Read cisena YEREMIA 36 Bible Online

YEREMIA 36 - cisena bible

YEREMIA 36

¹Chaka chachinayi Yehoiakimu mwana Yosia mbali mfumu wa Yuda, MBUYA adalonga kuna ine, Yeremia mbati,

²“Kwata mpukutu mbulembemo mafala onsene alonga ine pya Israele na Yuda pabodzi pene na madzinza anango onsene kubulukira pa ndzidzi udatoma ine kulonga kuna iwe, mwenemo Yosia mbali mfumu kufikirana lero.

³Mwinango anthu a ku Yuda angava pya nyatwa zinafuna ine kuasanyisa nazo, munthu onsene wa iwo anati aleke kuchita pyakudawika; penepo ine ndinaalekerera kudawika kwawo konsene na pyakudawa pyawo pene.”

⁴Tenepo Yeremia adachemeresa Baruki mwana Neria mbampanga pyonsene pidalonga MBUYA pile. Natenepo Baruki akhalemba pyonsenepyo mumpukutumo na ndzidzi ontho ukhampanga iyewo.

⁵Kubuluka penepo ine, Yeremia ndidampanga Baruki kuti, “Ine nkhabe tawiriswave tayu kupita m'Nyumba ya Mulungu.

⁶Kwache iwe, ndoko ku Nyumba ya Mulungu pansiku inafuna anthu kupimana kudya mbukawerenge mafala a MBUYA ali mumpukutu ukhadakulembesa ine ule. Kauwerenge kuna anthu onsene a ku Yuda, anadza kweneko kubulukira kumaluwani awo ale.

⁷Mwinango iwo anapemphera kuna MBUYA mbaleka pyakudawa pyawopyo; thangwi kuzhangali na ukali wa MBUYA pyaonekera pana anthu enewa mphyakugoswa pyakwanga.”

⁸Tenepo Baruki mwana Neria adachita pyonsene pidampanga Yeremia pile; pa Nyumba ya Mulungu pale iye adawerenga mafala a MBUYA kubulukira mumpukutu mule.

⁹Mwezi wachifemba chaka chachishanu Yehoiakimu mwana Yosia mbali mfumu wa Yuda, anthu adapimana kudya kuti MBUYA aavere nsisi. Anthu onsene akukhala mu Yerusalemu na anthu onsene adadza kweneko kubulukira m'maluwani a Yuda ale adapimana kudya.

¹⁰Mwenemo anthu onsene mbali kuvesera, Baruki adawerenga mpukutu ule pyonsene pikhadalonga Yeremia pile. Iye adachita penepi m'Nyumba ya MBUYA m'subi ya Gemaria mwana Shafani, nyakulemba m'thando ya miseru. Subi yache ikhali ya m'dzulu chifupi na Msuwo Utswa wa Nyumba ya Mulungu.

¹¹Pidava Mikaia mwana Gemaria pontho mdzukuluache Shafani mafala onsene a MBUYA kubulukira mumpukutu mule,

¹²adatchitha kusubi ya nyakulemba m'nyumba yachifumu, kule kudakhala pansi mathubu onsene: Elishama nyakulemba, Delaia mwana Shemaia, Elinatani mwana Akibori, Gemaria mwana Shafani, Zedekia mwana Hanania na mathubu anango onsene.

¹³Pidamalisa Mikaia kuapanga pyonsene pidava iye Baruki akuwerenga kuna anthu, kubulukira mumpukutu mule,

¹⁴mathubu onsene adatuma Yehudi mwana Netania, pontho mdzukuluache Shelemia, mwana Kushi kalonga kuna Baruki kuti, “Idza kuno na mpukutu wawerenga iwe kuna anthu.” Tenepo Baruki adenda kuna iwo na mpukutu m'manja mwache.

¹⁵Iwo adalonga kuna iye mbati, “Taphata miyendo, khala pansi mbutiwerengere mpukutuwu.” Tenepo Baruki adaawerengera.

¹⁶Pidava iwo mafala onsenewo, adayang'anisana mwamantha mbalonga kuna Baruki mbati, “Ife tathema kalonga mafala enewa kuna mfumu.”

