulungu, alekeni adembetere MBUYA Wamphamvu zonsene kuti pinthu pyasalira m'Nyumba ya MBUYA na m'nyumba yachifumu mu Yuda na mu Yerusalemu pileke kwatwa kwenda ku Babiloni.

¹⁹Thangwi penepi ndiye pyalonga MBUYA Wamphamvu zonsene pya nsanamira ziwiri, phiso ikulu, pigudumu na pinthu pinango pyakusalira m'Nyumba ya Mulungu,

²⁰pile pidasiya Mfumu Nebukadinezara khonda kupikwata ndzidzi udaphata iye Yehoiakini mwana Yehoiakimu mfumu wa Yuda ule, kwenda kudziko ya unyaperezo ku Babiloni kubulukira naye ku Yerusalemu pabodzi pene na amuna akuveka a mu Yuda na Yerusalemu.

²¹“Veserani pinalonga ine, MBUYA Wamphamvu zonsene, Mulungu wa Israele, papinthu pyakusalira m'Nyumba ya Mulungu na m'nyumba yachifumu mu Yuda na mu Yerusalemu kuti,

²²‘Ipyo pinakwatwa kwenda kudziko ya Babiloni mbapikhala kweneko mpakana ndzidzi udzafike wakuti ine ndipinyerezere pontho. Tenepo ndinapichitisa kubwerera mbandipiikha pontho m'mbuto zache. Ndalonga ndine MBUYA.’ ”