Read cisena YEREMIA 43 Bible Online

YEREMIA 43 - cisena bible

YEREMIA 43

¹Pidamala Yeremia kupanga anthu pyonsene pidalonga MBUYA Mulungu wawo, pyonsene pikhadampanga MBUYA kuti akaapange pile,

²Azaria mwana Hoshaia, Yohanani mwana Karea na amuna onsene akutumbama adalonga kuna Yeremia mbati, “Ukunama pyako! MBUYA Mulungu wathu hadakutume kulonga kuti ife nee tathema kwenda ku Iguputo kukhazikika kweneko tayu.

³Baruki mwana Neria ndiye akupasa chipapu chenechi kuti utipereke m'manja mwa anthu a ku Babiloni, towera iwo atiphe, penu kutikwata unyaperezo ku Babiloni.”

⁴Natenepo Yohanani mwana Karea na akadamu onsene a anyankhondo pontho na anthu onsene adakhonda kuvera matongero a MBUYA akuti akhale m'dziko ya Yuda.

⁵M'mbuto mwache Yohanani na akadamu onsene a anyankhondo adenda ku Iguputo na anthu onsene akusalira mu Yuda, ale akhadabwerera dzakhala mu Yuda kubulukira kumadziko onsene kukhadabalalikira iwo kule.

⁶Iwo adakwata pontho amuna onsene, akazi, ana, na ana achikazi a mfumu, ale adaikha Nebuzaradani mkadamu wa anyankhondo pansi pa utongi wa Gedalia mwana Ahikamu pontho mdzukuluache Shafani. Iye adakwata pontho mprofeti Yeremia na Baruki mwana Neria.

⁷Iwo adakhonda kuvera MBUYA mbapita mu Iguputo mbaenda mpakana ku Tapanesi.

⁸Kweneko MBUYA adalonga kuna ine, Yeremia mbati,

⁹“Mwenemo Ayuda akuona maso, kwata miyala mikulu-mikulu mbuifikhire pansi m'njira yakumangwa na njerwa pamsuwo wa nyumba ya mfumu wa ku Iguputo mu mzinda wa Tapanesi.

¹⁰Kubuluka penepo longa kuna iwo kuti: ‘MBUYA Wamphamvu zonsene Mulungu wa Israele akulonga kuti: ndinatuma nyabasanga Mfumu Nebukadinezara wa ku Babiloni, tenepo iye[24] anakhazikisa ufumu wache pamiyala yafikhira imwe[25] panoyi; iye anatandika khumbi yache yachifumu pana miyala yeneyi.

¹¹Iye anabwera dzavunga dziko ya Iguputo. Ale athema kufa na muliri anati afe na muliri, ale athema kukwatwa unyaperezo anati akwatwe unyaperezo, pontho ale athema kufa pankhondo anati afe pankhondo.

¹²Iye anapisa moto nyumba zakupembedzeramo milungu ya ku Iguputo; iye anapisa nyumba zawo zakupembedzeramo mbakwata mifanikizo yawo. Ninga mumbafindikira makabuswa chakufindika chache, sasawambo iye anakukutiza dziko ya Iguputo mbaenda pyache wakukhonda na kukolozeka kwene.

¹³Iye anavunga chiguwa chakupambulika cha Heliopolisi wa ku Iguputo, pontho anapisa nyumba zakupembedzeramo milungu ya mu Iguputo.’ ”