¹⁷Tenepo iwo adamvunza Baruki mbati, “Ngatipange, ayi iwe wakwanisa tani kulemba pinthu pyonsenepi? Ayi adakulembesa penepi ndi Yeremia?”

¹⁸Baruki adatawira mbati, “Ande, Yeremia adandipanga mafala onsenewa, tenepo ine ndidapilemba na tinta mumpukutumu.”

¹⁹Penepo mathubu ale adalonga mbati, “Iwe na Yeremia mwathema kabisala. Munthu na mbodzi ene mbaleke dziwa kunaenda imwe kabisalako.”

²⁰Mathubu ale adaikha mpukutu ule m'subi ya Elishama, nyakulemba m'thando ya miseru, tenepo iwo adenda kuna mfumu mbakampanga pyonsene.

²¹Tenepo mfumu adatuma Yehudi kakwata mpukutuwo. Iye adenda kusubi ya Elishama kaukwata mbakauwerenga kuna mfumu, pontho na mathubu ache akhadaimira mwakumzungulira ale.

²²Wenewu ukhali ndzidzi wakutonthola, tenepo mfumu akhakhala m'nyumba mukhakhala iye ndzidzi wakutonthola, uku akuotha moto.

²³Sindzidzi Yehudi nkhumalisa kuwerenga ndima zitatu penu zinayi, mfumu akhaucheka na mpeni mbauponyera pamoto pale. Iye adathimiza kuchita tenepo mpakana mpukutu onsene ule udamala piswa moto.

²⁴Kwache nee mfumu penu mbodzi wa mathubu ache, ale adava mafala onsenewa, adachita mantha penu kung'amba nguwo zawo kuonesa kutsukwala tayu.

²⁵Podi kwene kuti Elinatani, Delaia na Gemaria adadembetera mfumu kuti aleke pisa mpukutuwo, iye hadapiikhe konta tayu.

²⁶M'mbuto mwache mfumu adatonga Yerameele, mwana mfumu, na Seraia mwana Aziriele pontho na Shelemia mwana Abideele kamanga Baruki nyakulembanga pabodzi na ine, Yeremia mprofeti. Mbwenye MBUYA akhadaabisa.

²⁷Pikhadamalisa Mfumu Yehoiakimu kupisa mpukutu ule ukhali na mafala akhadalembesa ine Baruki ule, MBUYA adalonga kuna ine, Yeremia mbati:

²⁸“Kwata mpukutu unango mbulembepo pyonsene pikhadalemba iwe mumpukutu wakutoma udapisa Yehoiakimu mfumu wa Yuda ule.

²⁹Pontho panga Yehoiakimu mfumu wa Yuda kuti MBUYA akulonga tenepa: Iwe wapisa mpukutu ule mbulonga kuti, ‘Thangwi yache ninji udalemba mumpukutumo kuti mfumu wa ku Babiloni anati abwere dzavunga dzikoyi mbapha anthu ache na nyama zene?’

³⁰Natenepo ine, MBUYA, ndikulonga tenepa pya Yehoiakimu mfumu wa Yuda: Iye nkhabe dzakhala na chidzukulu chile chinafuna dzakhala pampando wachifumu wa Davite tayu; mtembo wako unaponywa pakwecha mbukhala padzuwa na masikati pontho pabume na mosiku.

³¹Ine ndinamtchunyusa iye, anache na anyabasache ene thangwi ya kudawika kwawo konsene; ndinadzesa pana iwo pontho anthu a mu Yerusalemu na a ku Yuda ene nyatwa zonsene zidalonga ine zile, thangwi hadaikhe konta tayu kuacheuza kwachita ine kule.”

³²Tenepo ine, Yeremia ndidakwata mpukutu unango mbandiupereka kuna Baruki mwana Neria, nyakulembanga. Pikhampanga ine na ndzidzi onthowo Baruki akhalemba mafala onsene akhali mumpukutu ukhadapisa Yehoiakimu mfumu wa Yuda ule mafala ontho akhadalembesa ine pakutoma ale.