Read cisena YEREMIA 49 Bible Online

YEREMIA 49 - cisena bible

YEREMIA 49

¹MBUYA akulonga pya Amoni kuti, “Ayi Israele nkhabe ana achimuna? Ayi nkhabe anango anafuna iye dzasiyira mfumache? Thangwi yache ninji mphapo Moleki apokosera Gadi pinthu pyache? Ninji anthu ache akukhala m'maluwani a Gadi?

²Kwache ndzidzi ukudza unafuna ine, MBUYA, dzachitisa mgogogo wa nkhondo kuveka mu Raba, m'nthemba ya Amoni. Raba anasanduka mulu wa madongolomwa pontho midzi yonsene yakuzungulira inapiswa moto. Penepo Aisraele anathamangisa m'dzikomo anthu adaathamangisambo ale. Ndalonga ndine MBUYA.

³“Kalala, iwe Heshiboni thangwi mzinda wa Ai wamala vungwa! Khuwani, imwe anyakukhala mu Raba! Valani masakha mbamusintili; thamangani uku na uku mumpandamo, thangwi Moleki anaendeswa kudziko ya unyaperezo pabodzi pene na anyansembe pontho na mathubu ache ene.

⁴Mwatani munatumbama na maphedi anuwo, kudungudza kuti ana mataka akubalisa pinthu? Imwe anthu okhonda khulupirika kunyindira mfumanu mbamulonga kuti, ‘Nkhabe unango anafuna dzandisosa tayu.’

⁵Ine ndinati ndidzese pyakugoswa pana imwe kubulukira kuna atsanthembanu. Ndalonga ndine Mbuya, MBUYA Wamphamvu zonsene. Munthu onsene wa imwe anati athamangiswe; nkhabe unango anafuna dzagumanyisa anyakuthawa tayu.

⁶“Kwache m'nduli mwache ndinachitisa pontho pinthu pya Aamoni kufamba mwadidi. Ndalonga ndine MBUYA.”

⁷MBUYA Wamphamvu zonsene akulonga pya Edomu kuti, “Ayi mu Temani nkhabemo nyanzeru tayu? Ayi mapungu udziwisi waamalira? Ayi nzeru zanu zamala vunguma?

⁸Zungunukani mbamuthawe, bisalani kungolokodyo za nkhwimba, imwe anyakukhala mu Dedani, thangwi ine ndinadzesa nyatwa pana pidzukulu pya Esau, ndzidzi unafuna ine dzaatchunyusa ule.

⁹Ngakhala anyakutchola mfesa anadza kuna iwe, ayi iwo nkhabe siya na nsapo zene tayu? Ngakhala mbava zinadza kuna iwe na mosiku, ayi iwo nkhabe kwata kwene pinthu pinafuna iwo tayu?

¹⁰Mbwenye Esau ndinamsiya chitakwa-takwa; ine ndinabwanyula mbuto zache zakubisala, towera achimwane kupibisa yekha ene. Anache, abale ache na atsanthembache ene anamala kufa, pontho iye hanaonwave tayu.

¹¹Siya anako masiye; ine ndinatchinjiriza moyo wawo. Amamfelwako anakwanisa kunyindira ine pano.”

¹²MBUYA akulonga tenepa: “Ngakhala anthu ale hadatheme kumwa khomitcho ya nyatwa tayu, athema kuimwadi, ayi thangwi yache ninji ndikusiye kwene okhonda kukutchunyusa? Iwe hunaenda kwene okhonda tchunyuswa tayu, mbwenye wathemadi kumwa khomitchoyo.

¹³Ine ndinadumbira na dzinanga kuti mzinda wa Bozira unavungwa mbusanduka chinthu chakugumisa manungo, chinthu chakusekesa, pontho chakutemberera nacho; midzi yache yonsene ya chifupi inasanduka madembe kwenda na kwenda. Ndalonga ndine MBUYA.”

¹⁴Ine ndava mphangwa zakubulukira kuna MBUYA. Nyamphangwa adatumwa kuna madzinza kulonga kuti, “Gumanyikanani mbamusasanyike kachita nkhondo na mzindawo. Lamukani muende kunkhondo!

¹⁵“Ine, MBUYA, ndinakuchepesa pamaso pa madzinza anango onsene mbukhondwa pakati pa anthu.

¹⁶Kutumbama kwako kwakunyengeza, nkhabe na mbodzi ene anakugopave ninga mumbapinyerezera iwe mule tayu, iwe nyakukhala kungolokodyo za miyala pontho na pansonga za mapiri. Podi kwene kuti udamanga pisa pyako kunsongaletu ninga mphamba, ine ndinati ndikudedzule penepo. Ndalonga ndine MBUYA.

¹⁷Edomu anasanduka chinthu chakugumisa manungo; onsene anyakugwanda na penepo anatutumuka mbaseka, thangwi ya kuona pironda pyache pyonsene pina iye.

¹⁸Ninga montho mudavungirwa Sodomu na Gomora, pabodzi pene na maluwani awo akuazungulirawo; sasawambo nkhabe munthu anakhala mwenemo tayu; nkhabe na mbodzi ene nyakufuna dzapondamo tayu. Ndalonga ndine MBUYA.

