Read cisena YEREMIA 32 Bible Online

YEREMIA 32 - cisena bible

YEREMIA 32

¹Chaka chamakumawiri mwenemo Zedekia mbali mfumu wa Yuda, chile chikhali chaka chakhumi na chisere Nebukadinezara mbali mfumu wa Babiloni, MBUYA adalonga kuna ine, Yeremia.

²Ndzidzi wenewo anyankhondo a ku Babiloni adazungulira mzinda, tenepo ine, Yeremia mprofeti ndidafungirwa muchintalo cha anyakulondali cha nyumba yachifumu ya mu Yuda.

³Mfumu Zedekia akhadandifungira mwenemo mbandivunza mbati, “Thangwi yache njanji ukulonga mphangwa zauprofeti kuti, ‘MBUYA akulonga tenepa: Ine ndinachitisa mfumu wa ku Babiloni kudza dzapokosera mzindawu,

⁴pontho kuti Mfumu Zedekia nkhabe dzapulumuka tayu. Iye anaperekwa m'manja mwa mfumu wa ku Babiloni; iye anati aonane naye maso na maso mbalongesana naye.

⁵Iye anakwata Zedekia kwenda ku Babiloni mbakakhala kweneko mpakana ndichite kuna iye pinthu pinafuna ine. Ngakhala iwe unayesera kumenyana na anthu a ku Babiloni iwe nkhabe dzakwanisa kuakunda tayu. Ndalonga ndine MBUYA.’ ”

⁶MBUYA adalonga kuna ine, Yeremia, tenepa:

⁷“Hanamele mwana wamamuna wa mbuyako Shalumu anati adze kuna iwe mbalonga kuti, ‘Gula mundanga wa ku Anatoti, thangwi iwe ninga mbaleanga chadi-chadi una utongi kugula mundawo, pontho ndiwe wathema kuuombola.’ ”

⁸Tenepo ninga montho mukhadalongera MBUYA, Hanamele adadza kuna ine muchintalo cha anyakulondali mukhali ine mule mbalonga kuna ine kuti, “Gula mundanga wa ku Anatoti m'nthemba ya Benjemani, thangwi iwe utongi uli nawo wakuuombola mbuukwata kukhala wako ene, tenepo pigulire wekha ene mundawo.” Natenepo ine ndidapidziwa kuti MBUYA akhadandipanga kale pya pinthu penepi;

⁹penepo ine ndidagula munda ku Anatoti wa mbuyanga Hanamele, mbandimulengesera kobiri zache pakonta ya masiliva khumi na anomwe.

¹⁰Ine ndidalembapo dzinanga pamakalata akutsikimizira pya munda udagula ine mbandiimyatira pamaso pa mboni. Tenepo ndidapima kobirizo na mdida.

¹¹Ine ndidakwata makalata onsene awiri adagulira ine munda ale, ibodzi yakumyatirwa, ile ikhalonga pya pinthu pidaphatizana ife pakugula munda ule, pontho inango yokhonda myatirwa.

¹²Ine ndidapereka makalatawo kuna Baruki mwana Neria mdzukuluache Maseia. Ndidaapereka kuna iye pamaso pa Hanamele mwana mbuyanga ule, pontho pamaso pa mboni zikhadalembambo madzinawo pamakalata ale, pontho na pa Ayuda onsene akhakhala muchintalo cha anyakulondali ale.

¹³Ine ndidapereka pamaso pawo kuna Baruki na matongero akuti,

¹⁴“MBUYA Wamphamvu zonsene, Mulungu wa Israele, akukupanga kuti: Ukwate makalata onsene awiri, yakumyatirwa na yokhonda myatirwa akutsikimizira pyakugula kwa mundawo, mbupiikhe m'chitomba, towera pikoyeke mwenemo mpakana pyaka pinadzapyo.

¹⁵MBUYA Wamphamvu zonsene, Mulungu wa Israele, akulonga tenepa: Nyumba, minda na minda yamfesa pinagulwa pontho m'dziko muno.”

¹⁶Pidamala ine kupereka makalata akutsimikizira pya munda wenewu kuna Baruki mwana Neria, ndidapemphera kuna MBUYA kuti,

¹⁷“MBUYA Mulungu, ndimwe mudasasanya kudzulu na dziko yapansi na mphamvu zanu zikulu, pontho na mkono wanu wamphamvu; nkhabe chinthu chakunensa kuna imwe tayu.

¹⁸Imwe mumbaonesa kuafuna kwanu kokhonda mala anthu pikwi-pikwi, kwache imwe pontho mumbatchunyusa anthu thangwi ya kudawika kudachita makolo awo. Imwe ndimwe Mulungu wamkulu pontho wamphamvu; ule dzinache ndi MBUYA Wamphamvu zonsene.

¹⁹Manyerezero anu ngakuzwika pyakwanga pontho mabasanu ngamphamvu. Maso anu ambakhala pana njira za anthu; imwe mumbafupa munthu onsene mwakuthemerana na makhaliro pontho na mabasache.

²⁰Imwe mudachita pidzindikiro na pyakudodomesa m'dziko ya Iguputo mbamuthimiza kupichita mpakana lero, mu Israele na pakati pa madzinza anango onsene mwakuti imwe mwadziwika konsene kwene ninga muna ipyo lero.

²¹Imwe mudabulusa anthu anu, Aisraele, m'dziko ya Iguputo pakuchita pidzindikiro na pyakudodomesa na mphamvu zanu zikulu, pontho na mkono wanu wamphamvu, pontho na kugoswa kwanu kukulu.

²²Imwe mudaapasa dziko yeneyi, dziko yamphonje idadumbira imwe kuna makolo awo ile.

