Read cisena YEREMIA 41 Bible Online

YEREMIA 41 - cisena bible

YEREMIA 41

¹Mwezi wachinomwe wachaka chenecho, Ishimaele mwana Netania mdzukuluache Elishama wa banja yachifumu, pontho mbodzi wa mathubu akulu a mfumu, adenda ku Mizipa pabodzi pene na amuna khumi kaona Gedalia mwana Eliakimu. Pikhadya iwo, pabodzi pene na

²Ishimaele na amuna khumi akhali na iye adalamuka mbampha na talasada Gedalia, munthu adasankhulwa na mfumu wa ku Babiloni kukhala mkulu wa boma m'dzikomo ule.

³Ishimaele adapha pontho Ayuda onsene akhali pabodzi pene na Gedalia ku Mizipa ale, pontho na anyankhondo a ku Babiloni akhali penepo ale.

⁴Mangwana mwache pidaphiwa Gedalia, munthu onsene mbadzati kupidziwa,

⁵amuna makumasere akubulukira ku Shekemu, Shilo na Samaria adafika. Iwo akhadachinga ndevu zawo, adang'amba nguwo zawo mbapicheka-cheka okha ene. Iwo akhadza na nsembe za mapira na pyakufukiza pyakununkhira ku Nyumba ya MBUYA.

⁶Ishimaele adabuluka ku Mizipa kagumanikana nawo uku akulira pikhaenda iye. Pidagumanikana iye nawo adalonga mbati, “Pitani muone Gedalia mwana Ahikamu.”

⁷Pidapita iwo mumzindamo Ishimaele, pabodzi pene na amuna khumi akhali na iye ale, adaapha mbaaponya mumchera.

⁸Mbwenye amuna khumi ale adalonga kuna Ishimaele mbati, “Lekani kutipha! Ife tina tirigu, barele, mafuta na manyuchi pyabisa ife m'munda.” Tenepo iye adaasiya mbakhonda kuapha pabodzi pene na anango ale.

⁹Mchera ukhadaponya iwo mitembo ya amuna onsene ale ukhali ukulu pyakwanga,[22] ule ukhadakumbisa Mfumu Asa kutchinjiriza nawo Baasha mfumu wa Israele. Ishimaele adadzaza mcherawo na mitembo.

¹⁰Ishimaele adakwata unyaperezo ana achikazi a mfumu pontho na anthu anango onsene adasalira mu Mizipa, ale Nebuzaradani mkadamu wa anyankhondo adaaikha pansi pa utongi wa Gedalia. Ishimaele adaakwata unyaperezo mbawambukira nawo ku Amoni.

¹¹Pidava Yohanani mwana Karea pabodzi pene na akadamu a anyankhondo onsene akhali na iye ale pya upandu onsene udachita Ishimaele,

¹²iwo adakwata amunawo onsene mbaenda kamenyana na Ishimaele. Iwo adaphatana nawo chifupi na thawale ikulu mu Gibeoni.

¹³Pidaona anthu onsene akhali na Ishimaele ale, Yohanani pabodzi pene na akadamu a anyankhondo akhali na iye ale adakomerwa pyakwanga.

¹⁴Anthu onsene adaphata Ishimaele ku Mizipa ale adatendeuka mbaenda kukhundu kwa Yohanani.

¹⁵Mbwenye Ishimaele na amuna masere akhali na iye ale adathawira ku Amoni kuthawa Yohanani.

¹⁶Tenepo Yohanani na akadamu a anyankhondo ale akhali na iye pabodzi adakwata kubulukira ku Mizipa anthu, adapulumusa iye m'manja mwa Ishimaele ale, pidamala iye kupha Gedalia: anyankhondo, akazi, ana, mathubu a kunyumba yachifumu akhadakwata iye kubulukira ku Gibeoni ale.

¹⁷Tenepo iwo adathimiza kwenda, mbwenye adaimira ku Geruti-Kimuhamu chifupi na Betelehemu panjira pawo kwenda ku Iguputo,

¹⁸kuthawa anthu a ku Babiloni. Iwo akhachita mantha nawo thangwi Ishimaele akhadapha Gedalia, adasankhula mfumu wa ku Babiloni kukhala mkulu wa boma wa dziko ule.