¹⁹“Ninga nkhalamu yakubulukira mumsitu wa Yorodani kwenda ku mpovu, ine ndinathamangisa Edomu m'dziko mwache mwakututumusa. Mbani munthu wache wakusankhulika anafuna ine dzampasa basa yeneyi? Mbani akhala ninga ine pano, pontho mbani anakwanisa kuimisana nane? Ngupi makabuswache anakwanisa kuketesana na ine?

²⁰Natenepo veserani manyerezero a MBUYA kupokanyisana na Edomu, pontho pinthu pinafuna iye kupichita pana Temani: Anawo ene anambuluthwa, pontho anthu anatutumuka thangwi ya dzedze idaagwera ile.

²¹Na kugwa kunafuna dzachita Aedomu, dziko yapansi inatetemera; chiliro chawo chinaveka na ku Nyanza Yakufira.

²²Yang'anani mphamba unaphama pansi uku maphaphido ache ali ndataa pana Bozira! Pansiku yeneyo anyankhondo amphamvu a Edomu anachita mantha pyakwanga ninga mkazi wamimba pakulekwa.”

²³MBUYA akulonga pya Damasiko kuti, “Hamati na Aripadi aswipa mtima thangwi ava mbiri yakupasa mantha. Iwo ataya mtima ninga mabimbi a nyanza ale nkhabe kwanisa kumbombowa tayu.

²⁴Damasiko agoboka m'mabondo, tenepo azungunuka mbathawa. Iye ali pampani-pani pikulu pene; kutsukwala na mtswotswo pyamphata ninga mkazi wamimba pakulekwa.

²⁵Thangwi yache ninji mzinda wakuveka ule, lero wasandukiratu madembe, mzinda ukhakomerwa kale ule?

²⁶Ndimomwene aphale ache anaphiwa m'misewu ya mzinda; anyankhondo ache anamalwa mphamvu pansiku yeneyo. Ndalonga ndine MBUYA Wamphamvu zonsene.

²⁷Ndinagasa moto mpanda wa Damasiko; ndinadumika moto mbuto zakutchingwa na mpanda za Mfumu Beni-Hadadi.”

²⁸MBUYA akulonga tenepa pya dzinza ya Kedara na maufumu a Hazori adakundwa na Nebukadinezara mfumu wa ku Babiloni ale: “Ndoko kachite nkhondo na Kedara, pontho kavunge anthu akumabulukiro dzuwa.

²⁹Makumbi awo na mikumbi ya pifuyo pyawo pinakwatwa; nguwo zakutchinga nazo, pinthu pyawo pyonsene na ngamila zawo zene pinapokoserwa. Anthu anakhuwa kuna iwo mbati, ‘Pyakugoswa pili kukhundu zonsene zene!’

³⁰“Chimbizani kuthawa! Kabisaleni kunkhwimba, imwe anthu a ku Hazori. Ndalonga ndine MBUYA. Nebukadinezara mfumu wa ku Babiloni asasanya pya kukuphani; iye asasanya njira zakukupuluzani nazo.

³¹“Lamukani tikachite nkhondo, ife tinati tikasose anthu analonga kuti ali pakupata ale. Mzinda ule nkhabe misuwo penu mphinga tayu, pontho iyo nkhabe londalwi mwadidi tayu.

³²“Ndinakwata ngamila na pifuyo pyawo. Ndinabalalisa konsene kwene anthu ana mtemo wakuchinga tsisi yawo[28] ale, pontho ndinadzesa nyatwa pana iwo kubulukira kukhundu zonsene.

³³Hazori anasanduka mbuto yakukhala matika, pontho madembe kwenda na kwenda. Nkhabe na mbodzi ene anafuna dzakhalamo pontho tayu. Ndalonga ndine MBUYA.”

³⁴MBUYA adalonga kuna Yeremia mprofeti pya Elamu, pyaka pyakutoma pya Zedekia mfumu wa Yuda.

³⁵MBUYA Wamphamvu zonsene akulonga tenepa: “Yang'anani, ine ndinatchola mauta a anthu a ku Elamu, pinthu pile pagona mphamvu zawo.

³⁶Ndinadzesa pana Elamu mphepo kubulukira kunkhomo zonsene zinayi; ine ndinaabalalisa kunkhomo zonsene zinayi, tenepo nkhabe dzasala dzinza na ibodzi ene kule kunakhonda funa dzathawira anthu enewa.

³⁷Ndinachitisa anthu a ku Elamu kugopa anyamalwawo, anthu anasaka-saka pyakupha moyo wawo ale. Na thangwi ya ukali wanga wakugoswa, ndinadzesa nyatwa pana iwo. Ndinaathamangisa na talasada mpakana ndimale kuapuluza monsene mwene. Ndalonga ndine MBUYA.

³⁸Ndinakhazika mpando wanga wachifumu mu Elamu mbandivunga mafumu na akadamu awo ene. Ndalonga ndine MBUYA.

³⁹“Kwache ndzidzi unadzawo ndinachitisa pontho pinthu pya Elamu kufamba mwadidi. Ndalonga ndine MBUYA.”