Read cisena YEREMIA 48 Bible Online

YEREMIA 48 - cisena bible

YEREMIA 48

¹MBUYA Wamphamvu zonsene, Mulungu wa Israele akulonga pya Moabu kuti, “Dzedze kuna mzinda wa Nebo, thangwi anamala vungwa. Kiriataimu analulupiswa mbaphatwa; mpandache wamphamvu unachitiswa manyadzo mbugomolwa.

²Moabu nkhabe dzakhalave na mkola tayu; anyamalwa anasasanya pyakusosa Heshiboni: ‘Tendeni tiipuluze dzinza yeneyi.’ Iwembo Madimeni unaphopha mulomo; talasada inati ikuthamangiseni.

³Veserani ku Horonaimu chiliro, chiliro cha dzunguzo na kuvungika.

⁴Moabu anati avungwe; akachiyache anati akalale.

⁵Iwo akukwira ku Luhiti, uku akulira pikulu pene; m'njira yakubidira ku Horonaimu chiliro chakusanyika thangwi ya kuvungika kwa pinthu chikuveka.

⁶Thawani! Pulumusani moyo wanu; thamangani ninga mbidzi ya m'thando yatchetcha.

⁷Podi imwe mumbanyindira mabasanu pontho mfuma ina imwe, na imwe enembo munaphatwa, pontho Kemoshi anaendeswa kudziko ya unyaperezo pabodzi pene na anyansembe na mathubu ache ene.

⁸Nyakuvunga anabwera pana luwani yonsene, tenepo nkhabe luwani inafuna dzapulumuka tayu. Maphedi anasakazika, pontho pitunda pinavungwa. Ndalonga ndine MBUYA.

⁹Wazani munyu pana Moabu thangwi iye anasanduka madembe; maluwani ache anamala thawiwa, mbapasowa munthu na mbodzi ene wakukhalamo.

¹⁰“Dzedze kuna nyachinyindo pabasa ya MBUYA! Dzedze kuna nyakukhonda cholola talasadache kuchuchisa chiropa.

¹¹Moabu wakhala pakupata kutomera uphaleache, ninga vinyu wakusalira pansiletu, wakukhonda khuthulirwa m'mulinga na mulinga; iye hadaphatwe kwenda kudziko ya unyaperezo tayu. Natenepo iye ngwakudzipa pyakwanga ninga mwakale, pontho okhonda mala ngwadi-gwadi wache.

¹²Ine, MBUYA, ndikulonga kuti ndzidzi unati udze unafuna ine dzatumiza amuna, ale anakhuthulira vinyuyu m'milinga kumkhuthulira pansi; iwo anaswa milinga ya pezi mbaphumudza mabuyawo ache.

¹³Tenepo Moabu anachita manyadzo na Kemoshi, milungu yawo, ninga montho mudachitira manyadzo Aisraele, ndzidzi ukhanyindira iwo milungu Betele.

¹⁴“Ayi munalonga tani kuti, ‘Ife ndife anyankhondo amphamvu, amuna aluso pankhondo’?

¹⁵Moabu anavungwa, maluwani ache mbapokoserwa; aphale ache anakwatwa kwenda kachekwa. Ndalonga ndine Mfumu, ule dzinache ndi MBUYA Wamphamvu zonsene.

¹⁶Kuvungwa kwa Moabu kuli nenene, nyatwache inati ifike chinchino pano.

¹⁷Msintilini Moabu, imwe atsanthembache onsene; ale onsene mumbava pya kuveka kwache. Longani kuti, ‘Mama ine, ndodo yache yachifumu yakhoboka, ndodo yache yademelero yatchoka.’

¹⁸“Imwe anyakukhala ku Diboni, tchithani pambuto zanu zachilemedzozo, mbamukhala pansi pa fumbi; thangwi nyakufuna kuvunga Moabu anati adze, iye anadza pana imwe, mbavunga maluwani anu onsene akutchingwa na mpanda.

¹⁹Imirani m'khundu mwa njira mbamuone, imwe anyakukhala mu Aroeri. Mvunzeni mamuna anathawayo, mbamumvunze mkazi anayesera kupulumusa moyo wacheyo kuti, ‘Kwagwanji?’

²⁰Moabu amala lulupiswa, thangwi iye amala vungwa. Lirani pontho kalalani! Kapilalikeni na m'khundu-khundu mwa mkulo wa Arinoni kuti Moabu amala vungwa.

²¹Kutonga kwa MBUYA kwatchithira mizinda ya pamapiri, pana Holoni, Yaza, na Mefaati;

²²pana Diboni, Nebo na Beti-Dibilataimu,

²³pana Kiriataimu, Beti-Gamuli na Beti-Meoni

²⁴pana Kerioti na Bozira, pana maluwani onsene a Moabu a chifupi na akutali ene.

²⁵Nyanga ya Moabu yagwandika; mkono wache wakhumuka. Ndalonga ndine MBUYA.”

²⁶MBUYA akulonga kuti, “Muledzereseni thangwi iye adapandukira MBUYA. Mulekeni pyache Moabu athubudze m'matapiko ache; iye mbasanduke chinthu chakusekesa kuna anthu.

