Read cisena YEREMIA 39 Bible Online

YEREMIA 39 - cisena bible

YEREMIA 39

¹Mwezi wakhumi wa chaka chachinomwe Zedekia mbali mfumu wa Yuda, Nebukadinezara mfumu wa ku Babiloni adadza pabodzi pene na anyankhondo ache onsene dzachita nkhondo na mzinda wa Yerusalemu mbauzungulira.

²Pansiku yachifemba ya mwezi wachinayi wa chaka chakhumi na chibodzi cha ufumu wa Zedekia mpandawo udapholwa.

³Tenepo mathubu onsene a mfumu wa ku Babiloni adadza mbakhala pansi pa Msuwo Wapakati: penepo pakhali Nerigali-Sharezere wa ku Samugari, Nebo-Saresekimu thubu wamkulu, Nerigali-Sharezere thubu wachiwiri, pabodzi pene na mathubu anango onsene a mfumu wa ku Babiloni.

⁴Pidaaona Mfumu Zedekia wa ku Yuda na anyankhondo ache onsene, adathawa; iwo adathawa mumzindamo na mosiku na njira ya m'munda wa mfumu mbabuluka na pamsuwo wa pakati pa mafufu mawiri, tenepo adenderatu kuphedi ya Yorodani.

⁵Mbwenye anyankhondo a ku Babiloni adaathamangisa mbaphata Zedekia paphedi chifupi na Yeriko. Iwo adamkwata kwenda naye kuna Mfumu Nebukadinezara, ule akhali mumzinda wa Ribila m'nthemba ya Hamati. Kweneko Nebukadinezara adamtonga mseru.

⁶Kweneko ku Ribila Mfumu Nebukadinezara adapha ana onsene a Zedekia pamaso pache mbapha pontho amuna akufunika a mu Yuda.

⁷Tenepo iye adamkonombola maso mbammanga na njema kwenda naye ku Babiloni.

⁸Ndzidzi wenewu anthu a ku Babiloni akhadapisa kale nyumba yachifumu na nyumba za anthu mbagwisa mpanda wa Yerusalemu.

⁹Nebuzaradani mkadamu wa anyankhondo adaphata anthu adasalira mumzinda, pabodzi pene na anthu akhadaimisa manja kuna iye ale, pontho na anthu anango onsene kwenda nawo ku Babiloni.

¹⁰Kwache iye adasiya m'nthemba ya Yuda anthu akutcherengaletu, ale nkhabe na chinthu chene tayu; tenepo ndzidzi wenewo iye adaapasa minda yamfesa na minda inango ene.

¹¹Mfumu Nebukadinezara wa ku Babiloni akhadatonga pya Yeremia kudzera muna Nebuzaradani, mkadamu wa anyankhondo mbati,

¹²“Mkwateni mbamukamuyang'anire mwadidi; lekani kumkuwaza, mbwenye mchitireni pyonsene pinapempha iyepyo.”

¹³Tenepo Nebuzaradani mkadamu wa anyakulondali, Nebushazibani thubu wamkulu, Nerigali-Sharezere thubu wachiwiri, pabodzi pene na mathubu anango onsene a mfumu wa ku Babiloni

¹⁴adatuma amuna kabulusa Yeremia muchintalo cha anyakulondali. Iwo adampereka kuna Gedalia mwana Ahikamu pontho mdzukuluache Shafani kuti aende naye kumusa kwache. Tenepo iye adakhala pakati pa anthu ache.

¹⁵Pidafungirwa Yeremia muchintalo cha anyakulondali, MBUYA adalonga kuna iye mbati,

¹⁶“Ndoko kuna Ebedi-Meleki munthu wa ku Kushi kampanga kuti MBUYA Wamphamvu zonsene Mulungu wa Israele akulonga kuti: Ine ndili chifupi kudzesa pana mzindawu nyatwa zidalonga ine zile nee kufamba mwadidi kwa pinthu tayu. Pandzidzi wenewo ipyo pinakwana-kwana mwenemo iwe ukupiona na maso ako.

¹⁷Kwache pansiku yeneyo ine, MBUYA, ndinakupulumusa; iwe nkhabe dzaperekwa m'manja mwa anthu anagopa iwewa tayu.

¹⁸Ine ndinakupulumusa, iwe nkhabe dzafa tayu, mbwenye unathawisa moyo wako, thangwi iwe umbanyindira ine pano. Ndalonga ndine MBUYA.”