Read cisena YEREMIA 46 Bible Online

YEREMIA 46 - cisena bible

YEREMIA 46

¹Awa ndi mafala adalonga MBUYA kuna Yeremia pya madzinza anango:

²Kulonga pya Iguputo: Izi ndi mphangwa zakupokanyisana na anyankhondo a Mfumu Neko wa ku Iguputo, adakundwa na Nebukadinezara mfumu wa ku Babiloni ule, pa Karikemishi chifupi na mkulo wa Yufurate chaka chachinayi Yehoiakimu mbali mfumu wa Yuda:

³“Sasanyani pyakugedera matswimo pyanu pikulu-pikulu na ping'ono-ping'ono pene; bulukani kwenda kunkhondo pamulikiti!

⁴Sasanyani akavalo anu mbamukapakirepo, Ndandalikani mbuto zanu za nkhondo; valani pipewu pyasimbi. Nozwani madipanu; valani pida pyanu pyankhondo.

⁵Ninji chinaona ine? Iwo akuchita mantha mbachita fundamtako; anyankhondo awo amphamvu amala kundwa. Iwo akuthawa mbakhonda kucheuka, pontho kukhundu zonsene kuna pyakugoswa. Ndalonga ndine MBUYA.

⁶Anyakululupa miyendo nkhabe kwanisa kuthawa, anyamphamvu nkhabe kwanisa kumzwenga tayu, Kumpoto chifupi na mkulo wa Yufurate, iwo akugwegweduka mbagwa.

⁷“Mbani weneyu anakukuma ninga mkulo wa Nailo, ninga mkulo wakutayikira?

⁸Ndi Iguputo ule ambakukuma ninga mkulo wa Nailo, ninga mkulo wakutayikira. Iguputo adalonga mbati, ‘Ine ndinakukuma mbandidya dziko yapansi; ndinavunga mizinda na anthu awo ene.’

⁹Kutumukani, imwe, akavalo! Anyakufambisa pingolo mbapithamangise pyakwanga! Likitikani imwe anyankhondo a mphamvu, amuna a ku Kushi[26] na Puti, imwe anyakuthukula pyakugedera matswimo, pontho amuna a ku Ludi anyakudziwa kukweya mauta.

¹⁰Kwache nsiku yeneyo nja Mbuya, MBUYA Wamphamvu zonsene, Nsiku yakubwezera kwache, kubwezera pyonsene pidamchita anyamalwache. Talasada inati iadye mpakana kukhuta, inati imwe chiropa mpakana nyota kumala. Thangwi Mbuya, MBUYA Wamphamvu zonsene, anathira nsembe m'dziko yakumpoto chifupi na mkulo wa Yufurate.

¹¹“Ndokoni ku Gileadi[27] mbamukasake mitombwe! Imwe anthu a ku Iguputo, Mitombwe yanu yonsene imbanyindira imwe ile lero nkhabeve basa, nkhabeve kwanisa kukuwangisani tayu.

¹²Madzinza anava pyakuchitisa manyadzo pinafuna dzakuchitikirani pile; chiliro chanu chafika konsene kwene. Anyankhondo anagwegwedusana, onsene uwiriawo anagwa pansi.”

¹³Pidadza Mfumu Nebukadinezara wa ku Babiloni dzachita nkhondo na Iguputo MBUYA adalonga kuna Yeremia mprofeti mbati,

¹⁴“Lalika penepi m'maluwani a mu Iguputo, pilonge penepi mu Migidoli; pilalike pontho mu Memfisi na Tapanesi. Khalani m'mbuto zanu za nkhondo mbamusasanyike, thangwi talasada ikudya anthu akuzunguliraniwa.

¹⁵Thangwi yache ninji anyankhondo ako achitiswe manyadzo? Iwo nkhabe kwanisa kuimisana nawo tayu, thangwi MBUYA anamala kuagwisa onsenewo.

¹⁶Iwo anagwegweduka njira yonsene, mbagwerana pyawo okhokha. Iwo analonga kuti, ‘Lamukani tendeni tibwerere kwathu, kudziko idabalwa ife, kuthawa talasada ya anyakutiboneresayi.’

¹⁷Mtchanduleni Mfumu wa ku Iguputo dzina yachinchino, ‘Mfumu Tchotcho, wakutaya mwayi.’

¹⁸Ine ninga wamoyo, pontho Mfumu, MBUYA Wamphamvu zonsene, ndikudumbira kuti: mbodzi wakukhala ninga Tabori pakati pa mapiri, pontho ninga Karimele m'khundu-khundu mwa Bara anati adze.

¹⁹Mangani mitolo yanu kwenda kudziko ya unyaperezo, imwe anyakukhala m'dziko ya Iguputo, thangwi Memfisi anasanduka thando yatchetcha, pontho madembe mbamukhonda khala anthu.

²⁰“Iguputo akhala ninga ng'ombe yakubalika, kwache bulula ikudza pana iye kubulukira kudziko yakumpoto.

²¹Anyankhondo ache aganyo akhala ninga anamphulu akunenepa. Iwo anazungunuka mbathawa pabodzi, iwo nkhabe kwanisa dzaimira tayu, thangwi nsiku yakuchekwa ikudza pana iwo, nsiku inafuna iwo dzavungwa ile.

²²Aiguputo anathawa ninga nyoka, ndzidzi unalikitika anyamalwawo. Iwo anabwera kuna iwo na mbadzo, ninga anyakugwanda miti.

²³Iwo anagwisa miti ya mumsitu, podi iphophe pyawo tani. Iwo ngakuinjipa pyakwanga kupiringana nyadzombe, iwo nkhabe kwanisa kulengeseka tayu. Ndalonga ndine MBUYA,

²⁴Anthu a ku Iguputo anachitiswa manyadzo, anaperekwa m'manja mwa anthu akumpoto.”

²⁵MBUYA Wamphamvu zonsene, Mulungu wa Israele akulonga kuti, “Ine ndili chifupi kutchunyusa Amoni, milungu ya ku Tebesi, mfumu wa Iguputo, dziko ya Iguputo na milungu yache ene, na mafumu ache ene pontho na anthu ambanyindira mfumu wa Iguputo ale.

²⁶Ine ndinaapereka m'manja mwa anthu ambasaka-saka moyo wawo ale, kuna Nebukadinezara mfumu wa ku Babiloni na mathubu ache ene. Kwache m'nduli mwache anakhalamo pontho m'dziko ya Iguputo, ninga mudachitira iwo pakutoma. Ndalonga ndine MBUYA.”

²⁷“Leka chita mantha, Yakobo nyabasanga; leka taya mtima, iwe Israele. Ine ndinati ndikupulumuse kukubulusa kudziko ya kutali, pontho kupulumusa pidzukulu pyako kubulukira kudziko ya unyaperezo kule. Yakobo anakhala pontho pamtendere, pontho pakupata, nkhabe munthu na mbodzi ene anafuna dzamgoswa tayu.

²⁸Leka chita mantha, iwe Yakobo nyabasanga, thangwi ine ndinakhala nawe. Podi kwene kuti ndivunge madzinza onsene kudakubalalisa ine kule, ine sinakuvungiratu tayu. Mbwenye ine nkhabe leka kukhonda kukutchunyusa, kwache ndinakutchunyusa mwachilungamo. Ndalonga ndine MBUYA.”