Read cisena YEREMIA 29 Bible Online

YEREMIA 29 - cisena bible

YEREMIA 29

¹Ine ndidalemba kalata kuna anyansembe, maprofeti, akadamu a anthu, na kuna anthu anango onsene, ale adakwatwa unyaperezo kubulukira ku Yerusalemu na Nebukadinezara kwenda nawo ku Babiloni.

²Kalatayi ndidailemba ndzidzi ukhadakwatwa Mfumu Yehoiakimu, na mache ene, mathubu a kunyumba yachifumu, akadamu a mu Yuda na mu Yerusalemu, anyaluso pabasa ya manja na anyaluso anango kwenda nawo kudziko ya unyaperezo.

³Iye adatumiza kalatayi na Elasa mwana Shafani, pontho na Gemaria mwana Hilikia, akhadatuma Zedekia mfumu wa Yuda kwenda kuna Nebukadinezara mfumu wa Babiloni ale. Kalatayi ikulonga tenepa:

⁴“MBUYA Wamphamvu zonsene, Mulungu wa Israele, akulonga kuna anthu onsene ale akhadatayirisa iye Nebukadinezara kuaphata unyaperezo kubuluka nawo ku Yerusalemu kwenda nawo ku Babiloni mbati:

⁵Mangani pyanu nyumba mbamukhazikike kweneko; limani pyanu minda mbamudye pinavuna imwepyo.

⁶Sembani pyanu mbamubale ana achimuna na achikazi; semberani na kusembesa ananu, towera iwo abale ana achimuna na achikazi. Injipani pyanu nee kupunguka tayu.

⁷Funani mtendere, pontho kufamba mwadidi kwa pinthu mumzinda kudakutamisani ine ule. Upempherereni kuna MBUYA, thangwi ngakhala pinthu pinafamba mwadidi, imwembo pinthu pinakufambirani mwadidi.

⁸Ande, MBUYA Wamphamvu zonsene Mulungu wa Israele akulonga tenepa: Lekani tawirisa maprofeti, penu anyakukhumira pakati panu kukunyengezani. Lekani vera ndoto zawo.

⁹Iwo akukupangani mphangwa zauprofeti zakunama na dzinanga. Sidaatume ndine tayu. Ndalonga ndine MBUYA.

¹⁰“MBUYA adalonga tenepa: Pyaka makumanomwe pyakukhala kwanu ku Babiloni pingamala, ine ndinati ndidze kuna imwe mbandichitisa kudumbira kwanga kudachita ine kule kuti ndinakubwezeresani kudziko kwanu, kukwane-kwane.

¹¹Thangwi ine mwenechiroache ndikudziwa pinthu pile pyasasanya ine dzakuchitirani: kuchitisa kuti pinthu pyanu pifambe mwadidi nee nyatwa tayu; kukupasani chidikhiro; pontho kukusasanyirani kutsogolo kwadidi.

¹²Tenepo imwe munabwerera kuna ine mbamupemphera kufuna chiphedzo, penepo ine ndinava kupemphera kwanu.

¹³Mungandisaka-saka, munandigumana, ngakhala munasaka-saka na mtimanu onsene.

¹⁴Imwe munati mundigumane, mbandikubwezerani kubulukira kudziko ya unyaperezo. Ine ndinakugumanyisani kubulukira kumadziko onsene na kumbuto zonsene kukhadakubalalisani ine kule, mbandikudzesani kubulukira kudziko ya unyaperezo kudakuendesani ine kule. Ndalonga ndine MBUYA.

¹⁵“Imwe munakwanisa kulonga kuti, ‘MBUYA atitumizira maprofeti m'dziko ya Babiloni,’

¹⁶kwache MBUYA alonga penepi pya mfumu akhala pampando wa chifumu wa Davite, pontho na anthu onsene asalira mumzinda ale, anzanu a kudziko kwanu ale hadende namwe tayu kudziko ya unyaperezo.

¹⁷Ande, MBUYA Wamphamvu zonsene alonga mbati, ‘Ine ndinati nditumize nkhondo, njala, pontho muliri pakati pawo mbandiachitisa kukhala ninga makuyu akuvunda ale nkhabe kwanisika kudyeka tayu.

