Read cisena YEREMIA 38 Bible Online

YEREMIA 38 - cisena bible

YEREMIA 38

¹Shefatia mwana Matani, Gedalia mwana Pashuri, Yehukali mwana Shelemia pontho na Pashuri mwana Malikia adava pinthu pyonsene pidalonga ine, Yeremia kuna anthu kuti

²MBUYA akulonga kuti, “Munthu onsene anakhala mumzindamu anati afe pankhondo, na njala, pontho na muliri, mbwenye munthu onsene anaenda kudziko ya Babiloni, anati akhale na moyo. Iye anati athawise moyo wache mbakhala na moyo.”

³Ndikhaapanga pontho kuti MBUYA akulonga kuti, “Mzinda wenewu unaperekwa m'manja mwa anyankhondo a ku Babiloni mbupokoserwa.”

⁴Penepo mathubu adalonga kuna mfumu mbati, “Munthu weneyu athema kuphiwa. Iye akuchitisa anyankhondo akusalira mumzinda muno, pontho na anthu onsene kugwa mfuwa na pinthu pinaapanga iyepi. Iye nkhabe chita pinthu pyakuphedza napyo anthu tayu, mbwenye kuavunga kwene basi.”

⁵Mfumu Zedekia adatawira mbati, “Iye ali m'manja mwanu. Chitani naye pyonsene pinafuna imwe. Ine, Mfumu, nkhabe pokanyisana napyo tayu.”

⁶Tenepo iwo adandiphata mbandigwisira mumchera wa Malikia mwana mfumu, ule ukhali muchintalo cha anyakulondali. Iwo adandichithisira na nkhambala mumchera; mumcheramo mukhali nkhabe madzi mbwenye mathaphwinya ene basi. Tenepo ine ndidabira m'mathaphwinyamo.

⁷Mbwenye Ebedi-Meleki munthu wa ku Kushi pontho thubu wa kunyumba yachifumu adava kuti ndagwisirwa mumchera. Pikhakhala mfumu pa Msuwo wa Benjemani,

⁸Ebedi-Meleki adabuluka panja kukhali mfumu kule mbalonga kuna iye mbati,

⁹“Mbuyanga mfumu, pyonsene pyachita anthuwa kuna mprofeti Yeremia mphyakudawika. Iwo amgwisira mumchera, mule anati akukutike na njala mbafa, thangwi mumzinda muno nkhabeve mikate tayu.”

¹⁰Tenepo mfumu adatonga Ebedi-Meleki munthu wa ku Kushi mbati, “Kwata amuna makumatatu mbakamnule Yeremia mumchera, iye mbadzati kufamo.”

¹¹Natenepo Ebedi-Meleki pabodzi pene na amuna ale adenda kusubi pansi pa chakukoyeramo kobiri m'nyumba ya chifumu. Iye adakwata nguwo zamasakala pontho zakung'ambika-ng'ambika mbazitchithisira mumchera mukhali ine mule pabodzi pene na nkhambala.

¹²Ebedi-Meleki munthu wa ku Kushi adalonga kuna ine mbati, “Ikha masakala na nguwo zakung'ambika-ng'ambikazo m'khaphwa mwako kuti ziphatise nkhambala.” Ine ndidachitadi tenepo,

¹³kubuluka penepo iwo adandikweya na nkhambala zile kundibulusa mumchera mule. Tenepo ndidathimiza kukhala muchintalo cha anyakulondali.

¹⁴Kubuluka penepo Mfumu Zedekia adandichemeresa, tenepo ndidadzeswa pamsuwo wachitatu wa Nyumba ya MBUYA. Tenepo mfumu adalonga kuna ine mbati, “Ine ndinati ndikuvunze chinthu chinango, tenepo leka kundibisira chinthu na chibodzi chene.”

¹⁵Ine ndidatawira kuti, “Ngakhala ndinakutawirani, ayi imwe nkhabe kundipha tayu? Podi kwene kuti ine ndikupaseni uphungu, imwe nee munauvesera tayu.”

¹⁶Mbwenye Mfumu Zedekia adadumbira pikulu pene kuna ine chibiso-biso mbati, “Ndinadumbira na dzina ya MBUYA ambatipasa muya ule, kuti ine sinakupha penu kukupereka m'manja mwa anthu anasaka-saka moyo wako ale tayu.”

¹⁷Tenepo ine ndidalonga kuna Zedekia kuti, “MBUYA Mulungu Wamphamvu zonsene, Mulungu wa Israele akulonga tenepa: Ngakhala imwe munaimisa manja kuna mfumu wa ku Babiloni moyo wanu unapulumuka pontho mzindawu hunapiswa tayu; imwe na banjanu munakhala na moyo.

¹⁸Mbwenye ngakhala imwe munakhonda kuimisa manja kuna mathubu a mfumu wa Babiloni, mzindawu unati uperekwe m'manja mwa anthu a ku Babiloni, tenepo iwo anaupisa moto; imwe maka nkhabe dzakwanisa kupulumuka tayu m'manja mwawo.”

¹⁹Mfumu Zedekia adalonga kuna ine mbati, “Ine ndikuchita mantha na Ayuda aenda ku Babiloni ale, thangwi anthu a ku Babiloni anakwanisa kundipereka m'manja mwawo, tenepo iwo anandivuya.”

²⁰Ine ndidatawira kuti, “Iwo nkhabe dzakuperekani m'manja mwawo tayu. Imwe mwathema kuvera MBUYA pakuchita pinthu pyonsene pinakupangani inepi. Tenepo pyonsene pinakufambirani mwadidi, pontho nkhabe dzaphiwa tayu.

²¹Mbwenye ngakhala munakhonda kuimisa manja, MBUYA andionesera kumasomphenya pinthu pinafuna dzachitika.

²²Akazi onsene akusalira m'nyumba yachifumu ya ku Yuda anaperekwa kuna mathubu a ku Babiloni. Tenepo akazi enewo analonga kuti, ‘Ashamwali anu akunyindirika akuphatisani fuwa mbakukundani. Manyalo anu alilima m'matope; ashamwali anu amala kukuthawani.’

²³“Akazanu na ananu onsene anabuluswa panja kuna anthu a ku Babiloni. Imwe ene nkhabe dzakwanisa kuapulumusa m'manja mwawo tayu, mbwenye munaphatwa na mfumu wa ku Babiloni; mzindawu unapiswa moto.”

²⁴Tenepo Zedekia adalonga kuna ine mbati, “Leka panga munthu na mbodzi ene pya pinthu pyalonga ifepi, gopesera unafa.

²⁵Ngakhala mathubu anava kuti ndidalonga nawe, iwo anati adze kuna iwe mbalonga kuti, ‘Ngatipange pidalonga iwe na mfumu, pontho pidalongambo mfumu kuna iwe; leka kutibisira, gopesera tinakupha.’

²⁶Mbwenye apange kwene kuti ukhandidembetera kuti ndileke kukutumiza pontho kuperezo ya m'nyumba ya Yonatani kuti ukafere konthoko.”

²⁷Kubuluka penepo mathubu onsene adadza kuna ine mbandivunza, tenepo ine ndidaapanga pyonsene pidandipanga mfumu pile. Natenepo mathubu ale hadalonge pinthu tayu, thangwi nkhabe na mbodzi ene akhadava pinthu pidalonga ine na mfumu pile tayu.

²⁸Ine ndidathimiza kukhala muchintalo cha anyakulondali mpakana nsiku idapokoserwa Yerusalemu.