Read cisena YEREMIA 52 Bible Online

YEREMIA 52 - cisena bible

YEREMIA 52

¹Zedekia akhali pyaka makumawiri na chibodzi pikhapita iye ufumu wa Yuda mbatonga mu Yerusalemu pyaka khumi na chibodzi. Mache akhali Hamutala mwana Yeremia wa kumzinda wa Libina.

²Mfumu Zedekia adachita pyakuipa pamaso pa MBUYA ninga montho mudachitira Mfumu Yehoiakimu.

³MBUYA adazhangalira pyakwanga anthu a ku Yerusalemu na Yuda mwakuti adaabulusa pamaso pache. Zedekia adapandukira Mfumu Nebukadinezara wa ku Babiloni.

⁴Natenepo Nebukadinezara adadza pabodzi pene na anyankhondo ache onsene dzachita nkhondo na Yerusalemu pansiku yachikhumi ya mwezi wakhumi wa chaka chachifemba Zedekia mbali mfumu. Iwo adamanga misasa kuzungulira mzinda mbasasanya pyakugomolera mpanda.

⁵Mzindawo udazungulirwa na anyankhondo mpakana chaka chakhumi na chibodzi Zedekia mbali mfumu.

⁶Pansiku yachifemba ya mwezi wachinayi wa chaka chonthocho, pidakaka njala mwakuti anthu adasowaletu chakuti adye,

⁷mafufu a mpanda adaswiwa. Podi kwene kuti Ababiloni akhazungulira mzindawo, anyankhondo onsene adamala thawa mumzindamo na mosiku. Iwo adathawa na njira ya kumunda wachifumu mbapita na pamsuwo wa pakati pa mafufu mawiri, kuthawira kuphedi ya Yorodani.

⁸Kwache anyankhondo a ku Babiloni adathamangisa mfumu Zedekia mbamphatira m'phedi chifupi na Yeriko. Tenepo anyankhondo ache onsene adamala thawa mbamsiya yekha.

⁹Zedekia adaphatwa mbaendeswa kuna Mfumu Nebukadinezara, ule akhali mumzinda wa Ribila m'nthemba ya Hamati, natenepo kweneko Nebukadinezara adamtonga mseru.

¹⁰Kweneko ku Ribila Mfumu Nebukadinezara adapha ana a Zedekia iye akuona maso; iye adapha pontho mathubu onsene a mu Yuda.

¹¹Kubuluka penepo iye adamkonombola maso mbammanga na njema mbaenda naye ku Babiloni kudaikhwa iye m'perezo mpakana kufa kwache kule.

¹²Pansiku yachikhumi ya mwezi wachishanu wa chaka chakhumi na chifemba Nebukadinezara mbali mfumu wa ku Babiloni, Nebuzaradani phungu wa mfumu pontho mkadamu wa anyankhondo, adapita mu Yerusalemu.

¹³Iye adapisa moto Nyumba ya Mulungu, nyumba yachifumu na nyumba za anthu onsene akufunika mu Yerusalemu.

¹⁴Tenepo anyankhondo ache adagomola mpanda wa Yerusalemu.

¹⁵Kubuluka penepo Nebuzaradani adakwata anthu adasalira mumzindamo ale, amuna aluso pamabasa akusiyana-siyana, pontho na ale akhadapipereka okha ene kuna mfumu wa ku Babiloni kwenda nawo ninga anyaperezo ku Babiloni.

¹⁶Mbwenye mu Yuda adasiyamo kwene anyakutcherengaletu, ale akhali nkhabe na chinthu chene tayu kuti aphate basa m'minda yamfesa na minda inango.

¹⁷Anthu a ku Babiloni adagomola m'mapindi-mapindi nsanamira ziwiri zankuwa na pigudumu pikhali m'Nyumba ya Mulungu pile, pabodzi pene na phiso ikulu yankuwa mbakwata nkuwa onsene kwenda nawo ku Babiloni.

¹⁸Iwo adakwata pontho mafosholo, pontho pyakuwolera dotha paguwa yansembe, pyakukwizira tsakala ya nyale, ndilo zakuchuchisiramo chiropa cha nsembe, ndilo zakufukizira pyakununkhira pontho na pyombo pinango pyonsene pyankuwa pyakuphatiswa basa m'Nyumba ya Mulungu.

