Read cisena YEREMIA 3 Bible Online

YEREMIA 3 - cisena bible

YEREMIA 3

¹MBUYA akulonga kuti, “Ngakhala mamuna anamwalana na mkazache, mkaziyo mbaenda pyache kasembwa na mamuna unango; ayi mamunayo athema kwenda basi kuna mkazi ule? Ayi penepi nkhabe chitisa dziko kukhala yakuswipa tayu? Kwache iwe wakhala ninga puta mbuthamanga na amuna azinji; ayi chinchino unabwerera kuna ine?

²Kwiza maso kumapiri akupupwa mbuone. Ayi pana mbuto inango yasiya iwe okhonda chitapo uputa? M'khundu mwa njira, iwe udakhala pansi kudikhira pibwenji pyako, iwe udakhala ninga manzenza m'thando yatchetcha. Iwe waswipisa dziko na uputako pontho na pyakudawika pyako.

³Ndi thangwi yache mafazi aleka kuwaza, pontho mvula ya chaka hidavumbe tayu. Kwache iwe ukuoneka ninga puta basi; iwe nkhabe na manyadzo ene tayu.

⁴Ayi si chinchino pano tayu mwandichemera iwe kuti, ‘Baba, ndimwe nyakundionesa njira kutomera uphaleanga,

⁵ayi ndzidzi onsene munandizhangalira? Ayi ukali wanu unathimiza basi kuoneka pana ine kwenda na kwenda?’ Enewa ndiye malongero ako, kwache iwe umbachita basi pyakuipa ninga mumbafunira iwe.”

⁶Pandzidzi wa utongi wa Mfumu Yosia, MBUYA adalonga kuna ine mbati, “Ayi iwe waona kukhonda khulupirika kwachita Israele? Iye akwira paphiri yakulapha yonsene, pontho mbaenda pansi pa muti wakuvata onsene mbachita pyauputa penepo.

⁷Ine ndikhanyerezera kuti penu angamala chita penepi anabwerera kuna ine, kwache iye hadachite tenepo tayu, nanachembo Yuda adapiona pyonsenepi.

⁸Ine ndidampasa msiku Israele, mkazi okhonda khulupirikayi, mbandimgwinya kwawo thangwi ya uputa onsene wachita iye. Mbwenye Yuda, nanache Israele okhonda khulupirika ule hadachite mantha tayu. Iyembo adenda kachita uputa.

⁹Israele hadachite manyadzo na pang'ono pene tayu na pyakuzuda pyachepyo. Iye adaswipisa dziko mbazuda pyache podi na miyala na miti ene.

¹⁰Podi kwene kuti pikhali tenepo, Yuda nanache okhonda khulupirika ule, hadabwerere kuna ine na mtimache onsene tayu, mbwenye adapichita pyache mwatchekedzera. Ndalonga ndine MBUYA.”

¹¹MBUYA adalonga kuna ine mbati, “Israele okhonda khulupirika ule, ndi mbwenye kusangiza na Yuda okhonda khulupirika.

¹²Tenepo ndoko kumpoto ukalonge mphangwa izi: Bwerera kuna ine, iwe Israele okhonda khulupirika! Ndalonga ndine MBUYA. Ine nkhabe dzakuzhangalirave tayu, thangwi ndine nyansisi, ine nkhabe dzazhangalive kwenda na kwenda tayu. Ndalonga ndine MBUYA.

¹³Tawira kwene basi kuti ndiwe nyakudawa pontho nyakupandukira MBUYA Mulungu wako. Bweka kuti pansi pa muti onsene wakuvata iwe udagwa maya na milungu yachilendo, pontho kuti hudandivere tayu. Ndalonga ndine MBUYA.”

¹⁴MBUYA akulonga kuti, “Anthu okhonda khulupirika, bwererani, thangwi mamunanu ndine pano. Ine ndinasankhula munthu kada luwani yonsene pontho awiri kada mbumba mbandikubwezerani ku Zioni.

¹⁵Tenepo ndinakupasani amakabuswa apamtima panga, ale anafuna dzakutsogolerani na nzeru pontho na kuvesa pinthu.

¹⁶Tenepo nsiku zenezo imwe mungainjipa m'dzikomo, anthu nkhabeve dzalonga tayu pya Bokosi ya Chiverano cha MBUYA. Iyo nkhabe dzakhalave m'manyerezero mwawo, penu kuikumbukave tayu; iyo nkhabe dzafunikave, penu dzasasanya pontho inango tayu.

¹⁷Ndzidzi wenewo ungafika, Yerusalemu anachemerwa Mpando Wachifumu wa MBUYA, tenepo madzinza onsene anagumanyikana mu Yerusalemu kulemedza dzina ya MBUYA. Iwo nkhabeve dzachita pinthu pimbafuna mtimawo wakuuma pontho wakuipa ule tayu.

¹⁸Anthu a ku Israele anaphatana na anthu a ku Yuda, tenepo pabodzi pene anabwera kubulukira kudziko yakumpoto kudza kudziko idapasa ine makolo awo kuti ikhale yawo ene ile.”

¹⁹MBUYA akulonga kuti, “Israele ine ndikhapifuna pyakwanga pene kuti ukhale ninga mwananga ene mbandikupasa dziko yakusiririka, pontho dziko yadidiletu kupiringana anango onsene padziko yapansi. Ine ndikhanyerezera kuti unandichemera Baba, mbukhonda leka kunditewera.

²⁰Kwache ninga mkazi okhonda khulupirika kuna mankhadziache, sasawambo iwe Israele, hudakhulupirike tayu kuna ine. Ndalonga ndine MBUYA.

²¹Chiliro chikuveka pamapiri akupupwa, kulira na kudembetera kwa anthu a ku Israele thangwi iwo aipisa makhaliro awo, pontho aduwalira MBUYA Mulungu wawo.

²²“Bwererani imwe anthu akusowa chikhulupiro; ine ndinakuwangisani pakukuchitisani kukhala akukhulupirika. “Imwe mukulonga kuti, ‘Ande, ife tinati tidze kuna imwe, thangwi imwe ndimwe MBUYA Mulungu wathu.

²³Ndimomwene, kupembedza milungu m'pitunda pontho pamapiri, kwalila kutinyengeza kwene basi; ndimomwene chipulumuso cha Israele chili kuna MBUYA Mulungu wathu.

²⁴Kutomera uwanathu kupembedza kwathu milungu yakuchitisa manyadzoyi kwachitisa kuvunga mbewu zidabulusira makolo athu kaluma, mikumbi ya mabirawo na ng'ombe zawo, anawo achimuna na achikazi ene.

²⁵Mbatigone pansi thangwi ya manyadzo mbatiphimbirwa na pinthu pyakusowa chilemedzo pidachita ife. Ife tadawira MBUYA Mulungu wathu; ife na makolo athu ene, kutomera uwanathu kufikirana lero, ife nee tavera matongero ache tayu.’ ”