Read cisena YEREMIA 35 Bible Online

YEREMIA 35 - cisena bible

YEREMIA 35

¹Pikhali Yehoiakimu mwana Yosia mfumu wa Yuda, MBUYA adalonga kuna ine, Yeremia mbati,

²“Ndoko kuna nkhonda Rekabu mbukaachemere kudza m'subi ibodzi ene m'Nyumba ya Mulungu mbuapase vinyu kuti amwe.”

³Tenepo ndidenda kuna nkhonda Rekabu yonsene, Yaazania, mwana munthu unango dzinache Yeremia, mwana Habazinia, pontho na abale ache na anache achimuna onsene.

⁴Ine ndidadza nawo m'Nyumba ya Mulungu kusubi ya ana a mprofeti Hanani mwana Igidalia munthu wa Mulungu. Subi yeneyi ikhali padzulu pa subi ya Maaseia mwana Shalumu, thubu wakufunika pyakwanga m'Nyumba ya Mulungu, pontho chifupi na masubi a mathubu anango.

⁵Kubuluka penepo ndidaikha makhomitcho na ndilo pyakudzala na vinyu pamaso pa nkhonda Rekabu mbandilonga kuna iwo kuti, “Imwani vinyuyo!”

⁶Mbwenye iwo adatawira mbati, “Ife nkhabe kumwa vinyu tayu, thangwi kholo wathu Yonadabu mwana Rekabu adatitonga tenepa: ‘Nee imwe penu pidzukulu pyanu athema kumwa vinyu tayu.

⁷Imwe mwathema pontho nee kumanga nyumba, penu kulima na kubzala mfesa; imwe mwathema nee kuchita chibodzi cha pinthu penepi, mbwenye ndzidzi onsene imwe mwathema kukhala m'makumbi, towera imwe muthimize kukhala na moyo wakulapha m'dziko inakhala imwe ninga anyakudzayi.’

⁸Ife tavera matongero onsene adatipasa kholo wathu Yonadabu mwana Rekabu ale. Nee ife penu akazathu, nee anathu achimuna penu achikazi chipo tidzati tamwa vinyu tayu,

⁹penu kupimangira nyumba ninga misathu, penu kukhala na minda yamfesa penu kubzala mbewu tayu.

¹⁰Ife tavera monsene mwene pyonsene pidatitonga Yonadabu kholo wathu, mbatikhala pyathu m'makumbi.

¹¹Mbwenye pidapokosera Mfumu Nebukadinezara dzikoyi, ife tidalonga kuti, ‘Tendeni pyathu ku Yerusalemu kuthawa anyankhondo a ku Babiloni na ku Aramu.’ Ndi thangwi yache tili kuno ku Yerusalemu.”

¹²Kubuluka penepo MBUYA adalonga kuna ine, Yeremia.

¹³MBUYA Wamphamvu zonsene Mulungu wa Israele adandipanga kwenda kuna anthu a ku Yerusalemu na Yuda kalonga kuti, “Ayi imwe nkhabe funzapo chinthu penepa tayu mbamuvera matongero anga? Ndalonga ndine MBUYA.

¹⁴Yonadabu mwana Rekabu adatonga pidzukulu pyache kuti iwo aleke kumwa vinyu, tenepo iwo avera matongero enewa. Na lero iwo nkhabe kumwa vinyu na pang'ono pene tayu, thangwi iwo adavera matongero a kholo wawo. Mbwenye ine sidaleke kulonga kuna imwe tayu, kwache imwe nee mudandivesere tayu.

¹⁵Ine ndidathimiza kutumiza kuna imwe anyabasanga onsene maprofeti. Iwo adakupangani kuti muleke pyakuipa pyanu mbamuchite pyakulungama, pontho kuti muleke tewera na kutumikira milungu inango, towera muthimize kukhala m'dziko idapereka ine kuna imwe na makolo anu ile. Kwache imwe nee mudandivesere, penu kuikha konta pinthu pikhalonga ine pile tayu.

¹⁶Pidzukulu pya Yonadabu mwana Rekabu pyavera matongero adaapasa makolo awo, mbwenye anthu enewa hadandivere tayu.

¹⁷Natenepo MBUYA Wamphamvu zonsene Mulungu wa Israele akulonga tenepa: Ine ndinadzesa pana Yuda na pana anthu onsene ambakhala mu Yerusalemu kuvungika konsene kudadumbira ine kule. Ine ndidalonga kuna iwo, kwache iwo hadandivere tayu; ine ndidaachemera, kwache iwo hadanditawire tayu.”

¹⁸Tenepo ine, Yeremia, ndidalonga kuna nkhonda Rekabu kuti MBUYA Wamphamvu zonsene, Mulungu wa Israele akulonga kuti, “Imwe mwavera matongero adakupasani Yonadabu kholo wanu ale mbamuteweza upangizi wache onsene, pontho kuchita pyonsene pidakutongani iye pile.

¹⁹Natenepo ine, MBUYA Wamphamvu zonsene, Mulungu wa Israele, ndikulonga kuti: Yonadabu mwana Rekabu anakhala na chidzukulu chile chinafuna dzanditumikira ndzidzi onsene.”