Read cisena YEREMIA 51 Bible Online

YEREMIA 51 - cisena bible

YEREMIA 51

¹MBUYA akulonga kuti, “Yang'anani, pana Babiloni, ine ndikulamusa mphepo yakuvunga,[30] pontho na pa anthu a ku Lebo-Kamai.

²Ndinatumiza alendo ku Babiloni kamvunga ninga mumbachitira mphepo kupepesa maudzu; nsiku yakuvunga ingafika, iwo anachita naye nkhondo kukhundu zonsene mbasiya m'dzikomo mwakusowa na chinthu chene.

³Lekani tawirisa anyamauta kukunga mautawo; penu kuatawirisa kuvala pida pyawo pyankhondo. Lekani siya na moyo aphale ache na mbodzi ene; vungani anyankhondo ache monsene mwene.

⁴Iwo anakhala gwenjere-gwenjere m'dziko ya Babiloni uku amala chekwa pakhosi m'misewu.

⁵Thangwi Israele na Yuda hadapaswe nkhodolo tayu na Mulungu wawo, MBUYA Wamphamvu zonsene, podi kwene kuti m'dziko mwawomo mwadzala na pyakudawa pamaso pa Nyakuchena wa Israele.

⁶“Thawani kubuluka mu Babiloni! Thawisani moyo wanu! Lekani tawira kuvungwa thangwi ya pyakudawa pyache. Uno ndi ndzidzi wache MBUYA kuti abwezere; iye anati abwezere malingana na pinthu pidachita iye.

⁷Babiloni akhakhala ninga khomitcho yagolidi m'manja mwa MBUYA; adaledzeresa anthu onsene a padziko yonsene yapansi. Iye adaledzeresa madzinza na vinyu wache; natenepo iwo amala yaluka.

⁸Babiloni anati agwe mbagomoka kabodzi kene. Lirani thangwi ya Babiloni. Mpaseni mtombwe thangwi ya mtswotswo unava iyewo; mwinango anakwanisa kuwangiswa.

⁹Alendo a ku Babiloni adalonga mbati, ‘Ife mbatidawangisa Babiloni, kwache iye nkhabe kwanisa kuwangisika tayu; mbatendeni timsiye pyathu, munthu onsene kwenda pyache kwawo, thangwi Mulungu amtchunyusa na mphamvu zache zonsene, pontho amala kumvunga monsene mwene.’ ”

¹⁰MBUYA akulonga kuti, “Anthu anga akulonga kuti, ‘MBUYA ationesa kuti ife nee tadawa tayu; tendeni, tipangembo anthu a ku Zioni pinthu pyachita MBUYA Mulungu wathu.’

¹¹“Nozwani matswimo, kwatani pyakugedera matswimo! MBUYA anyandula mafumu a ku Media thangwi pinafuna iye pene nkhuvunga Babiloni basi. MBUYA anati abwezere, kubwezera thangwi ya kuvungika kwa Nyumbache.

¹²Kwizani m'dzulu bandera ninga chidziwiso kugomola mpanda wa Babiloni! Khazikisani anyakutchinjiriza amphamvu, ikhani anyakulondali m'mbuto zawo, pontho ikhani anyankhondo kubisala m'tsanga! MBUYA anati achite pinthu pyanyerezera iye kupichita kuna anthu a ku Babiloni.

¹³Imwe ale anyakukhala chifupi na mikulo mizinji, ale muna mfuma kutapa kutaya, lero ndzidzi wanu wakwana ndzidzi wakuti mubuluswe padziko yapansi.

¹⁴MBUYA Wamphamvu zonsene adumbira na dzinache: Ndinati ndidzaze dziko yako na anyankhondo ninga uwumbi-wumbi wa nyadzombe, tenepo iwo anakhuwa thangwi ya kukunda kwawo.”

¹⁵Na mphamvu zache MBUYA adasasanya dziko yapansi; iye adatanda dziko yapansi na nzeru zache, pontho na udziwisi wache iye adafuthula thambo.