¹⁹Mkadamu wa anyankhondo adakwata mphale, ndilo, pikalango, pyakuikhirapo nyale, piwaya pyakufukizira pyakununkhira na ndilo zinango zikhaphatiswa basa kupereka chakupereka chakumwa, pinthu pyonsene pidasasanywa na golidi chadi-chadi pontho siliva pile.

²⁰Pinthu pyankuwa pidasasanya Mfumu Solomoni kuti pikhale m'Nyumba ya Mulungu: Nsanamira ziwiri, pigudumu, phiso ikulu na ng'ombe zankuwa khumi na ziwiri; pikhali pyakulemera pyakwanga mwakuti kulemera kwapyo kukhali kokhonda dziwika.

²¹Nsanamira ziwirizo zikhali sasawa; ibodzi kulapha kwayo ikhali makhono masere pontho manungo ache akhali makhono mashanu. Izo zikhali na mgwawa m'bwalo mwache, pontho ntchindu yache yankuwa ikhali dzanja ibodzi.

²²Padzulu pa nsanamira zonsene ziwiri pakhali mphanda ziwiri zankuwa, zile ulaphiache ukhali makhono mawiri, pontho kuzungulira mphanda yonsene pakhali mangalade ankuwa akuthemeserwa na pinango pyakuoneka ninga ntheme zankuwa.

²³Pyakuthemesera pyonsene pamzati onsene pakhali ntheme zankuwa dzana ibodzi. Tenepo ntheme makumafemba na zitanthatu zikhaonekera na pansi.

²⁴Kuthimiza penepo Nebuzaradani mkadamu wa anyankhondo adakwata Seraia Nyansembe Wamkulu, Zefania wachiwiri kwa Nyansembe Wamkulu, pontho na akulu-akulu akufunika atatu ku m'Nyumba ya Mulungu mbaenda nawo ninga anyaperezo.

²⁵Kubulukira mumzindamo iye adakwata mkadamu wa anyankhondo ule, mapungu anomwe a mfumu akhadasalira mumzindamo ale, wachiwiri kwa mkadamu wa anyankhondo, ule akhayayang'anira mabukhu a nkhondo, pabodzi pene na amuna anango makumatanthatu akufunika.

²⁶Nebuzaradani adaakwata kwenda nawo kuna mfumu wa ku Babiloni, ule ndzidzi wenewu akhali mumzinda wa Ribila,

²⁷m'nthemba ya Hamati. Kweneko mfumu adatonga kuti anthu ale amenywe mbaphiwa. Natenepo anthu a ku Yuda adakwatwa m'dziko mwawo kwenda kudziko ya unyaperezo.

²⁸Ili m'tchindeyi ndi konta ya anthu adakwata Nebukadinezara ninga anyaperezo: chaka chachinomwe adakwata Ayuda pikwi pitatu na makumawiri na pitatu;

²⁹chaka chakhumi na chisere cha Nebukadinezara iye adakwata anthu madzana masere na makumatatu na awiri kubulukira mu Yerusalemu.

³⁰Chaka chache chamakumawiri na chitatu, Nebuzaradani mkadamu wa anyankhondo adakwata anthu madzana manomwe na makumanayi na mashanu. Onsene pabodzi pene akhalipo pikwi pinayi na madzana matanthatu.

³¹Chaka chidapita Evili-Merodaki ufumu wa Babiloni adakomera mtima Mfumu Yehoiakini wa ku Yuda mbambulusa m'perezo. Penepi pidachitika pansiku yamakumawiri na chishanu ya mwezi wakhumi na chiwiri wa chaka chamakumatatu na chinomwe pidakwatwa Yehoiakini ninga nyaperezo.

³²Evili-Merodaki adamkomera mtima pyakwanga mbampasa chidzo chikulu chene kupiringana mafumu anzache akhadaphatwa pabodzi na iye kwenda ku Babiloni ninga anyaperezo ale.

³³Natenepo Yehoiakini akhatawiriswa kudula nguwo zache za unyaperezo kuvala zinango zene, pontho kudya pathebulu pa mfumu moyo wache onsene.

³⁴Nsiku na nsiku moyo wache onsene, iye akhapaswa na mfumu wa ku Babiloni pikhasowa iye mpakana nsiku idafa iye.