Read cisena YEREMIA 30 Bible Online

YEREMIA 30 - cisena bible

YEREMIA 30

¹MBUYA adalonga kuna Yeremia mbati,

²“MBUYA Mulungu wa Israele akulonga tenepa: Lemba m'bukhu mafala onsene alonga inewa kuna iwe,

³thangwi ndzidzi unati ufike unafuna ine dzabweza anthu anga, Israele na Yuda. Ine ndinati ndiadzese kubulukira kudziko ya unyaperezo kwenda kudziko idapasa ine makolo awo ile. Tenepo iwo anaikwata pontho kukhala yawo ene. Ndalonga ndine MBUYA.”

⁴MBUYA akulonga pya anthu a ku Israele na Yuda tenepa:

⁵“Chiliro cha mantha chafika m'makutu mwanga, chiliro cha mantha nee mtendere tayu.

⁶Nyerezerani mbamuvunza kuti: Ayi mamuna anakwanisa kubala mwana? Apo thangwi yache ninji ndikuona mamuna wamphamvu ali manja nama pamimba ninga mkazi wa mimba pakubala? Thangwi yache ninji munthu onsene kunkhope kwache kwamala kwinyika-kwinyika?

⁷Nsiku yeneyo inakhala yakugoswa pyakwanga! Nkhabe nsiku inango inakhala ninga yeneyi tayu. Inakhala nsiku ya nyatwa kuna Yakobo, kwache iye anati adapulumuke.”

⁸MBUYA Wamphamvu zonsene akulonga kuti, “Ine ndinabulusa goli-goli ili m'khosi mwawo, pontho ndinagwanda njema zawo; iwo nkhabe dzakhalave anyaperezo kudziko yachilendo tayu.

⁹M'mbuto mwache iwo anatumikira MBUYA Mulungu wawo, pontho Davite mfumu wawo, anafuna dzaasankhulira ine ale.

¹⁰Natenepo lekani chita mantha, imwe pidzukulu pya Yakobo. Imwe Aisraele, lekani taya mtima. Ndalonga ndine MBUYA. Ndinakupulumusani kubulukira kudziko ya kutali; ndinapulumusa pidzukulu pyako kubulukira kudziko ya unyaperezo. Imwe munakhala pontho pakupata na pamtendere; nkhabe munthu anafuna dzakukuthuswani tayu.

¹¹Ine ndili namwe pontho ndinakupulumusani. Ndalonga ndine MBUYA. Podi kwene kuti ndinamala vunga madzinza onsene, kule kudakubalalisani ine pakati pawo, kwache ine nkhabe dzakuvungani monsene mwene tayu. Ine ndinakutchunyusani, kwache ndinapichita mwachilungamo; ine nkhabe dzakusiyani kwene okhonda kukutchunyusani tayu!”

¹²MBUYA akulonga tenepa: “Chironda chanu chasanduka njinda mwakuti nkhabe kwanisa kupola tayu.

¹³Nkhabe na mbodzi ene wakukuikhirani kunduli tayu, nkhabe mtombwe wakuwangisa pironda pyanu, pontho nkhabe chidikhiro chakuti munawanga tayu.

¹⁴Ashamwali anu onsene amala kukuthawani; iwo nkhabeve kukutsalakanani tayu. Ine ndakumenyani ninga nyamalwa mbandikutchunyusani ninga nyakukala mtima, thangwi kudawa kwanu kwachita kunyanya, pontho pyakudawa pyanu pyainjipa pyakwanga pene.

¹⁵Mwatani munadungunya na pironda pyanupyo; ipyo nkhabe kwanisa kupola tayu. Ine ndakutchunyusani ninga tenepo, thangwi kudawa kwanu kwachita kunyanya, pontho pyakudawa pyanu pyainjipa pyakwanga pene.

¹⁶Kwache onsene anakusanyisani, anasanyiswambo; anyamalwanu onsene anati aendeswe kudziko ya unyaperezo. Onsene anakuponderezani ale, anaponderezwambo; onsene ale anakupokoserani pinthu pyanu, pinthu pyawo pinapokoserwambo.

¹⁷Kwache ndinakuchitisani pontho kukhala na moyo wadidi mbandiwangisa pironda pyanu, podi imwe mwayeswa ninga nyakusowa basa, Zioni, ule nkhabe na mbodzi ene ambatsalakana pya iye tayu. Ndalonga ndine MBUYA.”

¹⁸MBUYA akulonga tenepa: “Ine ndinachitisa pontho pinthu pya pidzukulu pya Yakobo kufamba mwadidi, mbandivera nsisi banja yonsene; Yerusalemu anati amangwe pontho pamadembe pache, pontho nyumbache yachifumu inaimira pontho pambuto pache pale.

¹⁹Mwenemo munabuluka nyimbo zakupereka nazo takhuta, pontho mkhuwo wakukomerwa. Ndinaainjipisa, iwo nkhabe dzapunguka tayu; ndinaapasa chilemedzo, pontho iwo nkhabe dzalulupiswa tayu.

²⁰Anawo anakhala ninga ontho a ndzidzi wa mvula zakale; dzinzawo inakhazikika pamaso panga; anyakuapondereza onsene ndinati ndiatchunyuse.

²¹Mkadamu wawo anakhala mbodzi wa iwo; mtongi wawo anabulukira pakati pawo. Ine ndinamdzesa chifupi mbakhala thiri-thiri na ine, thangwi mbani anawanga mtima dzapipereka yekha ene kukhala thiri-thiri na ine pano? Ndalonga ndine MBUYA.

²²Tenepo imwe munakhala anthu anga, inembo ndinakhala Mulungu wanu.”

²³Yang'anani, chonzi cha MBUYA chinanyanduka, thangwi ya ukali wache, mphepo ya shungu inamenya pamsolo pa anyakudawa.

²⁴Ukali wakugoswa wa MBUYA nkhabe dzambombowa tayu mpakana iye amalise pyonsene pikhafuna mtimache. Nsiku zinadzazi imwe munati mupivese penepi.