Read cisena YEREMIA 40 Bible Online

YEREMIA 40 - cisena bible

YEREMIA 40

¹MBUYA adalonga kuna Yeremia, pidamsudzula Nebuzaradani mkadamu wa anyankhondo ku Rama. Iye adagumana Yeremia amangwa na njema pakati pa anthu akhadaphatwa unyaperezo ale a ku Yerusalemu na Yuda mbaendeswa ku Babiloni dziko ya unyaperezo.

²Pidagumana mkadamu wa anyakulondali Yeremia, adalonga kuna iye mbati, “MBUYA Mulungu wako adalongeratu kuti anadzesa nyatwa yeneyi pana mzindawu.

³Tenepo chinchino MBUYA aidzesadi; iye apichita ninga montho mudalongera iye. Pyonsenepi pyachitika thangwi imwe anthu mwadawira MBUYA mbamukhonda kumvera.

⁴Kwache lero ndikukusudzula njema zili m'chuno mwakozi. Tende pabodzi na ine ku Babiloni, ngakhala unafuna ine ndinakuyang'anira mwadidi; mbwenye ngakhala hunafuna tayu, leka kwenda. Yang'ana dziko yonsene, iwe unakwanisa kusankhula, tenepo unakwanisa kwenda konsene kwene kunafuna iweko.”

⁵Kwache ine, Yeremia mbandidzati zungunuka kwenda pyache, Nebuzaradani adathimiza kulonga mbati, “Bwerera kuna Gedalia mwana Ahikamu pontho mdzukuluache Shafani, asankhulwa na mfumu wa ku Babiloni kuti ayang'anire maluwani a Yuda ule. Ndoko ukakhale naye pabodzi pakati pa anthu, penu uende pyako konsene kwene kunafuna iweko.” Kubuluka penepo mkadamu ule adampasa pyakudya na mtukwa, tenepo iye adenda pyache.

⁶Ine, Yeremia ndidenda kuna Gedalia mwana Ahikamu ku Mizipa mbandikakhala naye pabodzi kweneko pakati pa anthu adasalira m'dziko ale.

⁷Pidava akadamu a nkhondo na anthu anango onsene adasalira m'midzi ale kuti mfumu wa ku Babiloni akhadasankhula Gedalia mwana Ahikamu kukhala mkulu wa boma m'dzikomo. Pidapivambo iwo kuti iye adapasa utongi pana amuna, akazi na ana, anthu akutcherengaletu a m'dziko mule, ale hadakwatwe kwenda kudziko ya Babiloni tayu,

⁸iwo adenda kuna Gedalia ku Mizipa. Pakati pawo pakhali Ishimaele mwana Netania, Yohanani na Yonatani ana Karea, Seraia mwana Tanihumeti, ana Efai wa ku Netofa na Yaazania mwana Maaka pabodzi pene na amunawo.

⁹Gedalia adaatsikimizira mbati, “Lekani gopa kutumikira anthu a ku Babiloni. Khazikikani m'dzikomu mbamutumikire mfumu wa ku Babiloni, tenepo pinthu pyanu pyonsene pinakufambirani mwadidi.

¹⁰Ine ene ndinakhala mu Mizipa kukhala nyakukuimirirani kuna Ababiloni angabwera. Mbwenye imwe mwathema kuvuna mfesa na nsapo zinango mbamukoya vinyu na mafuta m'mabuyawo mwanu mbamukhala m'maluwani akwata imwe ale.”

¹¹Ayuda onsene a ku Moabu, Amoni, Edomu na madziko anango onsene adava kuti mfumu wa ku Babiloni asiya anthu anango mu Yuda, pontho kuti asankhula Gedalia mwana Ahikamu pontho mdzukuluache Shafani kukhala mtongi wawo.

¹²Natenepo iwo adadza ku Yuda kuna Gedalia ku Mizipa kubulukira kumadziko onsene kukhadabalaliswa iwo kule. Iwo adavuna mfesa na nsapo zakuinjipa pyakwanga.

¹³Yohanani mwana Karea na akadamu onsene ankhondo, akhakhala m'midzi ale, adadza kuna Gedalia ku Mizipa

¹⁴mbalonga mbati, “Kadi imwe nkhabe kupidziwa tayu kuti Baalisi mfumu wa Amoni atuma Ishimaele mwana Netania kuti akupheni?” Kwache Gedalia hadapikhulupire tayu.

¹⁵Tenepo Yohanani adalonga chibiso-biso kuna Gedalia mbati, “Nditawiriseni kapha Ishimaele, tenepo nkhabe munthu na mbodzi ene anafuna kupidziwa tayu. Thangwi yache ninji kuti iye anafuna kukuphani mbachitisa Ayuda onsene agumanyikana mwakukuzunguliraniwa kubalalika mbapakhonda salira munthu na mbodzi ene mu Yuda?”

¹⁶Mbwenye Gedalia adalonga kuna Yohanani mbati, “Leka chita chinthu ninga chenechi. Pinalonga iwe pya Ishimaele si pyakuona tayu.”