¹⁸Ine ndinati ndiathamangise na nkhondo, njala, pontho muliri. Ine ndinaachitisa kukhala chinthu chakugumisa manungo kuna maufumu onsene a padziko yapansi; chinthu chakutemberera nacho, chakugoswa, chakusekesa, pontho chakuchitisa manyadzo pakati pa madzinza onsene kudaaendesa ine kule.

¹⁹Thangwi iwo hadavesere mafalanga, mafala adatumiza ine kazinji kene kudzera muna anyabasanga, maprofeti. Tenepo iwo hadaavesere na pang'ono pene tayu. Ndalonga ndine MBUYA.’

²⁰“Natenepo imwe, monsene adendesa ine kudziko ya unyaperezo ya Babiloni kubulukira ku Yerusalemu, veserani mafala analonga ine, MBUYA.

²¹MBUYA Wamphamvu zonsene, Mulungu wa Israele, akulonga tenepa pya Ahabu mwana Kolaia na Zedekia mwana Maaseia ale akulonga mphangwa zauprofeti zakunama na dzinanga: Ine ndinaaikha m'manja mwa Nebukadinezara mfumu wa Babiloni, tenepo iye anaapha imwe mukuona maso.

²²Ngakhala anthu adenda kudziko ya unyaperezo ku Babiloni kubulukira ku Yuda ale, anafuna kutemberera munthu, iwo analonga mbati, ‘MBUYA mbakuchitire ninga montho mudachitira iye kuna Zedekia na Ahabu, adaotchiwa amoyo na Mfumu Nebukadinezara ale.’

²³Thangwi iwo adachita pinthu pyakupitisa manungo mphepo mu Israele; iwo adachita uputa na akazi a atsanthembawo mbalonga pyakunama na dzinanga, pinthu pyakuti sidaatume ndine tayu kuti apilonge. Ine ndikupidziwa pontho ndine mboni wa pinthu penepi. Ndalonga ndine MBUYA.”

²⁴Panga Shemaia wa ku Nehelamu kuti,

²⁵“MBUYA Wamphamvu zonsene Mulungu wa Israele akulonga tenepa: Iwe udatumiza makalata na dzinako kuna anthu onsene a ku Yerusalemu, kuna Zefania nyansembe mwana Maaseia, pontho na kuna anyansembe anango onsene. Iwe udalonga kuna Zefania kuti,

²⁶‘MBUYA adakusankhula kukhala nyansembe kupita mbuto ya Yehoiada, pontho mkadamu wa Nyumba ya Mulungu. Tenepo basako nkhuonesesa kuti nyansala pyache, ule ambapiyesa mprofeti, wammanga matandadza pontho kamuikha goli-goli yasimbi m'khosi mwache.

²⁷Apo iwe watani unakhonda kumsumulula Yeremia wa ku Anatoti, ule ambapiyesa mprofeti pakati panu?

²⁸Iye athema kukhondeswa kuchita tenepo, thangwi iye adapanga anthu m'dziko ya Babiloni kuti anakhala pa unyaperezo kweneko ndzidzi ukulu ene, pontho kuti amange nyumba mbakhazikika, alime minda mbadya pinavuna iwopyo.’ ”

²⁹Kwache Zefania nyansembe adawerenga kalata ile kuna Yeremia mprofeti,

³⁰natenepo MBUYA adalonga kuna Yeremia mbati,

³¹“Tumiza mphangwa izi kuna anthu onsene ali pa unyaperezo ale: ‘MBUYA alonga pya Shemaia tenepa: Na thangwi yakuti Shemaia alonga mphangwa zauprofeti kuna imwe podi kwene kuti sidamtume ndine tayu, pontho iye akuchitisani kukhulupira pyakunama,

³²natenepo MBUYA akulonga tenepa: Ine ndinati nditchunyuse Shemaia na pidzukulu pyache pene. Iye nkhabe dzasala na mbewu na ibodzi ene tayu pakati pa anthu ache, pontho iye nkhabe dzaona pinthu pyadidi pinafuna ine dzachitira anthu tayu, thangwi iye afunzisa anthu pyakundipandukira. Ndalonga ndine MBUYA.’ ”