Read cisena YEREMIA 34 Bible Online

YEREMIA 34 - cisena bible

YEREMIA 34

¹Mfumu Nebukadinezara wa ku Babiloni, pontho anyankhondo ache onsene pabodzi pene na mafumu onsene na anthu awo akhali pansi pa utongi wache ale, adamenyana na Yerusalemu pabodzi pene na maluwani akuzungulira. Ndzidzi wenewo MBUYA adalonga kuna ine, Yeremia.

²MBUYA Mulungu wa Israele, adandipanga kwenda kuna Zedekia mfumu wa Yuda kampanga kuti, “MBUYA akulonga tenepa: Ine ndili chifupi kupereka mzindawu m'manja mwa mfumu wa ku Babiloni, tenepo iye anaupisa moto.

³Iwe nkhabe dzaphuzumuka m'manja mwache tayu; iwe unati uphatwe mbuperekwa m'manja mwache. Iwe unati uonane na mfumu wa ku Babiloni maso na maso mbulongesana naye; kubuluka penepo iwe unati ukwatwe kwenda ku Babiloni.

⁴Kwache iwe Zedekia mfumu wa Yuda, vesera pinafuna ine, MBUYA, kulonga kuna iwe: Iwe nkhabe dzaphiwa pankhondo tayu;

⁵iwe unafa mwadidi. Ninga mudachitira anthu kuphatisa moto pamaliro a makolo ako, mafumu akale iwe mbudzati balwa ale, sasawa iwo anaphatisambo moto pamaliro pako. Iwo anakusintili mbalonga mbati, ‘Mama ine, mfumu wathu alowa!’ Ndalonga ndine MBUYA.”

⁶Tenepo Yeremia mprofeti adenda katula mphangwa zenezi kuna Mfumu Zedekia mu Yerusalemu,

⁷mwenemo anyankhondo a ku Babiloni akhachita nkhondo na Yerusalemu pontho na mizinda inango ya mu Yuda, Lakishi na Azeka, thangwi mizinda miwiriyi ndiye idasalira yakutchingwa na mpanda mu Yuda.

⁸MBUYA adalonga kuna Yeremia pidamala Mfumu Zedekia na anthu a ku Yerusalemu kuchita chiverano chakusudzula mabitchu.

⁹Munthu onsene adathema kusudzula mabitchu ache a Chiheberi, amuna na akazi ene, towera paleke khala munthu na mbodzi ene wakukoya bitchu wa Chiheberi.

¹⁰Mathubu na anthu onsene adaphatizana kusudzula mabitchu awo, amuna na akazi ene, pontho kuti hanaayesave mabitchu tayu. Tenepo iwo adaasudzuladi.

¹¹Mbwenye m'nduli mwache iwo adasanduza manyerezero awo mbaaphata amuna na akazi ene akhadasudzula iwo kale ale, kuakhakhamiza kukhala pontho mabitchu.

¹²Tenepo MBUYA adalonga kuna ine, Yeremia, kapanga anthu kuti,

¹³“Ine, MBUYA Mulungu wa Israele, ndikulonga tenepa: Ine ndidasasanya chiverano na makolo anu pidaabulusa ine ku Iguputo, dziko ya ubitchu kule. Ine ndidaapanga kuti,

¹⁴‘Pyaka pinomwe pyonsene munthu onsene wa imwe athema kusudzula mabitchu onsene a Chiheberi ale adapigulisa okha ene kuna imwe. Iye angamala kukuphatirani basa pyaka pitanthatu imwe mwathema kumsudzula.’ Kwache makolo anu hadapiikhe konta penu kuvesera pikhalonga ine pile tayu.

¹⁵Si kale ene tayu, idatawira imwe na mulomo wanu kuchita pinthu pyakundikomera. Munthu onsene wa imwe adasudzula mabitchu a Chiisraele, tenepo imwe mudachita chiverano pamaso panga m'Nyumba imbadziwika na dzinanga ile.

¹⁶Kwache m'nduli mwache imwe mudasanduza manyerezero anu mbamululupisa dzinanga. Monsenene mudaphata pontho mabitchu anu, amuna na akazi ene, adasudzula imwe kale mwakufuna kwanu ale, tenepo mudaakhakhamiza kukhala pontho mabitchu.

¹⁷Natenepo MBUYA akulonga tenepa: Imwe mudakhonda kundivera; imwe nee mudapereke utumbe kuna Aisraele anzanu tayu. Pano ndinakupasanimbo utumbe, utumbe wakufa pankhondo, na muliri, pontho na njala. Ine ndinakuchitisani kukhala chakugumisa manungo kuna maufumu onsene a padziko yapansi.

¹⁸Anthu ale aswa chiverano changa mbakhonda teweza matongero a chiveranocho, ine ndinaachitisa kukhala ninga mwanamphulu ambagwanda iwo mapindi mawiri, kubuluka penepo mbafamba na pakati pache ule.

¹⁹Akadamu a ku Yuda na Yerusalemu pabodzi pene na mathubu a kunyumba yachifumu, anyansembe na anthu onsene adasasanya chiverano na ine pakufamba pakati pa ng'ombe imuna ikhadagwandwa m'mapindi mawiri ile,

²⁰ine ndinaapereka m'manja mwa anyamalwawo ambasaka-saka moyo wawo ale. Mitembo yawo inadyiwa na mbalame, pontho na nyama zam'tsanga.

²¹Ine ndinapereka Zedekia mfumu wa Yuda na mathubu ache m'manja mwa anyamalwawo ambasaka-saka moyo wawo ale, kuna anyankhondo a ku Babiloni, ale abanga leka kukusosani.

²²Ine ndinatonga, tenepo iwo anabwerera kumzindawu. Iwo anausosa mbaupisa moto. Ine ndinachitisa maluwani a Yuda kusanduka thando yatchetcha kule nkhabe khala munthu na mbodzi ene tayu. Ndalonga ndine MBUYA.”