Read cisena YEREMIA 42 Bible Online

YEREMIA 42 - cisena bible

YEREMIA 42

¹Kubuluka penepo akadamu onsene a anyankhondo, kuthimizapo Yohanani mwana Karea na Azaria[23] mwana Hoshaia, pabodzi na anthu onsene, mkulu mpakana mwana, adadza kuna

²mprofeti Yeremia mbalonga kuna iye mbati, “Taphata miyendo ngava kupempha kwathu. Tipemphererembo kuna MBUYA Mulungu wako, kupempherera anthu akusalira a ife ale. Thangwi pakutoma ife tikhali azinji ene, mbwenye lero tasala akuchepa, ninga munapionera iwemu.

³Pemphera kuti MBUYA Mulungu wako ationese njira yathema ife kuitewera, pontho kutionesa pinthu pyathema ife kupichita.”

⁴Yeremia mprofeti adatawira mbati, “Ine ndava pyapempha imwe. Ine ndinati ndipemphere kuna MBUYA Mulungu wanu ninga mwapemphera imwe. Ndinakupangani pyonsene pinandipanga MBUYA mbandikhonda kukubisirani na chinthu chene.”

⁵Tenepo iwo adalonga kuna Yeremia mbati, “MBUYA mbakhale mboni wakuona pontho wakukhulupirika kupokanyisana na ife tingakhonda kuvera matongero onsene anakupasa MBUYA Mulungu wako kuti utipange.

⁶Podi pitikomere penu pikhonde kutikomera kwene tani ife tinati tivere MBUYA Mulungu wathu, kunakutuma ife kule, towera pinthu pyathu pifambe mwadidi, thangwi tinavera MBUYA Mulungu wathu.”

⁷Pidagwanda nsiku khumi MBUYA adalonga kuna Yeremia;

⁸natenepo iye adagumanyisa anthu onsene pabodzi pene na Yohanani, akadamu a anyankhondo akhali na iye ale, pontho na anthu onsene, mkulu mpakana mwana.

⁹Iye adalonga kuna iwo mbati, “MBUYA Mulungu wa Israele kudandituma imwe kukupemphererani kule akulonga tenepa:

¹⁰Ngakhala imwe munakhala m'dziko muno ndinakukhazikisani, mbandikhonda dzakuvungani; ndinakubzalani, mbandikhonda kukudulani, thangwi ndikutsukwala na nyatwa idakusanyisani ine nayo ile.

¹¹Lekani chita mantha na mfumu wa ku Babiloni, anagopa imwe chinchinoyi. Lekani kuchita naye mantha, thangwi ine ndili namwe. Ine ndinakupulumusani pontho kukuombolani m'manja mwawo. Ndalonga ndine MBUYA.

¹²Na thangwi yakuti ine ndine nyakuva nyambalo, ine ndinamchitisa kuva namwembo nyambalo, mbandikubwezerani pontho kudziko kwanu.

¹³“Kwache ngakhala imwe munalonga kuti, ‘Ife nkhabe khala m'dziko muno tayu,’ mbamukhonda vera MBUYA Mulungu wanu,

¹⁴pontho ngakhala munalonga kuti, ‘Nkhabe, ife tinaenda kakhala kudziko ya Iguputo, kule ife nkhabe kuona nkhondo, penu kuva kulira kwa ngoma kutichemera kunkhondo, penu kusowa mikate tayu;’

¹⁵penepo imwe anthu akusalira mu Yuda veserani pinalonga ine MBUYA Wamphamvu zonsene Mulungu wa Israele kuti: Ngakhala imwe mukuchita phinga kwenda ku Iguputo mbamuendadi kakhazikika kweneko,

¹⁶penepo nkhondo inagopa imwe ile inati ikupuluzeni kweneko, pontho njala inachita na imwe mantha ile inati ikutewereni, tenepo munafera konthoko.

¹⁷Ndimomwene, onsene ale anachita phinga kwenda ku Iguputo kakhazikika kweneko anafa pankhondo, na njala, pontho na muliri; nkhabe na mbodzi ene wa iwo anafuna dzasala na moyo, penu kuthawa nyatwa inafuna ine dzadzesa pana iwo ile tayu.

¹⁸MBUYA Wamphamvu zonsene, Mulungu wa Israele akulonga tenepa: Ninga montho mudakhuthulira ine ukali wanga na kuzhangali kwanga pana anthu a ku Yerusalemu, sasawambo ukali wanga unakhuthulirwa pana anthu enewa ngakhala imwe munaenda ku Iguputo. Imwe munasanduka anyadzedze, chinthu chakugumisa manungo, chakutemberera nacho, pontho chakusekesa. Imwe nkhabe dzaonave dzikoyi tayu.”

¹⁹Tenepo Yeremia adathimiza kulonga kuti, “Imwe anyakusalira na moyo a Yuda, MBUYA adakupangani kuti muonesese kuti muleke kwenda ku Iguputo. Ine ndakucheuzani lero

²⁰kuti imwe mudadawa pikulu pidandituma imwe kuna MBUYA Mulungu wanu, mbamulonga kuti, ‘Tipemphererembo kuna MBUYA Mulungu wathu, tipangeni pyonsene pinalonga iye pontho ife tinati tipichite.’

²¹Ine lero ndakupangani, kwache imwe nee mwavera MBUYA Mulungu wanu papyonsene pyandipanga iye kuti ndikupangenimbo.

²²Tenepo chinchino mupidziwe kuti imwe munafa pankhondo, na njala, pontho na muliri kudziko kunafuna imwe kwenda kakhazikikako.”