²³Iwo adapitamo mbaikwata kukhala yawo ene, kwache iwo hadakuvereni penu kuteweza mwambo wanu tayu; iwo hadachite pinthu pidaatonga imwe pile tayu. Tenepo imwe mudagwisa pana iwo nyatwa yonseneyi.

²⁴“Yang'anani, anthu a ku Babiloni amuluka mataka kuzungulira mzindawu kufuna kuusosa. Nkhondo, njala, pontho muliri pinachitisa anyamalwa kupokosera mzindawu. Penepa munakwanisa kuona kuti mafala adalonga imwe ale akwana-kwana.

²⁵Podi kwene kuti mzindawo unapokoserwa na anthu a ku Babiloni, kwache imwe MBUYA Mulungu mudalonga kuna ine kuti, ‘Gula mundawo na kobiri zasiliva pontho pakhale mboni kuti mundawo wauguladi.’ ”

²⁶Kubuluka penepo MBUYA adalonga kuna ine, Yeremia mbati,

²⁷“Ine ndine MBUYA Mulungu wa anthu onsene. Ayi pana chinthu chakunensa pyakwanga kuna ine?

²⁸Natenepo MBUYA akulonga tenepa: Ine ndili chifupi kupereka mzindawu m'manja mwa anthu a ku Babiloni pontho kuna Nebukadinezara; iwo anati aupokosere.

²⁹Anthu a ku Babiloni ale anasosa chinchino mzindawu, anapitamo mbaupisa moto; anaugomola pabodzi pene na nyumba, zile mudandizhangalisa anthu pakupereka pyakufukiza pyakununkhira pansoyi kuna milungu Baala, pontho pakupereka nsembe za kumwa kuna milungu inango.

³⁰“Anthu a ku Israele na Yuda pyachita iwo pamaso panga kutomera uwanawo mphyakudawa pene basi nee chinango tayu; ndimomwene anthu andizhangalisa na pinthu pidasasanya iwo na manjawo. Ndalonga ndine MBUYA.

³¹Kubulukira pa nsiku idamangwa mzindawo kufikirana lero, mzindawu walamusa kuzhangali kwanga pontho ukali wanga pikulu pene mwakuti ine ndathema kuubulusa pamaso panga.

³²Anthu a ku Israele na Yuda andizhangalisa pakuchita pinthu pyakuipa pikulu, iwo pabodzi pene na mafumu awo, mathubu awo, anyansembe awo, maprofeti awo, pontho na mzika za ku Yuda na Yerusalemu.

³³Iwo andipasa nkhodolo, nee kundipasa nkhope zawo tayu; podi kwene kuti ine sidasiye kuafunzisa tayu. Iwo hadandivesere penu kuikha konta pinthu pikhalonga ine pile tayu.

³⁴Iwo adaikha mifanikizo yakunyansa m'Nyumbanga, mule mudathema ine kupembedzwa, mbaiswipisa.

³⁵Iwo amangira milungu Baala maguwa ansembe pa Phedi ya Beni-Hinomu, towera apereke nsembe anawo achimuna na achikazi ene kuna Moleki. Ine sidaatonge kuchita tenepo tayu, penumbo kupinyerezera kuti iwo achite pinthu pyakuchitisa manyadzo ninga penepi mbachitisa anthu a ku Yuda kudawa.”

³⁶MBUYA Mulungu wa Israele adalonga kuna ine mbati, “Yeremia, anthu akulonga kuti nkhondo, njala pontho muliri ndiye pinafuna dzachitisa anthu a ku Babiloni dzapokosera mzindawu. Chinchino vesera pinthu pyonsene pinafuna ine longapi:

³⁷Ine ndinagumanyisa anthu onsene ale akhabulukira kumadziko onsene kukhadaabalalisira ine thangwi ya kuzhangali kwanga kukulu pontho ukali wanga wakugoswa, mbandiadzesa kumbuto yeneyi. Tenepo ndinaachitisa kukhala mwenemo pakupata.

³⁸Iwo anakhala anthu anga, inembo mbandikhala Mulungu wawo.

³⁹Ndinaachitisa kukhala na manyerezero abodzi ene basi moyo wawo onsene: kundilemedza ndzidzi onsene, towera pinthu pyawo iwo na pidzukulu pyawo piafambire mwadidi.

⁴⁰Ine ndinachita nawo chiverano chokhonda mala. Ine nkhabe dzakhonda kuachitira pinthu pyadidi tayu, pontho ndinaachitisa kundigopa ine pano na mtimawo onsene, towera aleke bauka pontho kubuluka kuna ine.

⁴¹Ine ndinakomerwa na kuachitira pinthu pyadidi, pontho ndinakhala wakukhulupirika monsene mwene na mtimanga onsene kuakhazikisa m'dziko mwenemu.

⁴²“Ninga montho mwadzesera ine nyatwayi pana iwo, tenepo ndinaapasa pinthu pyonsene pyadidi pidadumbira ine pile. Ndalonga ndine MBUYA.

⁴³Minda inagulwa pontho m'dziko yeneyi, ile ikhalonga anthu kuti inasanduka madembe kule mbalame penu nyama nkhabe dzakhalamo tayu, pontho ile yaperekwa m'manja mwa anthu a ku Babiloni.

⁴⁴Anthu anagula minda mbapalembwa madzina pamakalata akutsikimizira pya kugula mindayo ale amyatirwa pamaso pa mboni. Penepi pinachitika m'nthemba ya Benjemani, m'midzi yakuzungulira Yerusalemu, m'maluwani a m'dziko ya mapiri, m'tchinde mwa mapiri, na kuthando yatchetcha ya Negebu. Ine ndinabwezera pontho anthu anga kudziko yeneyi. Ndalonga ndine MBUYA.”