¹⁶Iye angadima, madzi a kudzulu[31] ambavunduka; iye ambachitisa makole kukwira kudzulu kubulukira kumadolomero a dziko yapansi. Iye ambatumiza njazi pabodzi pene na mvula mbafungulira mphepo m'masubi mumbaikoya iye.

¹⁷Munthu onsene nkhabe nzeru, pontho nkhabe udziwisi tayu; nyakufula golidi onsene akuchita manyadzo na mifanikizo yasasanya iye ile. Milungu yasasanya iye njakupupwa; iyo nkhabe na muya ene tayu.

¹⁸Iyo njakusowa basa, pinthu pyakupasa ntchekwa; iyo inati ivungwe nsiku inafuna MBUYA dzatonga mseru.

¹⁹Iye ule ndi Mulungu wa Yakobo hadakhale ninga penepi tayu; thangwi iye ndiye nyakusasanya pinthu pyonsene, pontho iye adasankhula Israele kukhala dzinzache ene. MBUYA Wamphamvu zonsene ndiye dzinache.

²⁰MBUYA akulonga kuti, “Iwe Babiloni ndiwe chigomba changa, pontho chida changa cha nkhondo, na iwepo ndimbathibula madzinza mbandivunga maufumu,

²¹na iwepo ndimbalikita akavalo na anyakuapakirache ene mbandivunga pingolo na anyakufambisache ene.

²²Na iwepo ndimbapha amuna na akazi ene, kucheka pakhosi nkhalamba na ana ene, kupha aphale na atsikana ene,

²³na iwepo ndimbapha amakabuswa na mabirawo ene mbandipha anyakulima na ng'ombe zawo zene, kutinthimula mafumu na mathubu awo ene.”

²⁴MBUYA akulonga kuti, “Ine ndinabwezera Babiloni na anthu ache, uku imwe mukuona na maso, thangwi ya pyakudawa pyonsene pyachita iwo mu Zioni.

²⁵Ine ndina mseru na iwe, phiri yakuvunga, pana iwe nyakuvunga dziko yapansi. Ndinafuthula mkono wanga kukutchunyusa, pontho kukubulumundisa m'matelero mbandikuchitisa kupya na moto.

²⁶Nkhabe mwala unakwatwa muna iwe kuti ukakhale mwala wapankhomo wa nyumba tayu, nee mwala wakumanga nawo maziko tayu, thangwi iwe unasanduka thando yatchetcha kwenda na kwenda. Ndalonga ndine MBUYA.

²⁷“Kwizani m'dzulu bandera m'dzikomo. Lizani ngoma pakati pa madzinza. Chitisani madzinza kamenya naye nkhondo; chemeresani mafumu awa dzachita naye nkhondo: Ararati, Mini na Ashikenazi. Sankhulani mkadamu wa anyankhondo kumenyana naye; mutumizeko akavalo ninga nyadzombe.

²⁸Chitisani madzinza kamenyana naye, mfumu wa ku Media, akulu a boma na mathubu ache onsene, pontho na madziko onsene ali pansi pa utongi wawo ale.

²⁹Dziko ikutetemera pontho ikugedemera, thangwi ya pinthu pyasasanya MBUYA kupichita kuna Babiloni, kusandusa dzikoyo thando yatchetcha, mwakuti nkhabe munthu na mbodzi ene anafuna dzakhalamo tayu.

³⁰Anyankhondo a ku Babiloni atula pansi pida; iwo amala bisala mumpanda mwawo. Mphamvu zawo zamala kwenda; iwo asanduka ninga akazi. Mbuto yache yamala piswa moto; mphinga zache zamala gwandika-gwandika.

³¹Anyamphangwa ali thuthuthu kuthamangira kalonga kuna mfumu wa ku Babiloni kuti mzindache onsene wamala pokoserwa,

³²mwakuwambukira mkulo monsene mwapokoserwa, tsanga yakubisalira anyankhondo yamala piswa moto, pontho anyankhondo aphatwa na mantha.”

