Read cisena YEREMIA 7 Bible Online

YEREMIA 7 - cisena bible

YEREMIA 7

¹MBUYA adapanga Yeremia kuti,

²“Imira pamsuwo wa Nyumba ya Mulungu, pontho penepo mbulalike mphangwa izi: “Veserani mafala a MBUYA, imwe monsene anthu a ku Yuda, ale ambapita na pamisuwo yeneyi dzapembedza MBUYA.

³MBUYA Wamphamvu zonsene, Mulungu wa Israele akulonga kuti: Sanduzani makhaliro anu na mabasanu, tenepo ndinakutawirisani kuthimiza kukhala m'dzikomu.

⁴Lekani nyindira mafala akunama mbamulonga kuti, ‘Ino ndi Nyumba ya MBUYA! Ino ndi Nyumba ya MBUYA! Ino ndi Nyumba ya MBUYA!’

⁵“Ngakhala imwe munasanduzadi makhaliro anu na mabasanu, pontho mungachitirana pyakulungama unango na mwanzache,

⁶ngakhala imwe munakhonda kupondereza alendo, ana masiye, penu amamfelwa, mbamuleka kuchuchisa chiropa cha anthu okhonda dawa pambuto yeneyi, pontho ngakhala munaleka kupembedza milungu inango, ile inakwanisa kukuvungani,

⁷penepo ine ndinakutawirisani kukhala pambuto yeneyi, dziko idapasa ine makolo anu ile kuti ikhale yawo ene kwenda na kwenda.

⁸Kwache ngayang'anani, imwe mumbanyindira mafala akunama, ale ngakusowa basa.

⁹“Imwe mumbathimiza kuba na kupha, pontho kuchita uputa na kudumbira pyakunama, na kufukiza pyakununkhira kuna milungu Baala, pontho kupembedza milungu inango ile chipo imwe nkhabe kuidziwa tayu.

¹⁰Kubuluka penepo mumbaimira pamaso panga m'Nyumbanga mbamulonga kuti, ‘Ife tili pakupata!’ Pakupata mwakuti munakwanisa kuchita pinthu pyonsene pyakunyansapi!

¹¹Kani Nyumba yeneyi, ile yakwata dzinangayi, yasanduka nyumba yakubisaliramo mapanga? Kwache ine ndapiyang'ana pyanga! Ndalonga ndine MBUYA.

¹²“Chinchino ndokoni ku Shilo,[7] mbuto idatoma ine kuisankhula ile, mbamukaone pidachita ine kweneko, thangwi ya kudawika kwa anthu anga Aisraele.

¹³Ndzidzi ukhachita imwe pyonsenepi, ine ndikhalonga namwe kazinji kene, kwache imwe mudakhonda kundivesera; ine ndidakuchemerani, kwache imwe nee mudanditawira tayu.

¹⁴Natenepo pidachita ine kuna Shilo ndiye pinafuna dzachita ine kuna Nyumba yakwata dzinangayi, Nyumba inanyindira imweyi, mbuto idakupasani ine imwe na makolo anu ene ile.

¹⁵Ine ndinakubulusani pamaso panga ninga mudathamangisira ine abale anu, dzinza ya Eferemu. Ndalonga ndine MBUYA.”

¹⁶MBUYA adalonga mbati, “Yeremia leka pempherera anthu enewa. Leka kualirira penu kuadembetera kuna ine m'mbuto mwawo; leka kundibulumbundira, thangwi ine sinakuvesera tayu.

¹⁷Ayi iwe nkhabe kuona tayu pinachita iwo m'maluwani a Yuda na m'misewu ya mzinda wa Yerusalemu?

¹⁸Ana akulokotera nkhuni, ababa akuphatisa moto, amamambo akumunya pitumbuwa kuti aphikire milungu ambachemera iwo, Matsano Wakudzulu. Iwo ambapereka nsembe za pyakumwa kuna milungu inango kundichitisa kuzhangali.

