Read cisena YEREMIA 28 Bible Online

YEREMIA 28 - cisena bible

YEREMIA 28

¹Chaka chonthocho, mwezi wachishanu wa chaka chachinayi Zedekia mbali mfumu wa Yuda, mprofeti Hanania mwana Azuri wa ku Gibeoni adalonga kuna ine m'Nyumba ya Mulungu pamaso pa anyansembe na anthu onsene mbati,

²“MBUYA Wamphamvu zonsene, Mulungu wa Israele, akulonga tenepa: Ine ndinaswa goli-goli ya mfumu wa ku Babiloni.

³Chaka chachiwiri mbichidzati mala ndinachitisa kubwezeresa kwa pinthu pyonsene pya m'Nyumba ya Mulungu pidakwata Mfumu Nebukadinezara mbaenda napyo ku Babiloni pile.

⁴Ndinachitisa pontho Yehoiakini mwana Yehoiakimu mfumu wa Yuda kubwerera kumbuto ino pabodzi pene na anyakuphatwa anango, ale adaphatwa mu Yuda kwenda nawo ku Babiloni, thangwi ndinati ndiswe goli-goli ya mfumu wa ku Babiloni. Ndalonga ndine MBUYA.”

⁵Tenepo mprofeti Yeremia adatawira mprofeti Hanania ule pamaso pa anyansembe na anthu onsene adaimira penepowo m'Nyumba ya MBUYA mbati,

⁶“Ameni! MBUYA mbachite tenepo; MBUYA mbachitise kukwana-kwana mphangwa zauprofeti zalonga iwezi, pakuchitisa pinthu pya m'Nyumba ya Mulungu na anthu onsene adakwatwa kwenda ku Babiloni ale kubwerera pontho kumbuto ino.

⁷Kwache vesera pinafuna ine kulonga kuna iwe na anthu onsene.

⁸Maprofeti adalongeratu kale ene, ine na iwe ene mbatidzati, pya nkhondo, njala, pontho muliri m'madziko azinji pontho na m'maufumu akulu-akulu.

⁹Mbwenye mprofeti ule ambalonga mphangwa zauprofeti za mtendere, anadziwika ninga mprofeti wakutumwadi na MBUYA, ngakhala pyalonga iyepyo pyakwana-kwana.”

¹⁰Tenepo mprofeti Hanania adabulusa goli-goli ikhali m'khosi mwa Yeremia ile mbaiswa,

¹¹tenepo iye adalonga pamaso pa anthu onsene ale mbati, “MBUYA akulonga tenepa: Ntchibodzi-bodzi MBUYA anaswa goli-goli ya mfumu wa ku Babiloni m'khosi mwa madzinza onsene pandzidzi wa pyaka piwiri.” Kubuluka penepo mprofeti Yeremia adenda pyache.

¹²Sindzidzi mprofeti Hanania nkhuswa goli-goli ikhali m'khosi mwa Yeremia ile, MBUYA adalonga kuna Yeremia mbati,

¹³“Ndoko kapange Hanania kuti MBUYA akulonga tenepa: Iwe waswa goli-goli yamuti, mbwenye m'mbuto mwache ine ndinaikha goli-goli yasimbi.

¹⁴MBUYA Wamphamvu zonsene, Mulungu wa Israele akulonga tenepa: Ine ndinati ndithukulise goli-goli yasimbi m'khosi mwa madzinza onsenewa mbatumikira Nebukadinezara mfumu wa ku Babiloni. Ine ndinati ndimpase pontho utongi wa pana nyama zene zam'tsanga.”

¹⁵Natenepo mprofeti Yeremia adalonga kuna mprofeti Hanania mbati, “Vesera Hanania, adakutuma si MBUYA tayu, kwache iwe wachitisa anthuwa kuvera pyakunama!

¹⁶Natenepo MBUYA akulonga tenepa: Ine ndili chifupi kukubulusa padziko ya pansi. Chaka chontho chino iwe unati ufe, thangwi iwe wafunzisa anthu pyakupandukira MBUYA.”

¹⁷Mwezi wachinomwe wa chaka chonthocho mprofeti Hanania adafa.