³³MBUYA Wamphamvu zonsene, Mulungu wa Israele akulonga tenepa: “Babiloni lero wakhala ninga mbuwa ndzidzi umbabubudwa mapira; ndzidzi wache wakumvuna unati ukwane chinchino pano.”

³⁴Anthu a ku Yerusalemu akulonga kuti, “Nebukadinezara, mfumu wa ku Babiloni, amala kutivunga; iye atichitisa kudzudzumika pikulu pene, iye atichitisa kukhala ninga mtete wakusowa pinthu. Iye atikhudyula ninga ntchato mbakhutisa mimbache na manungo athu kubuluka penepo mbatilukula.”

³⁵Anthu a ku Zioni akulonga kuti, “Pinthu pyakuipa pidatichitira iye pile, lero mbapichitwe kuna Babiloni.” Anthu a ku Yerusalemu akulonga kuti, “Chiropa chathu mbachigwere pamsolo pa anyakukhala mu Babiloni.”

³⁶Natenepo MBUYA akulonga kuna anthu ache kuti, “Yang'anani, ine ndinakuikhirani kunduli mbandichitisa anyamalwanu kukubwezerani pyavunga iwo pile. Ine ndinaumisa kakata mikulo ya Babiloni, pontho mphuno za madzi zonsene zinamala uma.

³⁷Babiloni anasanduka mulu wa madongolomwa, mbuto yakubisala matika, ninga chinthu chakugumisa manungo pontho chakusekesa, mbuto yakuti na mbodzi ene nkhabe dzakhalamo tayu.

³⁸Anthu ache onsene akubangula ninga nkhalamu mbakhumbza ninga ana nkhalamu.

³⁹Podi iwo ngamtima, ine ndinaasasanyira phwando, mbandialedzeresa towera akomerwe na kusekera, kubuluka penepo agone chitulo chakufa nacho, mbakhonda fungula maso kwenda na kwenda. Ndalonga ndine MBUYA.

⁴⁰Ine ndinamponderera pansi ninga bira wakufuna kuchekwa, ninga bira pontho mbuzi.”

⁴¹MBUYA akulonga kuti, “Babiloni[32] apokoserwadi, chinthu chimbanyindira dziko yonsene yapansi chile. Babiloni asanduka chinthu chakugumisa manungo pakati pa madzinza.

⁴²Bara inatayikira pana Babiloni; mabimbi ache amphamvu anammbiza.

⁴³Maluwani ache anasanduka madembe, mbuto yakusowa madzi pontho thando yatchetcha, mule anthu nkhabe dzakhalamo tayu, pontho mule anthu nkhabe gwanda namo tayu.

⁴⁴Ine ndinati nditchunyuse Beli, milungu ya Ababiloni, mbandimchitisa kulukula pinthu pyonsene pidakhudyula iye pile. Madzinza nkhabe dzathamangirave kuna iye tayu. “Mpanda wa Babiloni wagwa.

⁴⁵Bulukani mu Babiloni, imwe anthu anga! Thawisani moyo wanu! Thawani ukali wakugoswa wa MBUYA.

⁴⁶Lekani taya mtima penu kuchita mantha mungava mphekesera m'dzikomu; chaka chino anthu analonga pino, chaka chamangwana analonga pinango, mphekesera ya chimpiningu m'dzikomo, pontho mafumu kupandukirana pyawo okhokha.

⁴⁷Thangwi ndzidzi unati ukwane unafuna ine dzatchunyusa milungu yonsene ya Babiloni; dziko yache yonsene inalulupiswa, pontho mitembo ya anthu ache onsene inakhala gwenjere-gwenjere m'dziko mwachemo.

⁴⁸Kudzulu na dziko yapansi na pyonsene pili mwenemo pinakhuwa thangwi ya kukomerwa na pinthu pyachitikira Babiloni, thangwi anyakuvunga akubulukira kumpoto anati achite naye nkhondo, Ndalonga ndine MBUYA.

