Read cisena YEREMIA 37 Bible Online

YEREMIA 37 - cisena bible

YEREMIA 37

¹Mfumu Nebukadinezara wa ku Babiloni adapitisa Zedekia mwana Yosia ufumu wa Yuda; iye adapita m'mbuto mwa Yehoiakini mwana Yehoiakimu.

²Kwache nee Zedekia penu mathubu ache penu anthu ache adaikha konta tayu mafala adalonga MBUYA kudzera muna ine, mprofeti Yeremia.

³Mfumu Zedekia adatuma Yehukali mwana Shelemia pabodzi pene na Zefania mwana Maaseia nyansembe kuna ine na mphangwa zakuti, “Taphata miyendo ngatipemphererembo kuna MBUYA Mulungu wathu.”

⁴Ndzidzi wenewu ine ndikhali wakusudzuka kwenda pakati pa anthu, thangwi ine nee ndikhadadzati ikhwa m'perezo tayu.

⁵Anyankhondo a mfumu wa ku Iguputo adabuluka m'dziko mwawo, tenepo pidava anyankhondo a ku Babiloni ale ndzidzi wenewu akhasosa Yerusalemu, adathawa kubuluka ku Yerusalemu.

⁶Kubuluka penepo MBUYA adalonga kuna ine mbati,

⁷“MBUYA Mulungu wa Israele akulonga tenepa: Panga mfumu wa Yuda ule akutuma kuna ine kuti, ‘Anyankhondo a ku Iguputo akudza dzakuphedza. Kwache iwo anati abwerere kwawo.

⁸Tenepo anyankhondo a ku Babiloni anabwera mbasosa mzindawu. Iwo anaupokosera mbaupisa moto.’

⁹Ine MBUYA ndikulonga tenepa: Leka kupinyengeza wekha ene kunyerezera kuti anthu a ku Babiloni hanadza tayu; iwo anati adzedi.

¹⁰Podi kwene pichitike kuti ukwanise kukunda anyankhondo onsene a ku Babiloni anakusosani ale, towera pasale kwene anyakukuwazika kugona m'makumbi mwawo, amunawo anati alamuke basi mbapisa mzinda wenewu.”

¹¹Pidamala anyankhondo a ku Babiloni kuthawa Yerusalemu, thangwi ya anyankhondo a ku Iguputo,

¹²ine, Yeremia, ndidatoma kubuluka mumzinda kwenda kunthemba ya Benjemani kuti ndikatambire khundu ya pinthu pyanga pakati pa anthu a kweneko.

¹³Mbwenye pidafika ine pa Msuwo wa Benjemani, mkadamu wa anyakulondali dzinache Iria mwana Shelemia pontho mdzukuluache Hanania, adandiphata mbalonga mbati, “Kunachita iweku nkhuthawa anyankhondo a ku Babiloni.”

¹⁴Ine ndidatawira kuti, “Si pyakuona tayu. Ine nee ndikuthawa anyankhondo a ku Babiloni tayu. Mbwenye Iria hadavesere tayu pikhalonga ine pile tayu. M'mbuto mwache adandimanga mbaenda nane kuna mathubu.

¹⁵Mathubu ale adandizhangalira mbatonga kuti ndimenywe, pontho ndifungirwe m'nyumba ya Yonatani, nyakulemba m'thando ya miseru, ule nyumbache ikhadasanduswa perezo.

¹⁶Ine ndidaponywa m'kadyaboso yapansi, kule kudakhala ine ndzidzi ukulu ene.”

¹⁷Kubuluka penepo Mfumu Zedekia adandichemeresa, tenepo ndidadzeswa kunyumba yachifumu. Kweneko iye adandivunza chibiso-biso mbati, “Ayi pana mphangwa zakubulukira kuna MBUYA?” Ine, Yeremia ndidatawira kuti, “Ande, imwe munaperekwa m'manja mwa mfumu wa ku Babiloni.”

¹⁸Penepa ine, Yeremia ndidavunza Mfumu Zedekia kuti, “Mseru wasosa ine ngwanji, mseru una ine na imwe, mathubu anu penu anthu anu kuti mundiikhe nawo m'perezo?

¹⁹Maprofeti anu ali kupi, ale adalonga mphangwa zauprofeti kuna imwe mbati, ‘Mfumu wa ku Babiloni nkhabe dzachita nkhondo na imwe penu na mzindawu tayu’?

²⁰Kwache lero, mbuyanga mfumu, veserani kudungunya kwanga pamaso panu, pontho lekani kundibwezera kunyumba ya Yonatani nyakulemba, gopesera ndinafera konthoko.”

²¹Mfumu Zedekia adatonga kuti ine ndiikhwe muchintalo cha anyakulondali pontho kuti ndipaswe mikate nsiku na nsiku kubulukira kuna anyakuphika mikate mpakana mikate yonsene mumzindamo imalemo. Natenepo ine, Yeremia, ndidakhala muchintalo cha anyakulondali.