²⁷Ayi Israele kuna iwe hakhalimbo tayu chakusekesa? Kuphatwambo pakati pa mbava kudachita iye, ayi iwe ungalonga pya penepi, msolo wako umbakula tayu?

²⁸Bulukanimo m'maluwani mwanumo mbamukakhale m'miyala, imwe anyakukhala mu Moabu. Khalani ninga jiwa wakumanga nsanjache kukanwa kwa nkhwimba.

²⁹“Ife tava pya kulunkuma kwa Moabu, pya kudungudza na kutumbama kwache, na kugaya na kupithemba kwache konsene pontho kupiikhamo kwache.

³⁰Ine, MBUYA, ndimbadziwa pya kugaya kumbachita iye, kwache iye nkhabe fika napyo kutali tayu; kutumbama kunachita iyeko nkhwapezi nako.

³¹Natenepo ine ndikulira thangwi ya Moabu, ndikukalala thangwi ya Moabu onsene. Ndikusintili anthu a ku Kiri-Hareseti.

³²Ndikulirira anthu a ku Sibima kupiringana mumbalirira ine anthu a ku Yazere. Mfesa za Sibima, nthambi zako zavata mpakana ku Bara; izo zatanthawira mpakana kubara ya Yazere. Nyakuvunga afika pana nsapo zamfesa zako zakutoma kutokota zile.

³³Kukomerwa na kusekera kule kwamalamo m'minda ya nsapo na minda inango ene mu Moabu. Ine ndalekesa kukuka kwa vinyu, kubulukira kudzenje yakutchitchithira vinyu; nkhabe na mbodzi ene akuponda-ponda mphezazo na kukomerwa. Podi kwene kuti muna mkhuwo, kwache mkhuwo si wakukomerwa nawo tayu.

³⁴“Chiliro chawo chikuveka na ku Eleale mpakana ku Heshiboni na Yahazi, na ku Zoari mpakana ku Horonaimu pontho ku Egilati-Shelishia, podi na madzi ene a mu Nimurimu amala uma kakata.

³⁵Mu Moabu, ine ndinamalisamo anyakupereka nsembe pambuto za chipembedzo, pontho na anyakufukiza pyakununkhira kuna milungu yawo. Ndalonga ndine MBUYA.

³⁶“Natenepo mtimanga ukulira Moabu ninga chitoliro; ukulira ninga chitoliro kulira amuna a ku Kiri-Hareseti. Mfumawo yonsene yamala balalika.

³⁷Msolo onsene wamala chingwa, pontho ndevu zawo zonsene zamala chingwa; mikono yonsene yamala chekwa-chekwa, pontho m'chuno mwawo mwamala vala masakha.

³⁸Pansoyi zonsene za nyumba m'Moabu, pontho na m'misika muna kusintili basi, thangwi ndaswa Moabu ninga mulinga ule munthu nkhabe kuufunave tayu. Ndalonga ndine MBUYA.

³⁹Moabu amatamiswa! Moabu akukalala. Moabu akubwerera na manyadzo! Moabu asanduka chinthu chakusekesa, pontho chinthu chakugumisa manungo kuna atsanthembache onsene.”

⁴⁰MBUYA akulonga kuti, “Yang'anani! Mphamba akuphama pansi uku maphaphido ache ali ndataa pana Moabu.

⁴¹Mizinda ya Kerioti inapokoserwa, pontho mipandache yamphamvu inapokoserwa. Ndzidzi wenewo ungafika mitima ya anyankhondo amphamvu a ku Moabu inakhala ninga mitima ya akazi amimba pakulekwa.

⁴²Moabu anavungwa mwakuti nkhabe dzakhalave dzinza tayu, thangwi iye apandukira MBUYA.

⁴³Pyakugoswa, milindi na misampha pikudikhira anthu a ku Moabu. Ndalonga ndine MBUYA.

⁴⁴Nyakuyesera kuthawa pyakugoswa penepiyo, anagwera m'mulindi, pontho nyakuyesera kubuluka m'mulindimo anakweshwa na msampha, thangwi ine, MBUYA, ndaikha ndzidzi wakuvungika kwa Moabu.

⁴⁵M'mithunzi ya Heshiboni, anyakuthawa kwawo ali thekwa-thekwa kusowa basa, thangwi moto wavumbuluka kubulukira ku Heshiboni, kugaka kubulukira mu Sihoni; ukupisa akadamu a ku Moabu, kupisa pibade pyamsolo pya anyakunyada.

⁴⁶Una dzedze ndiwe Moabu! Anthu a ku Kemoshi amala vungwa; ananu achimuna amala endeswa kudziko yantomi, pontho ananu achikazi amala phatwa ninga anyaperezo.

⁴⁷“Kwache ndzidzi ukudza unafuna ine dzachitisa pinthu pya Moabu kufamba pontho mwadidi. Ndalonga ndine MBUYA.” Kutchunyuswa kunafuna MBUYA dzachita Moabu kwamalira penepa.