⁴⁹Babiloni athema kukundwa thangwi ya kupha anthu a ku Israele, ninga montho mwafera anthu anango onsene a padziko yapansi thangwi ya Babiloni.

⁵⁰“Imwe anyakupulumuka kunkhondo ya Babiloni, ndokoni pyanu mbamukhonda yang'ana m'nduli. Kumbukani MBUYA, imwe anyakukhala kumadziko akutali, pontho nyerezerani pya Yerusalemu.

⁵¹Imwe mukulonga kuti, ‘Ife talulupiswa, ife tachitiswa manyadzo mwakuti nkhope zathu zamala tota, thangwi alendo apita m'mbuto zakuchena za Nyumba ya MBUYA.’ ”

⁵²Mbwenye MBUYA akulonga kuti, “Ndzidzi unafika unafuna ine dzatchunyusa milungu yache, pontho anyakukuwazwa anabulira m'dziko mwache monsene.

⁵³“Podi kwene kuti Babiloni aphate pyache thambo tani, pontho kuti mpandache ukhale pyawo wamphamvu tani, ine ndinatuma anyakuvunga pana iye. Ndalonga ndine MBUYA.

⁵⁴“Chiliro chikuveka ku Babiloni, dzunguzo ikulu ikuveka thangwi ya kuvungika m'dziko ya Babiloni.

⁵⁵MBUYA anati avunge dziko ya Babiloni; iye anati amatamise kusokosa kwacheko. Mabimbi a anyamalwa analikitika ninga madzi makulu; kutitima kwawo kunaveka.

⁵⁶Anyakuvunga anati adze pana Babiloni; anyankhondo ache amphamvu anati aphatwe, pontho mauta anatchoka-tchoka. Thangwi MBUYA ndi Mulungu wakutchunyusa anyakuipa; iye anaabwezera monsene mwene mwakuthemerana na pyakuipa pyawo.

⁵⁷Ine ndinaledzeresa mathubu ache na anthu ache anzeru, akulu ache a boma, akadamu ankhondo pontho na anyankhondo ache ene; iwo anagona chitulo chakufa nacho mbakhonda fungula maso kwenda na kwenda. Ndalonga ndine Mfumu, ule dzinache ndi MBUYA Wamphamvu zonsene.”

⁵⁸MBUYA Wamphamvu zonsene akulonga kuti, “Mpanda wamphamvu wa Babiloni unasalazwa, pontho misuwo yache yakulapha inapiswa moto; pyonsene pidabulusira anthu kaluma pyasanduka pyakusowa basa; pyonsene pidatopesa madzinza pile pyamalira pamoto.”

⁵⁹Izi ndi mphangwa zidapereka Yeremia kuna Seraia ndodo ya mfumu, ule akhali mwana Neria, pontho mdzukuluache Maseia, pidenda iye ku Babiloni pabodzi pene na Zedekia mfumu wa ku Yuda chaka chachinayi iye mbali mfumu.

⁶⁰Yeremia akhadalemba mpukutu pya nyatwa zikhadza pana Babiloni zile, pyonsene pikhadalembwa pya Babiloni pile.

⁶¹Iye adalonga kuna Seraia mbati, “Iwe ungaenda ku Babiloni, uonesese kuti wawerenga mafala onsenewa mwakugaluza fala.

⁶²Kubuluka penepo ulonge kuti, ‘MBUYA, imwe mudalonga kuti munavunga dzikoyo, towera muleke dzakhalave munthu penu nyama; inasanduka thando yatchetcha kwenda na kwenda.’

⁶³Ungamala kuwerenga mpukutuwu, uumangirire mwala mbuuponye mumkulo wa Yufurate

⁶⁴mbulonge kuti ‘Chibodzi-bodzi Babiloni anabira mbakhonda belukave thangwi ya nyatwa zinafuna ine, MBUYA dzesa pana iyezi.’ ”[33] Mafala a Yeremia amalira penepa.