Read cisena YEREMIA 6 Bible Online

YEREMIA 6 - cisena bible

YEREMIA 6

¹“Thawira kumbuto yakupata, iwe dzinza ya Benjemani! Thawamo mu Yerusalemu! Ngoma mbilizwe mu Tekoa! Kwizani m'dzulu chidziwiso pana Beti-Hakeremu! Thangwi nyatwa na kuvungika kukulu pikudza kubulukira kumpoto.

²Ndinavunga mzinda wa Zioni, ule ngwakubalika pontho mtete-mtete ene.

³Amakabuswa na mikumbi yawo ene anapokanyisana naye; iwo anamanga makumbi awo mwakumzungulira, munthu onsene mbamanga khundu yonsene inafuna iye.”

⁴Iwo analonga kuti, “Sasanyikani kuchita nkhondo na Yerusalemu! Lamukani mbatimsoseni uku dzuwa ikuswa miti!” Kwache iwo anati alonge kuti, “Kunja kwadoka, pontho mithunzi ya mawulo yatoma kale kufika.

⁵Tinati timsose na mosiku mbativunga mpanda wa mzinda.”

⁶Ipi ndiye pyalonga MBUYA Wamphamvu zonsene: “Gwisani miti ya mu Yerusalemu, pontho sasanyani pyakugomolera mpandache. Mzindawu wathema kutchunyuswa; thangwi wadzala na kuponderezana.

⁷Ninga mumbachitira mchera kububa madzi, sasawambo pyakuipa pimbabuba muna iye. Upandu na kuzunguzika pilimo mumzindamo; kuva kwache kupha na pironda pyache ine ndikupiona basi.

⁸Anthu a ku Yerusalemu, penepi mbapikhale pyakukucheuzani, gopesera ine ndinakupasani nkhodolo, mbandichitisa dziko yanu kukhala thando yatchetcha, towera muleke khalamo na mbodzi ene.”

⁹Pyalonga MBUYA Wamphamvu zonsene kuna ine mphipi: “Phalakatirani anyakusalira na moyo a Israele khala ninga munda wamfesa; chitani nyambwereza nthambi zache zonsene, towera pasale mphesi zokhokha.”

¹⁰Ine ndidatawira kuti, “Mbani anafuna ine longa naye mbandimcheuza? Mbani anafuna kundivesera? Makutu awo amala phopha,[6] towera aleke kwanisa kuva. Mafala a MBUYA kuna iwo ntchinthu chakunyansa, iwo nkhabe komerwa nawo tayu.

¹¹Kwache ukali wa MBUYA wadzala muna ine, tenepo ine nkhabe kwanisa kuufungira tayu.” MBUYA adalonga kuna ine mbati, “Ukhuthulire pana ana m'misewumu, pontho pana aphale amala gumanyikana pabodzi ale. Amuna na akazawo ene anakwatwa, podi na nkhalamba zene nkhabe dzasiyiwa na moyo tayu.

¹²Nyumba zawo zinaperekwa kuna anthu anango, pabodzi pene na mindawo na akazawo ene, thangwi ine ndinavunga anthu onsene m'dziko yeneyi. Ndalonga ndine MBUYA.

¹³Munthu onsene, mkulu mpakana mwana, onsene nganyamtima kufuna pyakuganyali basi; maprofeti na anyansembe ntchibodzi-bodzi, onsene nkhabe chita mwakuona mtima tayu.

¹⁴Iwo ambamanga mwajumba njinda za anthu anga khala ninga si pironda tayu. Iwo ambalonga kuti, ‘Mtendere, mtendere’ podi kwene kuti mtenderewo nkhabepo.

¹⁵Ayi iwo ambachita manyadzo na pinthu pyakunyansa pidachita iwopi? Nkhabe, iwo nkhabe kuva napyo manyadzo; iwo nkhabe kula napyo msolo tayu. Tenepo iwo anagwa ninga mudagwera anzawo, ine ndingaatchunyusa kumala kwawo kunakhala konthoko. Ndalonga ndine MBUYA.”

¹⁶MBUYA adalonga kuna anthu ache mbati, “Imirani pamphambano mbamuyang'ane; vunza-vunzani pya njira zakale ene, vunzani kuna njira yadidi mbamufambemo, tenepo moyo wanu unagumana kupuma. Kwache imwe mudalonga kuti, ‘Ife nkhabe fambamo tayu.’

¹⁷Ine ndidakusankhulirani anyakulondali mbandilonga kuti, ‘Veserani kulira kwa ngoma!’ Kwache imwe mudalonga kuti, ‘Ife nkhabe vesera tayu.’

¹⁸Natenepo veserani, imwe madzinza; yang'anani imwe mboni, pinafuna dzachitika kuna iwo.

¹⁹Vesera, iwe dziko yapansi: Ndinati ndidzese nyatwa pana anthu enewa, kuatchunyusa thangwi ya pyakuipa pidasasanya iwo kuchita; thangwi iwo hadavesere tayu mafalanga, pontho akhonda kuvera matongero anga.

²⁰Ninji pontho chinafuna ine tsalakana pya pyakufukiza pyakununkhira pya ku Sheba, penu pyakukomesera muliwo pya kudziko yakutali? Pyakupereka pyawo pyakupyerera, ine nkhabe kupitambira tayu; nsembe zawo, ine nkhabe komerwa nazo tayu.”

²¹Natenepo MBUYA akulonga kuti, “Ndinachitisa anthu enewa kugwegweduka mbagwa. Ababa pabodzi pene na anawo achimuna anagwegweduka; atsanthembawo na ashamwali awo anamala vungwa.”

²²Natenepo MBUYA akulonga kuti, “Ngayang'anani anyankhondo akudza kubulukira kudziko yakumpoto; dzinza yamphamvu ya kumadolomero a dziko yapansi ikusasanyikira pya nkhondo ile.

²³Iwo aphatirira mauta na madipa; iwo ngakukala mtima mbakhonda kuva nsisi. Iwo akuveka ninga madzi akukuka ndzidzi unadza iwo pa akavalo awo; iwo asasanyika kuchita nkhondo na iwe, mzinda wa Zioni.”

²⁴Anthu a ku Yerusalemu akulonga kuti, “Ife tava mbiri yakulonga pya iwo, tenepo manjathu achita chiwewa. Ife taphatwa na mantha makulu, tikuva kupha ninga mkazi wa mimba pakubala.

²⁵Mbatileke buluka kwenda kuminda penu kufamba m'misewu, thangwi anyamalwathu aphatirira matalasada, pontho kukhundu zonsene kuna pyakugoswa.”

²⁶MBUYA akulonga kuti, “Anthu anga, valani masakha mbamubulumunde padotha; lirani na chiliro chikulu khala ninga munthu akulira mwanache mbodzi ene basi, thangwi nyakuvunga anabwera pana imwe mwakututumusa.

²⁷Yeremia, ine ndakusankhula kukhala nyakuyesa anthu anga ninga nyakuyesa ntove, towera uone kuti iwo akhala ninganji.

²⁸Onsene mbakupandukira pontho anyakuuma mtima, iwo ambaenda mbalonga matsweda. Iwo akhala ninga nkuwa pontho simbi; iwo onsene ambachita mwakupotoka.

²⁹Dzenje ya moto ikugaka mwakugoswa kuti unyunguluse utale, kwache kunyungulusako nkhabe basa tayu; masepu-sepuwo hakubuluka tayu muntovemo.

³⁰Iwo anachemerwa siliva wakusowa basa, thangwi MBUYA aakhonda.”