¹⁹Ayi ndine pano anazhangalisa iwo ule? Ayi kunachita iwo si kupikuwaza pontho kupichitisa okha ene manyadzo tayu?

²⁰Natenepo, ine MBUYA Mulungu, ndinakhuthulira ukali na shungu yanga yonsene pana Nyumba yeneyi, pana munthu onsene, pana nyama zene, pana miti na pana mbewu zonsene. Ukali wanga unakhala ninga moto okhonda thimisika.

²¹“Ine MBUYA Wamphamvu zonsene, Mulungu wa Israele ndikulonga tenepa: Anthu anga, thimizani pyakupereka pyakupyerera kuna nsembe zanu zinango mbamudye pyanu nyamazo.

²²Thangwi pidabulusa ine makolo anu m'dziko ya Iguputo mbandilonga kuna iwo, ine sidaapase kwene matongero a pyakupereka penu nsembe zakupyerera tayu,

²³mbwenye ndidaapasa matongero akuti: ndivereni, tenepo ine ndinakhala Mulungu wanu, imwembo mbamukhala anthu anga. Fambani m'njira zonsene zinakutongani ine, towera pinthu pyanu pikufambireni mwadidi.

²⁴Kwache iwo hadavere penu kupiikha konta tayu. M'mbuto mwache iwo adakakamira kuchita pinthu pikhafuna mtimawo wakuuma pontho wakuipa ule. Iwo adabwerera m'nduli mbakhonda ikha maso awo patsogolo.

²⁵Kubulukira pa ndzidzi udabuluka makolo anu m'dziko ya Iguputo kufikirana lero, nsiku na nsiku pontho kazinji kene, ine ndikhakutumizirani anyabasanga, maprofeti.

²⁶Kwache nkhabe na mbodzi ene wa imwe adandivesera penu kupiikha konta tayu. M'mbuto mwache imwe ndiye mudanyanyiratu kuumisa mtima pontho kukhala akuipa kupiringana makolo anu.

²⁷“Tenepo Yeremia, iwe ungaapanga pinthu pyonsenepi, iwo nkhabe dzakuvesera tayu; iwe ungaachemera, iwo nkhabe dzakutawira tayu.

²⁸Natenepo longa kuna iwo kuti, ‘Yeneyi ndi dzinza ile hidavera MBUYA Mulungu wache tayu, penu kuva kusumululwa tayu. Pyakuonadi nkhabe pakati pawo, pontho pyabulukamo m'kanwa mwawo.’

²⁹Chinga tsisi yanu mbamuitaye; imbani nyimbo ya maliro pamapiri akupupwa, thangwi MBUYA na kuzhangali kwache akhonda pontho apasa nkhodolo mfendu wenewu, ule uli pansi pa ukali wache.”

³⁰MBUYA akulonga kuti, “Anthu a ku Yuda achita pyakuipa pamaso panga. Iwo aswipisa Nyumbanga pakuikha mifanikizo yawo mwenemo.

³¹Iwo amanga mbuto yakupembedzerapo milungu pa Tofeti m'phedi ya Beni-Hinomu, towera apereke anawo achimuna na achikazi ene nsembe zakupyerera, chinthu chakuti sidaatonge ndine tayu kuchita tenepo, penu kukhala nachombo m'manyerezero mwanga.

³²Natenepo ndzidzi unati udze wakuti iyo nkhabe dzachemerwave Tofeti, penu phedi ya Beni-Hinomu tayu, mbwenye inachemerwa phedi yakuchekana, thangwi iwo anafikhira mitembo ya anthu penepo mpakana mbuto yonsene imale.

³³Mitembo ya anthu enewa inakhala pyakudya pya mbalame na nyama zam'tsanga, tenepo panakhala nkhabe munthu na mbodzi ene wakuzigoswa tayu.

³⁴Dziko inasanduka thando yatchetcha. M'mizinda ya Yuda na Yerusalemu ndinamalisamo mkhuwo wakusekera na kukomerwa, pontho mkhuwo wa maphwando akukazhali.”